Жаңа оқу жылының қарсаңында және Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның туристік өлкетану бағытындағы балалар-жасөспірімдер ұйымдары желісін дамыту, балалардың шығармашылығын ұйымдастыру туралы тапсырмасын орындау аясында Батыс Қазақстан облысы әкімінің орынбасары Қ.Е.Меңдіғалиев пен Ұлттық комиссия төрағасының орынбасары Е.И.Тарасенконың жұмыс сапары ұйымдастырылды. Олар облыс орталығы Орал қаласында орналасқан балаларға арналған туристік нысандарға барды. Бұл ретте, су тасқынынан зардап шеккен «Еуразия» туристік лагерін қайта қалпына келтіру жұмыстарына, «Самал» туристік лагерінде жасақталған қауіпсіздік жағдайы мен сапасына баса назар аударылды. Облыстық балалар-жасөспірімдер туризмі және экология орталығына барған кезде экскурсиямен қоса, өңірдегі балалар-жасөспірімдер туризмі және экология жүйесінің жағдайын талдау таныстырылды. Сонымен қатар Ақжайық және Тасқала аудандарындағы туристік балалар орталықтарының жұмысы қорытындыланды. Елімізде алдыңғы қатардағы орындарды иеленетін өңірдің балалар-жасөспірімдер туризмі орталықтарының желісін одан әрі дамыту жолдары, олардың жұмыс сапасын арттыру, тиісті жағдайлар жасау тәсілдері көзделді. Жұмыс сапары соңында көптеген жылдар бойы өңірде балалар туризмі жүйесінің қалыптасуына және дамуына зор үлес қосып келе жатқан В.П.Фоминге алғыс білдірілді. 2024 жылы айтулы іс-шараларды өткізу туралы шешім қабылданды.