ИМАНДЫҚ КЕПІЛІ
Дін – адам тарихының үлкен тағылым-тәрбиесінің бірі және сарқылмас даналық көзі. Егемен ел болып қалыптасуымызда, мемлекетіміздің өсіп, өркендеуінде діннің алатын орны үлкен. Өйткені дін – имандылықтың, әділдіктің, сыпайылықтың, парасаттылықтың, көпшілдіктің, төзімділіктің кепілі. Мектептегі «Зайырлылық және дінтану негіздері» пәнінің танымдық мәнімен қоса, тәрбиелік мазмұнына баса көңіл аударудың маңызы зор. Оқушыларға ең алдымен діннің анықтамаларына мән беруден бастаған дұрыс. Мысалы, «Дін – адамды туралық пен әдемілікке жетелейтінжол», «Дін – адамның өмірін тәртіпке келтіретін жүйе», «Дін – адамды шындыққа жеткізетін жарық» деген қағидаларды жастардың құлағына құю қажет. Сонымен бірге дін қоғамның тәртіпті, бақытты болуына ықпал жасап, адамның жүріс-тұрысын, мінез-құлқын, ішкі жан дүниесін реттейді. Ата- бабаларымыз дінді тереңінен зерттеп, мол тағылымын өзінің салт-санасына, дәстүріне сіңіре білді.
Пайғамбарымыз хадисінде:«Өзіңе не тілесең, әуелі оны басқалар үшін қыл» десе, ата-бабаларымыз өзі түгілі дұшпанына жамандық тілемеуді ұрпағына аманат еткен. Абай атамыз да «Алланың адам баласына дінді түсірудегі мақсаты – құлдарының жолдан адаспауы үшін, бір-бірімен ізгілікте, татулықта өмір сүрулері үшін болды» дейді. Осындай дана сөздердің мағынасын түсіндіре отырып, діннің түп мақсатынашуға тырысу керек. Алғашқы сабақтарда оқушылардан діннің қажеттілігін сұрағанымда «Жұмаққа бару, о дүниеде жақсы өмір сүру, күнәдан арылу, мына өмір жалған» деген сөздерді естідім. Қазіргі кезде оқушылардың бұл ойдан арылып, өзін-өзі тәрбиелеуі керектігін түсінгені қуантады. Әр сабақ сайын шәкірттерге жат діни ағымдардың алдын алу мақсатында адамгершілік, мейірім, адалдық, Отанды сүю туралы түсіндірме жұмыстарын жүргізіп, пікір алмасулар өткізіп, ұлттық дәстүріміз бен дінімізді сақтау жайында айтып отырамын.
Ж.РАМАЗАНОВ,А.Оразбаева атындағы негізгі мектептің мұғалімі