Дін саласындағы мәселелер бойынша азаматтарға арналған АҚПАРАТ

Дін саласындағы мәселелер бойынша азаматтарға арналған

АҚПАРАТ

Алматы облысының Дін істері басқармасы (бұдан әрі - Басқарма) азаматтар мен заңды тұлғаларға дін саласындағы мемлекеттік саясат, діни қызметке қатысты заңнама талаптары, өңірдегі діни ахуал және діни экстремизмнің алдын алу мәселелері бойынша өз құзыреті шегінде түсіндіру және консультациялық көмек көрсетеді.

Азаматтар тарапынан қойылатын сұрақтардың бірі — мешіт салу тәртібі. Мешіт құрылысын жоспарлау кезінде ғибадат үйін салу және оның орналасатын жерін айқындау туралы тиісті шешімді алу қажет. Аталған мемлекеттік қызметке өтінішті eGov.kz порталы арқылы «Электрондық лицензиялау» — eLicense.kz порталында беруге болады. Қажетті құжаттар тізімі қызмет паспортында көрсетілген.  Сонымен қатар, жер учаскесіне құқықтарды рәсімдеу, жобалау және құрылыс талаптарын сақтау мәселелері тиісті уәкілетті органдармен пысықталуы тиіс. Осы рәсімдер бойынша бастапқы түсіндірме алу үшін Басқармаға жүгінуге болады.

Сонымен қатар, мешіт құрылысына тікелей қаржылай көмек көрсету Басқарманың құзыретіне кірмейді. Қаржыландыру мәселесін құрылыс бастамашылары тиісті діни бірлестікпен бірлесіп, заңнамада рұқсат етілген қаражат көздері есебінен қарастырады. Ұйымдастырушылық мәселелерді Қазақстан мұсылмандары діни басқармасының өңірлік өкілдігімен алдын ала талқылау ұсынылады. Қайырымдылық және демеушілік қаражат тартылған жағдайда оны жинау мен жұмсаудың ашықтығын, құжатпен расталуын және есептілігін қамтамасыз ету маңызды.

Сондай-ақ, дін саласындағы заңнама талаптарын сақтаумен қатар, азаматтардың діни сеніміне құрметпен қарау қажет. Заңды діни қызметке кедергі келтіру, азаматтардың құқықтарын дінге көзқарасына байланысты бұзу, діни сезімдерін қорлау немесе дін ұстанушылар қастерлейтін заттарды, құрылыстар мен орындарды бүлдіру үшін Қазақстан Республикасының Әкімшілік құқық бұзушылық туралы кодексінің 490-бабында жауаптылық көзделген. Мұндай жағдайға тап болған азамат оқиғаның мән-жайын баяндап, қолда бар дәлелдерді қоса ұсына отырып, полиция органына жүгіне алады. Әрекетке құқықтық баға беруді және жауаптылық мәселесін шешуді уәкілетті органдар жүзеге асырады.

Бұдан бөлек, дін саласындағы мәселелер бойынша түсіндірме алу немесе өтініш жолдау үшін «e-Otinish» ақпараттық жүйесінде «Алматы облысының
Дін істері басқармасы» мемлекеттік мекемесін таңдап, мәселенің мазмұнын көрсету қажет. Сондай-ақ, жазбаша өтінішті Басқарманың кеңсесіне тапсыруға болады. Өтініште өтініш берушінің мәліметтері, байланыс деректері және қойылатын мәселенің мәні көрсетіледі.

Басқарманың мекенжайы: Қонаев қаласы, 4-шағын аудан, 10/1.
Кеңсе телефоны: 8 (72772) 2-05-50. Жеке қабылдауға жазылу тәртібі мен қабылдау уақытын кеңсе арқылы нақтылауға болады.