Ақмола облысының цифрландыру басқармасы – АКТ мәселелері бойынша бірыңғай оператор
2025 жылғы 14 қаңтарда Ақмола облысының әкімі М. Ахметжанов №5 өкімге қол қойды. Бұл құжатқа сәйкес, «Ақмола облысының цифрландыру және архивтер басқармасы» цифрландыруды енгізу және дамыту, цифрлық трансформация, ақпараттық-коммуникациялық технологиялар (АКТ) саласы бойынша бірыңғай оператор болып тағайындалды.
Бұл шешім өңірдегі цифрландыру үдерістерін орталықтандыруға және оңтайландыруға, сондай-ақ бюджет қаражатын тиімді пайдалану деңгейін арттыруға бағытталған.
Не өзгерді?
1. Бюджеттік өтінімдерді міндетті түрде келісу
Барлық бюджеттік бағдарламалардың әкімшілері АКТ саласындағы тауарларды, жұмыстар мен көрсетілетін қызметтерді сатып алуға қатысты өтінімдерді Цифрландыру басқармасымен міндетті түрде келісуге тиіс.
Құжаттар тек келісілгеннен кейін «Ақмола облысының экономика және бюджеттік жоспарлау басқармасына» жолдана алады.
2. Өтінім беру тәртібі
Өтінімдерді тек уәкілетті мемлекеттік органдар ғана бере алады.
Ведомстволық бағынысты ұйымдар өтінімдерді тікелей, бекітілген тәртіпті айналып өтіп, жолдай алмайды.
3. Өтінімдерге жауапкершілік
Бюджеттік бағдарламалар әкімшілерінің басшылары жауапты:
өтінімнің негізділігіне,
есептердің дәлдігіне,
құжаттарды уақытылы тапсыруға.
Негіздеме: Қазақстан Республикасының Бюджет кодексінің 67-бабы, 12-1-тармағы.
4. Өтінім тапсыру мерзімі
АКТ саласындағы мемлекеттік сатып алуға арналған шығындар есебі жыл сайын 1 наурызға дейін тапсырылуға тиіс (Қазақстан Республикасының «Ақпараттандыру туралы» заңының 60-бабы).
5. Қажетті құжаттар
Қазақстан Республикасы Инвестициялар және даму министрінің м.а. 2016 жылғы 16 наурыздағы №274 бұйрығымен бекітілген Нұсқаулықтың 12-тармағына сәйкес, өтінімге қоса ұсынылады:
Түсіндірме жазба (бюджеттік өтінім құру қағидаларына сай).
Екі немесе одан да көп жеткізушіден алынған коммерциялық ұсыныстар:
тауарлар бойынша – саны, сипаттамасы, бағасы;
жұмыстар/қызметтер бойынша – орындалатын операциялар, құны, мерзімі, ресурстар.
Егер жоба «электрондық үкіметке» қатысты болса:
инвестициялық ұсыныс,
қаржылық-экономикалық негіздеме,
техникалық тапсырма көшірмелері.
Жаңа тәртіптің мақсаттары:
АКТ саласындағы мемлекеттік сатып алулардың ашықтығын арттыру;
Цифрландыруға бөлінген бюджет қаражатын оңтайландыру.
Цифрлық технологияларды енгізу тиімділігін бақылау.
Қорытынды:
Цифрландыру басқармасын бірыңғай оператор ретінде белгілеу — функциялар қайталануын жоюға, мақсатсыз шығындарды азайтуға және өңірдің цифрлық трансформациясын жеделдетуге мүмкіндік береді.
Бюджеттік бағдарламалар әкімшілері өтінімдерді тапсыру мен келісудің жаңа тәртібін қатаң сақтау керек, себебі ережелерді бұзу әкімшілік жауапкершілікке әкеп соғуы мүмкін.