Қос бірдей республикалық байқаудың бас жүлдесі Алматы облысына бұйырды.
Өткен аптада ҚР Мәдениет және спорт министрлігі Тіл саясаты комитетінің ұйымдастыруымен Шымкент қаласында өткен Республикалық "Тілдарын – 2019" байқауында Алматы облысының намысын қорғаған Жадыра Байназар Бас жүлдені қанжығалап қайтса, Қызылорда қаласында өткен "Текті сөздің төресі – терме" атты жыршы-термешілердің республикалық байқауында Алматы облысының термешісі Елбол Қуанбек Бас жүлдегер атанды.
Естеріңізде болса, Жадыра Алматы облысының тілдерді дамыту жөніндегі басқармасының ұйымдастыруымен тамыз айында өткен облыстық "Тілдарын – 2019" байқауында жеңімпаз атанып, республикалық байқауға жолдама алған болатын. Республикалық байқауға 3 қала мен 12 өңірдің іріктеу сынында жеңіске жеткен 15 талапкер қатысты. Оларға қазақ, орыс, ағылшын тілін жетік меңгеруі басты талап етіліп, білімдері жан-жақты сынға алынды. Полиглоттар шеберлігін тіл мамандарынан құралған қазалар алқасы бағалады.
Ал еліміздің 14 облысынан және Нұр-Сұлтан, Алматы, Шымкент қалаларынан келген, көмейлеріне бұлбұл ұялаған үміткерлер арасынан оза шапқан жерлесіміз Елбол Қуанбек Жетісу жерінің дәстүрлі ән, күй, жыр мектептері қалыптасқан киелі өңір екеннін тағы бір мәрте дәлелдей түсті.
Біз облыс үмітін ақтаған қос өренді жеңістерімен шын жүректен құттықтаймыз!