Елордада мұқтаж жандарға құрбандық еті таратылып жатыр. Биыл қала әкімдігі мен мүфтияттың бірлескен күшімен qurban2021.kz сайты арқылы онлайн құрбандық шалу ұйымдастырылды.

Елордада мұқтаж жандарға құрбандық еті таратылып жатыр. Биыл қала әкімдігі мен мүфтияттың бірлескен күшімен qurban2021.kz сайты арқылы онлайн құрбандық шалу ұйымдастырылды.
⠀
«Елордамызда пандемияға байланысты qurban2021.kz сайты арқылы, яғни онлайн құрбандық шалу жүріп жатыр. Қазіргі таңда елордадағы 3 жарым мыңнан астам мұқтаж жанға үлестіріп жатырмыз. Құрбан айттың бірінші күні 700 пакет құрбандық етін тараттық. Бүгін 1500-ден астам пакет бар», - деді Нұр-Сұлтан қаласы Дін істері жөніндегі басқармасының басшысы Нұрдәулет Алмұханов.
⠀
Еріктілер құрбандық етін бөлуге, таратуға көмектеседі, автоволонтерлер бұл пакеттерді өз машиналарымен көрсетілген мекен-жай бойынша тасымалдап жатыр.
⠀
«Нұр-Сұлтан қаласының тұрғындарына ет тарату жұмыстары жүріп жатыр. Ол әлеуметтік жағдайы төмен, көпбалалы отбасыларға жеткізіледі. Тұрғындарға жақсы көңіл-күй сыйлап, мерекемен құттықтап шығып жатырмыз», - деді «Жас сарбаз» Жасөспірімдер әскери-патриоттық қозғалысы қалалық филиалының төрағасы Асхат Налшыбек.
⠀
Айта кетейік, биыл қоғамдық қауіпсіздікті қамтамасыз ету және адамдардың жаппай жиналуына жол бермеу мақсатында мал союға арналған дәстүрлі орындар, яғни базарлар, шаруа қожалықтары жабылды.