Ақмола облысында 109 қызметі арқылы азаматтардың өтініштерімен жұмыс істеудің жаңа алгоритмі бекітілді
Ақмола облысы әкімінің 2026 жылғы 14 қыркүйектегі № 50 өкімімен өңір тұрғындарының өтініштерін өңдеу бойынша мемлекеттік органдар мен ұйымдардың қызметін үйлестіру және өзара іс-қимыл Алгоритмі бекітілді.
Құжат 109 бірыңғай нөмірі, сондай-ақ ресми Telegram-боттар мен әлеуметтік желілер арқылы түсетін өтініштерді қабылдаудың, тіркеудің, қараудың және орындалуын бақылаудың бірыңғай әрі нақты тәртібін белгілейді.
Негізгі үйлестіруші — iKOMEK109
Бүкіл жүйенің негізгі үйлестірушісі — Ақмола облысы цифрландыру және архивтер басқармасының «Smart Aqmola» КММ базасында жұмыс істейтін iKOMEK109 Бірыңғай контакт-орталығы.
Орталық тәулік бойы жұмыс істейді және деректерді өңдеудің толық циклін қамтамасыз етеді:
Тұрғындардан түскен хабарламаларды тәулік бойы қабылдау;
Өтініштерді жіктеу және құзыретті қызметтерге жедел бағыттау;
Әрбір өтінімнің орындалу сапасына жүйелі мониторинг пен бақылау жүргізу.
Қауіптіліктің үш деңгейі және жедел әрекет ету мерзімдері
Жаңа алгоритм барлық түскен өтініштерді азаматтар үшін ықтимал қауіп дәрежесіне байланысты қауіптіліктің үш деңгейі бойынша жіктейді. Әрбір санат үшін шаралар қабылдаудың жеке талаптары мен мерзімдері белгіленген.
Маңызды: Тұрғындардың өмірі мен денсаулығына тікелей қауіп төнуіне байланысты өтініштер бойынша жауапты қызметтер сигнал түскен сәттен бастап 3 сағат ішінде орындаушылардың оқиға орнына жетуін қамтамасыз етуге міндетті.
Жауаптардың сапасына және фотоесептерге қойылатын талаптар
Құжат қатаң талап қояды: өтініш иелеріне берілетін жауаптар енді үстіртін немесе формальды сипатта болмауы тиіс. Орындалған шешімнің әрбір құжатында мыналар болуы керек:
-
Көтерілген мәселенің мәні бойынша нақты ақпарат;
-
Нақты орындалған жұмыстар туралы егжей-тегжейлі мәліметтер;
-
Растайтын фото және бейнематериалдар.
Орындалуды талдау және бақылау
iKOMEK109 бірыңғай контакт-орталығы түскен және өңделген өтініштерге күнделікті талдамалық мониторинг жүргізеді. Ағымдағы жағдай, мерзімдердің немесе жауаптар сапасының бұзылуы туралы жиынтық ақпарат жауапты мемлекеттік органдардың басшыларына және Ақмола облысы әкімінің аппаратына үнемі беріліп отырады.
«iKOMEK109 негізгі міндеті — азаматтың өтінішін жай ғана тіркеп қою емес, оны тіркеуден бастап мәселе нақты шешілгенге дейінгі барлық кезеңде сүйемелдеу. Жаңа Алгоритм орындаушылардың жеке жауапкершілігін белгілейді және шұғыл әрі коммуналдық қызметтердің жұмысындағы іркілістерді уақытылы анықтауға мүмкіндік береді», — деп атап өтті мамандар.
Жаңа Алгоритмді енгізу ведомствоаралық өзара іс-қимылды арттыруға, мемлекеттік органдар жұмысының ашықтығына және Ақмола облысының тұрғындарын толғандыратын күнделікті мәселелерді жедел шешуге бағытталған.