2019 жылғы 26 сәуірде Нұр-Сұлтан қаласында қауымдастықтың бастамасы бойынша психобелсенді заттарды асыра пайдалану профилактикасының озық бағдарламаларын талқылау бойынша дөңгелек үстел өткізілді.
АҚШ-тың Қазақстан Республикасындағы Елшілігімен бірлесіп, ІІМ-мен ұйымдастырылған дөңгелек үстел жұмысына жергілікті атқарушы органдардың өкілдері, аумақтық есірткі қылмысына қарсы іс-қимыл бөліністерінің қызметкерлері, нашақорлық профилактикасы мәселелерімен айналысатын үкіметтік емес ұйымдардың басшылары қатысты.
Қатысушылар психобелсенді заттардың жаңа буынын тарату халық денсаулығына, ел экономикасына, құқықтық тәртіпке және мемлекеттің қауіпсіздігіне айтарлықтай қауіп туғызатынын атап өтті.
Іс-шара барысында Қарағанды және Өскемен қалаларында өткізілген CADKA пилоттық жобасының тұсау кесері ұсынылды. Жоба жергілікті басқару органдары мен полицияның мүмкіндіктерін ғана емес, жастар мен үкіметтік емес секторды тарта отырып жекелеген өңірде жүйелі профилактикалық жұмысты қалыптастыруды меңзейді. Бұндай ұстаным өңірдің қаржылық қаражатын тиімді пайдалануға, барлық қатысушы тараптардың мүддесін арттыруға, бағдарламаны іске асыруға қатысатын тараптар арасында жақын ынтымақтастық орнатуға мүмкіндік береді.
Дөңгелек үстел соңында Нұр-Сұлтан, Алматы қалаларының, Павлодар және Солтүстік Қазақстан облыстарының әкімдіктеріне астанамызда және Алматы, Павлодар, Петропавл қалаларында оны іске асыру мүмкіндігін қарастыру туралы ұсыныс қабылданды.
Қазақстан Республикасы ІІМ Баспасөз қызметі
Еліміздің аумағында қоғамдық тәртіпті қамтамасыз ету, атыс қаруын қолдану арқылы жасалатын қылмыстардың жолын кесу мақсатында биылғы жылғы 10 сәуірде халықтан заңсыз айналымдағы атыс қаруларын, оқ-дәрілер мен жарылғыш заттарды сатып алу акциясы басталған болатын.
Қару-жарақтар мен оқ-дәрілерді қабылдау әр аймақтағы полиция органдарында жүргізілуде.
Республикалық бюджеттен осы мақсатқа «Заңсыз сақталған қаруды, оқ-дәрілерді және жарылғыш заттарды ерікті түрде өтемді тапсыруды ынталандыру» бюджеттік бағдарламасы бойынша 100 млн. теңге қаржы бөлінді.
Қауіпсіздік мақсатында және жазатайым оқиғалардың алдын алу үшін жарылғыш заттар мен құрылғыларды тасымалдауға, ұстауға, бұл заттармен қандай да бір әрекеттер жасауға тыйым салынады (сұйықтық құюға, топырақпен көмуге, бетін жабуға, жанында тұрып элеткро-радио аппаратурасын қолдануға, оған температуралық, дыбыстық, механикалық, магниттік әсер етуге болмайды, жарықтың түсуін өзгертуге, темекі шегуге, мобильді байланысты қолдануға болмайды ).
Егерде азаматтар зарлығыш заттар мен құрылғыларды тауып алған жағдайда 102 немесе 112 телефон нөмерімен полиция бөлінісіне хабарлау қажет.
Қазіргі уақытта азаматтар 998 бірлік атыс қаруын ерікті түрде тапсырды, оның ішінде 116 бірлік ұзын ұңғылы қару, 5 бірлік шолақ ұңғылы қару (тапанша), 869 бірлік тегіс ұңғылы қару, 8 бірлік травматикалық қару мен 32 мыңнан астам оқ-дәрі алынды.
Өз еркімен атыс қаруын, оқ-дәрілер мен жарылғыш заттарды тапсырған азаматтар қылмыстық және әкімшілік жауапкершіліктен босатылады.
ІІМ азаматтарды аталған акцияға атсалысуға шақырады.
Қазақстан Республикасының Ішкі істер министрлігі
Ішкі істер министрлігі халықаралық тәжірибе негізінде ішкі істер органдары қызметкерлерін кәсіби тұрғыдан дайындаудың жаңа жүйесін әзірлеп, енгізген болатын.
Қарағанды академиясы базасында арнайы тактикалық, атыс қаруларынан оқ ату және дене дайындығы бойынша жаттығулар енгізілген біліктілікті көтеру апталығы ұйымдастырылып өткізілуде.
Қазіргі уақытта академия базасында қылмыстық атқару жүйесі мекемелері басшылары орынбасарларының оқу-жаттығу жиыны өткізілуде. Жиын барысында олар өздерінің дайындық деңгейін көтеруге мүмкіндік алады.
Мәселен, қызметкерлер денеге түсетін ауырлық, психологиялық жүктемелер кезінде бронежилетпен қысқа қашықтықта жылдамдыққа атуға үйренеді.
Жиын соңында қатысушылар сынақ тапсырады. Өткен жылы оқу-жаттығу жиындары шеңберінде 18 мыңнан астам, ал ағымдағы жылы 3 мыңға жуық қызметкер дайындықтан өтті.
Дайындықтың жаңа жүйесін енгізгеннен бері полиция жасақтары әртүрлі жағдайларда қару мен арнайы құралдарды кәсіби сауатты қолдану нәтижесін көрсетуде.
Бұл жүргізіліп жатқан жұмыстардың тиімділігін көрсетеді.
Қазақстан Республикасы ІІМ-нің Баспасөз қызметі
Президент Әкімшілігінің келісімен Нұр-Сұлтан қаласының Полиция департаментінің бастығы лауазымына полиция полковнигі Сәденов Ержан Сапарбекұлы тағайындалды.
Полиция департаментінің жаңа бастығын жеке құрамға Ішкі істер министрі Ерлан Тургумбаев қала әкімі Бақыт Сұлтановпен бірге таныстырды.
Е.С. Сәденов 1968 жылы Шығыс Қазақстан облысында туған. С. Аманжолов атындағы Шығыс Қазақстан мемлекеттік университетін, Қарағанды қаласындағы Қазақстан Республикасы ҰҚК-нің жоғарғы мектебін тәмамдаған.
Ішкі істер органдарында 1993 жылғы шілдеден бастап орта және аға басқарушы құрамның әртүрлі жедел лауазымдарында қызмет атқарған. Басшылық лауазымдардағы тәжірибесі мол.
Әр жылдары Риддер, Өскемен қалалары полиция басқармаларының, Шығыс Қазақстан облысы Полиция департаментінің Есірткі бизнесіне қарсы күрес басқармасының бастығы, Маңғыстау облысының Полиция департаменті бастығының бірінші орынбасары, ІІМ Жедел департамент бастығы, Көліктегі Полиция департаментінің бастығы болып қызметті етті.
2016 жылғы маусымнан бастап Қазақстан Республикасы Ішкі істер министрлігі Ақмола облысының Полиция департаментінің бастығы лауазымын атқарды.
Қазақстан Республикасы ІІМ Баспасөз қызметі
Қазақстан Республикасы Ұлттық ұланы Бас қолбасшылығының және елордамыздағы 5573 әскери бөлімінің жеке құрамы аттестациялықтан сынақ тапсыруды бастады. Естеріңізге сала кетейік, бұған дейін Ішкі істер министрі 2019 жылы ішкі істер органдарының қызметкерлерін түгелдей дерлік аттестациядан өткізуді бұйырған болатын.
Таяуда ғана Мемлекет басшысының қатысуымен өткен ІІМ алқа отырысында құқық қорғау органдарындағы реформалық жұмыстарды жалғастыра Қасым-Жомарт Тоқаев та міндеттеген болатын.
Ұлттық ұландағы бұл сынақтар – жауынгерлік қызмет сапасын арттыруды, білікті мамандардан толыққанды кадрлық резерв құруды, әр әскери қызметшінің іскерлік, тұлғалық және жеке қасиеттерін жан-жақты әрі әділ бағалауды, олардың квалификациялық талаптар мен өз лауазымынына лайықтылығын анықтауды көздеп отыр.
Аттестацияның алғашқы күнінде Бас қолбасшылықтың офицерлері мен келісімшарт әскери қызметшілері әскердің елорда сыртындағы «Қаптағай» оқу орталығында өздерінің ату шеберліктерін көрсетті. Сондай-ақ, Бас қолбасшылықтың спорт залында түрлі нормативтер бойынша спорттық дайындықтары да сыналды. Тәуліктің екінші жартысында ұландықтар Әскерді басқару орталығында басшылық құжаттар бойынша білімдерін көрсету үшін тест тапсырды.
Аталмыш сынақ үш күнге созылмақ. Алдағы күндері жетекші психолог-мамандар құқықтық тәртіп әскері Бас қолбасшылығында қызмет атқаратындардың жауынгерлік міндеттерді орындауға психологиялық тұрғыдан қаншалықты дайын екендіктерін тексереді. Бұдан бөлек Қазақстан Республикасының Конституциясы мен заңнамаларнан да арнайы тесттер тапсырылмақ.
ҚР Ұлттық ұланының баспасөз қызметі
Президент Әкімшілігінің келісімі бойынша Ақмола облысының Полиция департаментінің бастығы лауазымына полиция генерал-майоры Біләлов Берік Сұлтанғазыұлы тағайындалды.
Департаменттің жаңа бастығын жеке құрамға Ішкі істер министрінің орынбасары Алексей Калайчиди облыс әкімі Ермек Маржықбаевпен бірге таныстырды.
Б.С. Біләлов 1963 жылы дүниеге келген. Қазақстан Республикасы ІІМ-нің Қарағанды жоғары мектебін тәмамдаған.
Ішкі істер органдарында 1990 жылдан бастап орта және жоғары басшылық құрамда қызмет етіп келеді.
Солтүстік Қазақстан облысының Полиция департаменті бастығының бірінші орынбасары, ІІМ Криминалдық полиция комитеті төрағасының орынбасары, төрағасы, ТМД аумағында ұйымдасқан қылмысқа және өзге де қылмыс түрлеріне қарсы күресті үйлестіру жөніндегі бюроның уәкілетті өкілі (Мәскеу қаласы), ІІМ Штаб-департамент бастығы болып жұмыс істеді.
2014 жылғы қыркүйектен бастап Солтүстік Қазақстан облысының Полиция департаментін басқарды.
Ержан Сәденов берген рапортына сәйкес облыстық полиция департаменті бастығының лауазымынан босатылды және Ішкі істер министрі Е.Тұрғымбаевтың бұйрығымен Нұр-Сұлтан қаласының Полиция департаментінің бастығы болып тағайындалды.
Қазақстан Республикасы ІІМ баспасөз қызметі
Бүгін кадрлық қамтамасыз ету директорының міндетін атқарушы генерал-майор Салем Шахин Альнуаими бастаған Абу-Даби қаласы полициясының делегациясы ҚР Ұлттық ұланының қоғамдық тәртіп пен қауіпсіздікті қамтамасыз ету мәселесі, сондай-ақ, ведомства жұмысының басқа да бағыттары бойынша тәжірибе алмасу үшін Нұр-Сұлтан қаласына келді.
Ұлттық ұлан Бас қолбасшысылығында делегацияны ҚР Ұлттық ұланының Бас қолбасшысы генерал-лейтенант Руслан Жақсылықов қарсы алды. Артынша екі тараптың қатысуымен брифинг өтті.
Руслан Жақсылықов брифинг барысында келген қонақтарға Ұлттық ұланның құрылу мен қалыптасу тарихы, құрылымы мен негізгі тапсырмалары әңгімелеп берді. Сонымен қатар, басқа да сауалдарға жауап берді.
Делегация басшысы генерал-майор Салем Шахин Альнуаими, Қазақстаннның құқықтық тәртіп әскеріне жүктелген міндет БАӘ полициясының міндеттерімен салыстырғанда анағұрлым кең екенін тілге тиек етті. Сондай-ақ, қонақтар Ұлттық ұланнның әлемдегі тоғызыншы орындағы мемлекетте ішкі тәртіп пен қауіпсіздікті қалай қамтамасыз ететіні туралы сұрады.
- Біздің кәсіби даярлық деңгейіміз бұл міндеттерді өзімізге қамтаамсыз етуге мүмкіндік береді. Ішкі істер органдарымен бірлесе біз еліміздің 19 қаласында қоғамдық тәртіп пен қауіпсіздікті қамтамасыз етеміз. Басқа мемлекеттердің тәжірибесіне де жүгінеміз. Өзге елдердің заңнамаларын зерттейміз. Ұлттық ұлан көптеген осындай құрылымдармен ықпалдастық жүргізеді. Бізде Түркияның әскери-оқу орындарында әскери кадрларды оқыту және дайындау саласы бойынша Түркия Жандармериясымен бауырмалдық қарым-қатынас орнатылған. Қоғамдық қауіпсіздік мәселесі бойынша Ресей Федерациясы Федералды қызметі Ұлттық ұлан әскері, Әзірбайжан ІІМ Ішкі әскерлері, АҚШ Қарулы күштерімен ынтымақтастық белсенді түрде жалғасып келеді. Біз ел ішіндегі тұрақтылықты сақтау мәселесінде тәжірибе алмасуға әр кезде дайынбыз, - деп атап өтті генерал-лейтенант Руслан Жақсылықов.
Бұдан бөлек ол, Ұлттық ұлан Тәжікстан мен Қырғыз Республикалары үшін әскери кадрларды дайындайтынын сөз етті. Брифинг соңында Руслан Жақсылықов ҚР Ұлттық ұланы мен Абу-Даби қаласы полициясының арасындағы қызметтік-жауынгерлік мәселелер бойынша халықаралық ынтымақтастық пен өзара ықпалдастыққа қосқан үлесі үшін делегация мүшелеріне естелік белгілер табыс етті.
Содан кейін, меймандар Бас қолбасшылықтың әскермен басқару Орталығын аралап, оның жедел ақпаратты өңдеу мен жинаудағы техникалық мүмкіншіліктерімен, сондай-ақ, заманауи басқару жүйесімен танысты.
Кейінде, Ұлттық ұлан Бас қолбасшылығынгың аумағындағы «Достық аллеясында » дәстүрлі ағаш отырғызу рәсімі өтті. Түстен кейін арабтық делегация елордалық 5573 әскери бөлімінде болып, кинология орталығы, әскери қару-жарақ, техника көрмесін тамашалады. Қонақтар бригаданың тыныс-тіршілігімен және басқа да нысандармен танысты.
23-24 сәуірде делегация «Оңтүстік» өңірлік қолбасшылығының және Ұлттық ұлан арнайы отрядтарының жауынгерлік және әдістемелік дайындық Орталығының қызметімен танысады.
ҚР Ұлттық ұланының баспасөз қызметі
Ішкі істер министрлігінде Қазақстан Республикасы Ішкі істер министрінің бірінші орынбасары Марат Қожаев Абу-Даби қаласы полициясының кадрлық қамтамасыз ету директорының міндетін атқарушы Салем Шахин Әльнуаими бастаған Абу-Даби қаласының полиция делегациясымен, сондай-ақ Біріккен Араб Әмірлігінің Қазақстан Республикасындағы Төтенше және Өкілетті елшісі Мухаммед әл-Жабермен кездесті.
Кездесу барысында тараптар Қазақстан мен Әмірліктің қылмыспен күрес және қоғамдық тәртіпті күзету саласындағы ынтымақтастықтың қазіргі жағдайы мен болашағы туралы ой бөлісті.
Кездесу өзара түсіністік пен конструктивті диалог аясында өтті.
Қазақстан Республикасы ІІМ Баспасөз қызметі
Ішкі істер министрлігі Қоғамдық кеңесінің көшпелі отырысы ҚР ІІМ тарихында алғашқы рет өңірде, яғни Петропавл қаласында өтті.
Көшпелі отырысты өткізу алаңы Солтүстік Қазақстан облысының Полиция департаменті болып табылды, оның жанында консультативтік-кеңесші орган белсенді жұмыс жасауда. ККО мүшелері көп жылдан бері полицейлермен тығыз қарым-қатынас үстінде және олардың қызметінің проблемалары мен жақсы жақтарын жақсы біледі.
Қоғамдық кеңестің төрағасы Марат Қоғамов бастаған елордалық жұртшылық солтүстікқазақстандық полицейлердің жұмыс барысында пайдаланатын құралдары және техникасымен танысты. Жедел басқару орталығына, арнайы мұрағатқа, ПД музейі мен жатақханасына экскурсия ұйымдастырылды. Петропавл қ. ПБ фронт-офисінде, кезекші бөлімінде болды. ҚР ІІМ Қоғамдық кеңесінің көшпелі отырысына СҚО әкімінің орынбасары Антон Федяев, облыстық мемлекеттік органдардың бірінші басшылары, жұртшылық, блогерлер және журналистер қатысты. СҚО Полиция департаменті және «Алтын-Бесік» мектепке дейінгі мекемесінің бірлескен жобасы аясында бөбектер қонақтарға өздерінің IT-идеяларын: болашақтағы жолдарда қылмыс пен құқық бұзушылықтардың алдын алу бойынша құрастырылған электронды құрылғылары мен аспаптарын көрсетті.
СҚО ПД бастығы полиция генерал-майоры Берік Біләлов отырысты аша отыра, ашықтық пен сервистік моделін көздейтін ІІО жұмысын жаңғыртуда жұртшылық пен халықтың пікіріне ерекше көңіл бөлінетінін және осы жұмысты ретке келтіру - көшпелі іс-шараның міндеттерінің бірі екенін атап өтті.
«Бүгінгі таңда полиция жұмысының басты көрсеткіштерінің бірі фронт-офистер қызметінің тиімділігі. Полицияға жүгінген адам ғимаратқа кірер-кірместе кез-келген мәселе бойынша білікті көмек алуы тиіс. Осы тұста петропавлдық полицейлердің фронт-офисі былтырғы жылдың күзінде есігін айқара ашты», - деді ІІМ Қоғамдық кеңесінің төрағасы Марат Қоғамов.
Қазіргі уақытта 16 фронт-офис, оның ішінде 13-і аудандық полиция бөлімінде, 3-і Петропавл қ. жұмыс істейді.
Арнайы баспасөз-конференциясы барысында Қоғамдық кеңес мүшелері азаматтық қоғаммен ашық диалог жасау - қауіпсіздікті қамтамасыз ету бойынша жұмыс тиімділігін арттыратынын атап өтті. Қазақстан Адвокаттар Одағының президенті Әнуар Түгелдің айтуынша, мемлекеттегі тұрақтылықты сақтауда, полиция қызметкерлерінің әлеуметтік қамтамасыз етілуі маңызды. Сондай-ақ, ол 2 жыл бұрын СҚО ПД бастығының бастамасымен солтүстікқазақстандық полицейлер үшін ашылған жатақхана қызметкерлердің тұрғын үй проблемасын шешетінін атап өтті. Ведомстволық жатақханада 50 полицейлік отбасы тұрады.
Адвокат өз сөзінде, оң тәжірибе ретінде СҚО ПД бастығы полиция генерал-майоры Берік Біләловтің халықпен өткізген жеке кездесулерін атап өтті, Департамент басшысы 200 елді мекенге барды. Осындай ашық дилогтар - азаматтардың мәселелері туралы хабардар болуға және оларды жедел шешуге көмектеседі.
СҚО ПД бастығы полиция генерал-майоры Берік Біләлов жаңғыртумен қатар, криминал мен құқық бұзушылық профилактикасына да басымды көңіл бөлінетінін атап өтті: облыста 1204 бейнекамера жұмыс істейді, оның көмегімен жыл басынан 272 қылмыс ашылып, 3700 аса әкімшілік құқық бұзушылық анықталды. Биыл электрондық форматта 367 қылмыстық іс аяқталып, 2 мыңға жуық әкімшілік хаттама толтырылды.
Биылғы жылы ішкі істер органдарын жаңғырту шеңберінде жеке құрам 10%-ға қысқартылды, бұл 260 бірлікті құрады. Сонымен қатар, бірқатар бөлімдер мен бөлімшелер басшыларының лауазымдары қысқартылды. Патрульдік полиция саптық бөліністерінің кіші басшы құрамын орта басшы құрамға ауыстыру бойынша шаралар қабылдануда.
ІІО-да өткізілетін барлық іс-шараларға Консультативтік-кеңесші органның белсенді қатысуы - полицияның жұмысын ашық етеді. Бұл халық алдындағы есеп беру кездесулері, азаматтарды қабылдау, тәртіптік және аттестациялық комиссиялар, отырыстар болып табылады. Осы жұмыстың нәтижесі туралы СҚО ПД жанындағы ККО төрағасы Жасұлан Ахметов есеп берді.
СҚО ПД баспасөз қызметі
Жамбыл облысының Қордай ауданындағы қайғылы жол оқиғасында 8 адам қаза тапты, 32 адам медициналық мекемелерге жеткізілді, олардың ішінде тағы үшеуі алған жарақаттарынан қайтыс болды.
Жол-көлік оқиғасында 11 қаза тапқандардың ішінде 7 – Қазақстан азаматы, 3 – Өзбекстан азаматы болғаны анықталды, бір адамның қай елдің азаматы екендігі әзірге анықталуда. Ауруханаға жеткізілген жарақаттанғандар арасында қазақстандықтар, Өзбекстан және Тәжікстан азаматтары бар.
Еске саламыз, облыста жедел штаб жұмыс істейді, психологтар кезекшілігі қосылған «қауырт желі» +7(7262)513575 және +7(7262)514167 құрылды.
Жол-көлік оқиғасы бойынша ҚР Қылмыстық кодексінің 345-бабы 4-бөлігі бойынша сотқа дейінгі тергеу басталды (көлік басқарған адамның екі немесе одан көп адам өліміне әкеп соққан жол қозғалысы тәртібін немесе көлікті пайдалану ережесін бұзуы). Бірқатар сараптамалар тағайындалды.
Қазақстан Республикасы ІІМ Баспасөз қызметі