Қоршаған ортаның тазалығын сақтап, оның байлығын көздің қарашығындай қорғау - бүгінгі күннің өзекті мәселесіне айналды. Өйткені арнайы мамандардың пайымдауынша табиғат аясында серуендеуге шыққан әрбір адам артында кемінде 15 кг қатты тұрмыстық қалдықтар қалдырады екен. Мәселен, пластмасса құтылар жер бетінде 500 жылға дейін, кәдімгі полиэтилен пакеттер 200 жылдан астам уақыт бойы шірімей жататын көрінеді. Ал консерві қалбырлары мен шыны сынықтары мың жылға дейін жер қойнында жатып, топырақ құнарын жейтіндігі айтылуда.
Табиғат - Ана өзіне деген қамқорлықты, аялы алақан мен сүйіспеншілікті қалайды. Десекте адам баласы өзін қоршаған ортаның тазалығына атүсті қараудан арылар емес.
Ауылымыздың тұсынан өтетін Атырау-Астрахань тас жолының жолаушылары мен ауыл тұрғындары тұрмыстық қалдықтарын лақтырып кететіні қынжылтады. Міне осындай олқылықтардың алдын алу мақсатында 26 ақпан күні ауылымыздың тұсынан өтетін Атырау-Астрахань тас жолының бойы, Исатай ауданының шекарасына кіреберісіндегі белгінің айналасы және күнделікті ауыл арасы Қамысқала ауылдық округі әкімі аппаратының ұйымдастыруымен ақылы қоғамдық жұмысшылары көмегімен тазалау жұмыстары жүргізілді.
«Тазалық тазалаған жерде емес, таза ұстаған жерде» деген мәтелді жолаушылардың және ауыл тұрғындарының ұмыт қалдыратыны өкінішті-ақ. Жалпы тазалық өзімізден басталатындығын ұмытпайық, өзгеден де осыны талап етейік.