⚡️ БИЫЛ АЛҒАШ РЕТ АУЫЛ МЕКТЕП МҰҒАЛІМДЕРІНЕ АРНАЛҒАН КОНКУРС ӨТТІ

 Абай облысында «Үздік ауыл мұғалімі» облыстық конкурсы өтті. Конкурс ауылдық елді мекендегі білім беру ұйымдары педагогтерінің кәсіби шеберліктерін шыңдау, ғылыми-әдістемелік жұмыстарын белсендіру, іс-тәжірибелерін таратуға жағдай жасау мақсатын алға тартты.

Өңірде алғаш рет ұйымдастырылып отырған іс-шараға ауылдық елді мекендегі білім беру ұйымдарынан еңбек өтілі 5 жылдан кем емес 9 педагог қатысты.

Педагогтер конкурс шарты бойынша өздерінің кәсіби өсу картасы мен жетістіктерін, шығармашылық жұмыстарын таныстырды. Сондай-ақ әділқазылар алқасы мұғалімдер ұсынған педагогикалық тәжірибелер панорамасын бағалады. Бұдан басқа қатысушы педагогтер ашық диалог алаңында берілген жағдаяттық тапсырмаларды шешіп, өздерінің шеберліктерін танытты.

Облыстық инновациялық-әдістемелік орталық директорының міндетін атқарушы Айнур Исабаева:
Біздің облысымыздағы білім беру ұйымдарының 80%-ға жуығы ауылдық елді мекенде орналасқан. Сол мекемелерде қызмет етіп жатқан педагогтеріміз білім алушыға тек тәрбие мен білім үйретіп қоймай, бүкіл ауыл тұрғындарына үлгі-өнеге, тәлім-тәрбие беріп отыр деуге болады. Қазіргі күні облысымыздағы ауылдық елді мекендегі білім беру ұйымдарында 7000-ға жуық педагог жұмыс істейді. Оның ішінде: 0,3 % – педагог-шебер, 18,2 % – педагог-зерттеуші. Бұл, әрине, ойландыратын жағдай.

Биыл бірінші рет өткізіліп отырған конкурс педагогтердің кәсіби шеберлігін дамытуға ықпал етуде, озық педагогикалық тәжірибелерді анықтауда маңызы зор.

Конкурс нәтижесі бойынша Аягөз ауданынан қазақ тілі мен әдебиеті пәні мұғалімі Айнаш Узбекова жүлделі 1-орын иеленді, 2-орынды Жарма ауданынан математика пәні мұғалімі Нурсейіт Оразақынұлы мен Семей қаласы информатика пәні мұғалімі Бессуднова Марина алса, 3-орын Бородулиха ауданындағы информатика пәні мұғалімі Николай Громов пен Үржар ауданы математика пәні мұғалімі Гаухар Жағалбаеваға бұйырды.

Айта кетейік, Мемлекет басшысының ауыл мектептерін дамыту тапсырмасын іске асыру шеңберінде білім беру сапасын арттыруға бағытталған іс-шаралар жоспары қабылданып, «Ауыл мектебі» ауылдық мектептерді дамыту тұжырымдамасы әзірленді. Елімізде ауыл мектептерінің оқушыларына арналған жалпы білім беретін пәндер бойынша бірінші Республикалық олимпиада бастау алды. «Тірек мектебі-магнитті мектептер» жобасы жүзеге асырылуда.

Ауылдық елді мекендегі білім беру ұйымдарындағы жаңашыл педагог моделін әзірлеу мақсатында ұйымдастырылған конкурс енді өңірде жыл сайын өткізіледі.