Страницы

Статья

Шыңғырлау ауданының ұстаздары, ата-аналары және оқушыларының назарына!

Шыңғырлау ауданының білім беру бөлімі Қазақстан Республикасы Оқу-ағарту министрінің 2026 жылғы 29 сәуірдегі №106-НҚ бұйрығына сәйкес, аудандық білім беру бөлімінің 2026 жылғы 13 мамырдағы №229 бұйрығы негізінде мектептер мен мектепке дейінгі ұйымдарда заңсыз ақша жинауға және бітіру іс-шараларын ұйымдастыруда қауіпсіздік пен тәртіп талаптарын сақтау бойынша түсіндіру жұмыстарын жүргізуде.

Бұйрыққа сәйкес:

Бітіру кештерін мейрамханаларда, кафелерде, банкет залдарында, демалыс орындарында, табиғат аясында өткізуге;

Автокортеждер ұйымдастыруға, таңды қарсы алу, алау жағу секілді іс-шараларды өткізуге;

Ата-аналардан, оқушылардан немесе заңды өкілдерден ақша жинауға, сыйлықтар мен түрлі жарналар талап етуге;

Мектеп әкімшілігі мен педагогтерге сыйлық алуға қаражат жинауға;

Аниматорлар, мерекелік агенттіктер мен студияларды тартуға;

Сән-салтанатқа негізделген артық шығындарға ЖОЛ БЕРІЛМЕЙДІ.

Аттестат табыстау рәсімдері тек білім беру ұйымдарының қабырғасында немесе мектеп аумағында өткізілуі тиіс.

Бітіру іс-шараларын ұйымдастыру барысында ең басты назар білім алушылардың қауіпсіздігіне, құқықтарының қорғалуына және қоғамдық тәртіптің сақталуына аударылуы қажет.

Оқу жылының аяқталуына орай барлық білім беру ұйымдарында «Білімім – Отаныма!» тақырыбында сынып сағаттары өткізіліп, «Адал азамат» біртұтас тәрбие бағдарламасының құндылықтары насихатталады.

Құрметті ата-аналар, ұстаздар және түлектер!

«Соңғы қоңырау» мен аттестат тапсыру рәсімі — әрбір түлек өміріндегі ерекше кезең. Сондықтан барлық мерекелік іс-шаралардың заң талаптарына, тәртіп пен қауіпсіздік қағидаларына сай ұйымдастырылуы — баршамызға ортақ жауапкершілік.

Бірлескен түсіністік пен жауапкершілік арқылы балаларымыздың жарқын әрі қауіпсіз болашағына бірге жағдай жасайық!