Алматы қаласындағы 28 гвардиялық-панфиловшылар атындағы саябақта Қазақстан Республикасы Қорғаныс министрлігі Радиоэлектроника және байланыс әскери-инженерлік институты курсанттарының 25-ші мерейтойлық оқуды аяқтау рәсімі салтанатты түрде өтті.
Институттың 70-тен астам түлегіне алғашқы офицерлік «лейтенант» әскери атағы берілді. Олардың қатарында ҰҚШҰ-ға мүше елдерге әскери кадрлар даярлау жөніндегі мемлекетаралық бағдарлама аясында білім алған Қырғызстан Республикасының екі әскери қызметшісі де бар.
Салтанатты рәсімге Қорғаныс министрлігінің, Қарулы күштер Әуе қорғанысы күштері бас қолбасшылығының өкілдері, ардагерлер, институттың профессорлық-оқытушылық құрамы, оған қоса түлектердің ата-аналары мен жақындары қатысты.
Жас офицерлерге ҚР Қорғаныс министрлігі Әскери білім және ғылым департаментінің бастығы полковник Мұрат Олжабаев ақ тілегін жеткізді.
– Институт қабырғасында алған білімдерің еліміздің әуе кеңістігінің қауіпсіздігін қамтамасыз етудің және әскеріміздің технологиялық дамуының берік іргетасы боларына сенемін. Қай жерде қызмет атқарсаңдар да, офицерлік ар-намыс, Әскери антқа деген адалдық және қоластындағы жеке құрамға қамқорлық басты ұстанымдарың болсын, – деп атап өтті ол.
Түлектер орындаған офицерлік вальс мерекелік кештің сәнін кіргізе түсті. Вальс аяқталғаннан кейін жас лейтенанттардың бірі сүйіктісіне үйленуге ұсыныс жасап, бойжеткен көпшіліктің зор қошеметімен келісімін берді.
Жауынгерлік дәстүрге сай салтанатты рәсім соңы түлектердің институттың Жауынгерлік Туымен қоштасуымен аяқталды. Әскери оркестрдің сүйемелдеуімен жас лейтенанттар салтанатты маршпен жүріп өтті.
Ширек ғасыр ішінде Радиоэлектроника және байланыс әскери-инженерлік институты төрт мыңнан астам офицерді даярлап шығарды. Бүгінде оның түлектері Қарулы күштерде, басқа да әскерлер мен әскери құралымдарда қызмет атқарып, еліміздің қорғаныс қабілеті мен әуе кеңістігінің қауіпсіздігін қамтамасыз етуге өз үлестерін қосып келеді.
Біріккен Ұлттар Ұйымының бөлінген аймақты бақылау жөніндегі күштерінің (UNDOF) қолбасшысы генерал-майор Анита Асма жеке құрамның кезекті ротациясынан кейін Голан жоталарында қызмет атқарып жатқан қазақстандық бітімгерлік контингент орналасқан ауданға барды.
Сапар барысында ол қазақстандық әскери қызметшілердің қызметті ұйымдастыру тәртібімен танысып, инфрақұрылым нысандарын, инженерлік техниканы, жедел басқару құралдарын қарап шықты. Сондай-ақ миссияның жауапкершілік аймағындағы БҰҰ-ның бақылау бекеттерінде болды. Генерал-майор Анита Асма ұлттық бітімгерлік контингенттің жеке құрамымен кездесіп, әскери қызметшілермен әңгімелесті. Кездесу барысында қауіпсіздікті қамтамасыз ету, қызметті ұйымдастыру, сондай-ақ атысты тоқтату режимін сақтау мен бөліну аймағын бақылау жөніндегі міндеттерді одан әрі орындау мәселелері талқыланды.
XII Халықаралық «Айбын-2026» әскери-патриоттық жастар жиыны жеңімпаздарының соңғы сынағы «Күшіміз бірлікте» әскери-тактикалық ойыны болды.
Бас кубок жолында халықаралық есепте көш бастаған Астана қаласының Сағадат Нұрмағамбетов атындағы Әскери колледж командасы бағын сынады. Облыстар мен республикалық маңызы бар қалалардың атынан Жетісу облысының «Жетісу тарландары» әскери-патриоттық клубының тәрбиеленушілері қатысты. Ал Қарулы күштер, басқа да әскерлер мен әскери құралымдардың әскери-патриоттық клубтары атынан «Оңтүстік» өңірлік қолбасшылығының «Оңтүстік арландары» әскери-патриоттық клубының мүшелері, әскери оқу орындарының атынан Шымкент қаласының Сабыр Рақымов атындағы Әскери колледждің командасы өнер көрсетті.
Ойын таңғы ерте дабылмен басталды. Дәл сағат 7-де «Амандық» полигонында жауынгерлік дабыл қағылып, командалар далалық жағдайда әскер таңғы асын ішіп, күш жинауға бастапқы ауданға жедел аттанды.
Сапта бас төреші қатысушыларға тактикалық жағдайды, ойынның қатаң ережелері мен күрделі марш-жүгіру кезіндегі қауіпсіздік талаптарын түсіндірді. Командирлер жауынгерлік бұйрық салынған пакеттерді алған соң, «Алға!» пәрмені берілді.
Газтұмылдырық, су құтысы, компас, санитарлық сөмке және автомат макетімен жарақтанған жас сарбаздар барынша шынайы жағдайға жақындатылған тапсырмаларды орындауға кірісті.
Арақашықтығы 2,5 шақырым болатын бағыт қатысушылардың төзімділігіне, психологиялық беріктігіне және командалық бірлігіне үлкен сынақ болды. Тапсырмалар неғұрлым жинақылықты, бар күш-жігерді жұмылдыруды және үйлесімді іс-қимылды талап етті.
Жас патриоттар азимут бойынша бағдарлап жүріп өтіп, шартты жараланған жауынгерді эвакуациялады, автокөлік дөңгелектерінен жасалған бөгеттерді еңсеріп, миналы-жарылғыш және жарылғышсыз кедергілерден өтті. Бұдан бөлек жеке қорғаныс құралдарын пайдалана отырып, шартты түрде залалданған аумақтан өтті.
Тапсырмаларды орындау барысында әрбір сәт шешуші рөл атқарып, нәтижені команданың ұйымшылдығы, өзара қолдауы мен жауынгерлік рухы айқындады.
Тартысты додада Астана қаласының Сағадат Нұрмағамбетов атындағы Әскери колледжінің командасы жеңіске жетті. Олар 2,5 шақырымдық қашықтықты 26 минут 30 секундта еңсеріп, мәреге бірінші болып жетіп, көрермендердің ыстық ықыласына бөленді.
Екінші орынды 37 минут 40 секунд нәтижемен Сабыр Рақымов атындағы Әскери колледждің командасы иеленді. Ал «Оңтүстік» өңірлік қолбасшылығының «Оңтүстік арландары» құрамасы 57 минутта мәреге жетіп, қола жүлдегер атанды.
Ойын қорытындысы шығарылғаннан кейін Арнайы операциялар күштері мен Десанттық-шабуылдау әскерлерінің әскери қызметшілері әсерлі тактикалық-имитациялық көрініс көрсетті. Бұдан соң Әуе қорғанысы күштерінің әскери ұшқыштары Су-30СМ жойғыш ұшақтары мен ЕС-145 тікұшақтарында жоғары пилотаж элементтерін орындап, көпшілікке тамаша әуе шоуын тарту етті.
Қазақстан Республикасының Қарулы күштерінде әскери қызметшілердің қауіпсіздігін арттыруға, әскери тәртіпті нығайтуға және құқық бұзушылықтардың алдын алу жүйесін жетілдіруге бағытталған заманауи цифрлық технологияларды енгізу жұмыстары жалғасып жатыр.
Осы бағыттағы перспективалы жобалардың бірі – жасанды интеллект элементтері бар интеллектуалды бейнеаналитика жүйелерін қолдану. Жаңа технологиялар әскери бөлімдердегі ахуалды тәулік бойы бақылауға, ықтимал қауіпті жағдайларды дер кезінде анықтауға, белгіленген тәртіптің бұзылуын тіркеуге және тиісті шаралар қабылдау үшін жауапты лауазымды тұлғаларды жедел хабардар етуге мүмкіндік береді.
Әскерде әскери қызметшілердің қауіпсіздігін қамтамасыз ету мәселесіне ерекше көңіл бөлінеді. Әскери бөлімдерге келген мерзімді әскери қызметшілері жас жауынгер курсынан және әскери қызмет жағдайларына бейімделу бағдарламасынан өтеді. Жеке құрамның психологиялық жай-күйін анықтауға арналған диагностикалық тексерулерді әскери психологтар тұрақты түрде жүргізіп отырады. Сондай-ақ әскери қызметшілердің моральдық-психологиялық жағдайына тұрақты мониторинг жасалады.
Әскери бөлімдерде бейнебақылау жүйелері мен әскери полиция пункттері жұмыс істеп, күн сайын профилактикалық іс-шаралар өткізіледі. Мерзімді қызмет сарбаздарына телефон байланысы және «Отбасымен бейнеқоңырау» сервисі арқылы туыстарымен тұрақты байланыс орнатуға мүмкіндік берілген.
Әскердегі құқық бұзушылықтар мен төтенше жағдайлардың алдын алу мақсатында «Қатарлас», «Пирамида» және «Жауынгерлік дос» цифрлық бақылау және мониторинг жүйелері, сондай-ақ құқық бұзушылықтар мен жеке құрамның қаза болуын болдырмауға бағытталған алгоритмдер кешені қолданылады.
Құқықтық тәртіпті сақтауда командирлер мен сержанттық құрамның рөлі ерекше. Олар әскери ұжымдарды басқару, тәртіпті нығайту және жанжалды жағдайлардың алдын алу мәселелері бойынша арнайы даярлықтан өтеді.
Әскери қызметшілердің құқықтарының сақталуын бақылау ата-аналар комитеттерімен және Сарбаз аналары комитетімен өзара іс-қимыл аясында жүзеге асырылады. Ақпарат алмасуды жеделдету мақсатында әскери бөлім командирлерінің қатысуымен ата-аналар чаттары құрылған.
Бұдан бөлек, «Цифрлық алдын-алу» ведомствоаралық бағдарламасы аясында Қорғаныс министрлігі әскери қызметшілердің QR-код арқылы өтініш беру жүйесін енгізді. Жаңа сервис әскери қызметшілердің құқықтарын қорғаудың қосымша тетігін қамтамасыз етіп, «Заң және тәртіп» қағидатын нығайтуға ықпал етеді.
Азаматтар мен әскери қызметшілердің өтініштеріне жедел әрекет ету мақсатында Қарулы күштердің Бас әскери полиция басқармасында +7 (7172) 72-11-66 нөмірі бойынша бірыңғай «Жедел желі» Call-орталығы жұмыс істейді.
Цифрлық шешімдер мен заманауи технологияларды кезең-кезеңімен енгізу әскери қызмет өткерудің қауіпсіз ортасын қалыптастыруға, профилактикалық жұмыстардың тиімділігін арттыруға және Қазақстан Қарулы күштерінің одан әрі дамуына оң ықпал етеді.
Ақмола облысындағы «Амандық» полигонында XII Халықаралық «Айбын-2026» әскери-патриоттық жастар жиыны жалғасып жатыр.
Жарыс барысында қатысушылар өздерінің күш-қуатын, төзімділігі мен жылдамдығын көрсетіп, нағыз қайсар мінез танытты. Ең тартысты кезеңдердің бірі арқан тарту сайысы болды. Тәжірибе көрсеткендей, бұл жарыста жеңіске жету үшін бір қара күш жеткіліксіз. Мұнда командалық үйлесім, бірлік пен дұрыс тактика шешуші рөл атқарады.
Халықаралық санаттағы финалдық бәсекеде Қазақстан мен Қырғызстан құрамалары кездесті. Тартысқа толы шешуші сайыста Астанадағы Сағадат Нұрмағамбетов атындағы Әскери колледждің кадеттері жеңіске жетті.
– Бұған дейінгі «Айбын» жиындарында біз осы сайыс түрінен тұрақты түрде екінші немесе үшінші орын алып жүрдік. Ал бүгін қолдан келгеннің бәрін жасадық. Біз үшін Қазақстанның абыройын асқақтатып, әскери-патриоттық клубтардың жас тәрбиеленушілеріне үлгі көрсету маңызды болды, – деді жеңістен кейін эмоциясын жасыра алмаған ұлттық құраманың капитаны Сағынай Сағанбек.
Сол күні полигонда әскери эстафета да өтті. Қарқынды жарыс қатысушылардан жоғары деңгейлі шоғырлану, жылдам әрекет ету мен командалық үйлесімді талап етті.
Жарыс шарты бойынша әр командадан бес қатысушы кезекпен 25 метрлік қашықтықты еңсерді. Әрқайсысы автоматты бөлшектеу және жинақтау, әскери жарақты кию, салмағы 15 келі болатын оқ-дәрі жәшігін тасымалдау, тікенекті сым астымен еңбектеп өту және садақ ату секілді тапсырмаларды орындады.
Күннің екінші жартысында спорттық тартыс Щучинск қаласындағы Олимпиадалық даярлық орталығында жалғасты. Мұнда жүзу жарыстары өтті. Өз командаларының намысын қорғаған қатысушылар әр секунд үшін күресті. Бұл сайыста дұрыс тыныс алу, жүзу техникасы және эстафетаны жоғары жылдамдықпен тапсыру шеберлігі маңызды рөл атқарды.
Ауқымды шара өз мәресіне жақындап келеді. Дегенмен ұйымдастырушылардың басты жетістігі ретінде қатысушылар арасында қалыптасқан достық, өзара құрмет пен сауатты бәсекелестік атмосферасын атауға болады.
– «Айбын» жиынына қатысу үшін Қазақстанға алғаш келуім. Әсерім өте жақсы. Мұнда ерекше достық пен өзара сыйластықты сездім. Бірнеше күннің ішінде әртүрлі елден келген жастармен достасып үлгердік. Эстафета біз үшін қиын болған жоқ. Себебі өз елімізде осындай кедергілер жолағынан өтуді мұқият жаттықтырдық. Сондықтан жарыс барысында өзімізді сенімді сезініп, жақсы нәтиже көрсеттік, – деді Қырғыз ұлттық әскери лицейінің тәрбиеленушісі Әжібек Рысқұлов.
Айта кетейік, қатысушылардың шеберлігін сынайтын басты кезең – «Күшіміз бірлікте» әскери-тактикалық ойыны болады. Алайда қазірдің өзінде бұл жиынның ең маңызды нәтижесі кубоктар мен медальдар ғана емес, ортақ сынақтар мен адал бәсекеде шыңдалған берік достық екені анық.
Қазақстан Республикасы Қорғаныс министрлігінің Шоқан Уәлиханов атындағы Әскери колледжінің «Амандық» полигонында өтіп жатқан XII Халықаралық «Айбын-2026» әскери-патриоттық жастар жиыны аясындағы жарыстар қыза түсті.
Ұлдар арасында турникте тартылу, қыздар арасында денені шалқасынан жатып көтеру сайыстары, сондай-ақ Smart Sarbaz байқауы мен «Айбын дарыны» зияткерлік ойыны аяқталды.
Жарыстың ең әсерлі әрі күрделі кезеңдерінің бірі – әскери кросс болды. Әр командадан төрт қатысушы бір шақырымдық қашықтықты еңсерді. Сонымен қатар олар граната лақтырып, үш оқпен 10 метр қашықтықтан нысананы көздеді.
Бұл әскери-қолданбалы сайыста Өзбекстанның «Ватан таянчи» әскери-патриоттық қозғалысының өкілдері ерекше көзге түсті. Егіз ағайындылар Хасан мен Хусан Хожимуратовтар сыртқы ұқсастықтарын ғана емес, жеңіске деген ортақ жігерлерін де көрсетті. Мәре сызығына дейін бір-біріне қолдау көрсетіп, ұйымшылдық пен қайсарлықтың үлгісін танытты.
– Біз жарыстың ерекше достық атмосферасын атап өткіміз келеді. Мұнда әртүрлі елден келген қатысушылар арасында өзара құрмет пен шынайы бауырластық орнаған. Барлық кезеңдер жоғары деңгейде ұйымдастырылған. Бұл жиынға қатысу өз күшімізді сынап қана қоймай, жаңа білім, дағды және болашақта қажет болатын құнды халықаралық тәжірибе жинауға мүмкіндік береді, – деді ағайындылар.
Жарыстың әр кезеңінде өз көшбасшылары мен рекорд иелері болды. Мәселен, автоматты жартылай бөлшектеу және жинақтау жаттығуында Алматы қаласындағы Қазақстан Қарулы күштерінің «Жас десантшы» әскери-патриоттық клубының тәрбиеленушісі Әлихан Хамит нормативті небәрі 8 секундта орындады.
– Клубтағы сабақтар маған тәртіпті, төзімділікті және командада жұмыс істеуді үйретті. «Айбын» жиынына үшінші жыл қатарынан қатысып отырмын. Бұл – менің сайыстағы соңғы сынағым. Алда өмірімнің жаңа кезеңі – мамандық таңдау тұр. Мен болашағымды заң саласымен байланыстыруды шештім. Азаматтардың құқықтарын қорғап, елімнің заңына қызмет еткім келеді. Жарыста бар күшімді салдым және жақсы нәтиже көрсеттім, – деді жас десантшы.
Бекітілген бағдарламаға сәйкес клубтар мен оқу орындарының тәрбиеленушілері пневматикалық мылтықтан ату шеберліктерін де көрсетті.
Айта кетейік, «Айбын жұлдызы» шығармашылық байқауы күн сайын түстен кейін қатысушылар санаттары бойынша өткізіледі.
Бүгін өңірлік әскери-патриоттық клубтар мен әскери мектептердің командалары өз өнерлерін көрсетті.
Ертең Қазақстанның күштік құрылымдарының өкілдері өз шеберліктерін паш етеді.
Мерзімді қызметтегі әскери қызметшілердің сауда-тұрмыстық қамтамасыз ету жүйесін дамыту мақсатында ҚР Қарулы күштерінің Тыл бастығы басқармасы Voenmart пилоттық жобасын іске асыруды бастады.
Қазіргі уақытта бұл жоба Алматы облысындағы 78460 әскери бөлімінде, Гвардейск гарнизонның оқу орталығында, Астанадағы 68665 әскери бөлімінде және Сағадат Нұрмағамбетов атындағы әскери колледжде енгізілді. Аталған әскери бөлімдерде тапсырыс рәсімдеу үшін жеткізуші тарапынан тегін негізде терминалдар мен планшеттер орнатылды. Алдағы уақытта планшеттер әскери бөлімдердің балансына беріледі.
– Voenmart – әскери тұрмысты ұйымдастырудың жаңа деңгейі. Цифрлық форматтың арқасында әскери қызметшілер қажетті тауарларға ыңғайлы әрі жедел қол жеткізе алады. Бұл әскери қызмет жағдайларын жайлы етіп, заманауи талаптарға сәйкестендіруге мүмкіндік береді, – деді ҚР Қорғаныс министрлігі Ақпараттық технологиялар департаменті бастығының орынбасары подполковник Алмат Маханов.
Voenmart жүйесі сарбаздарға қажетті тауарларға тапсырыс беріп, оларды әскери бөлім аумағына тегін жеткізу мүмкіндігін береді. Сонымен қатар жеткізілетін өнімдердің сапасын бақылаудың көп деңгейлі жүйесі қарастырылған. Сондай-ақ тапсырыстарды есепке алу мен бақылаудың ашық жүйесі жұмыс істейді. Ол өз кезегінде әскери қызметшілер рәсімдеген тапсырыстарды бақылауға мүмкіндік береді.
Әскери бөлімдердегі дәстүрлі сауда нүктелерінен айырмашылығы – Voenmart ассортименті айтарлықтай кеңейтілген. Мұнда жеке гигиена құралдары, тігін бұйымдары және басқа да қажетті заттармен қатар, әскери қызметшілерге жаңа піскен жемістер, шырындар, танымал тіскебасарлар, нан өнімдері және күнделікті сұранысқа ие басқа да тауарлар қолжетімді.
Жобаның басты ерекшеліктерінің бірі – ыстық тағамдарды жеткізу қызметінің ұйымдастырылуы. Әскери қызметшілер бәліш, бургер, пицца және басқа да тағамдарға тапсырыс бере алады, әрі олар ыстық күйінде жеткізіледі.
Бұл жерде маңызды артықшылықтардың бірі – жеткізудің тегін болуы. Әскери қызметшілер қосымша комиссиялар мен қызмет көрсету төлемдерінсіз тек тауардың өз бағасын ғана төлейді. Бұл қызметті сарбаздар үшін барынша қолжетімді етуге мүмкіндік береді.
Пилоттық жоба нәтижесі бойынша оның тиімділігі бағаланып, кейіннен Voenmart жүйесін Қазақстан Қарулы күштерінің басқа да әскери бөлімдеріне кезең-кезеңмен енгізу мүмкіндігі қарастырылады.
ҚР Қорғаныс министрлігінің Шоқан Уәлиханов атындағы әскери колледжінің «Амандық» полигонында өтіп жатқан «Айбын-2026» XII халықаралық әскери-патриоттық жастар жиыны аясындағы жарыстарға Қазақстан, Әзербайжан, Қырғызстан, Ресей және Өзбекстаннан келген мыңға жуық ұл-қыз қатысып жатыр.
Жиынға қатысушылар далалық лагерьге бейімделіп, жарыс шарттарымен танысып үлгерді. Барлығы әскери тәртіпке келтірілген. Жас патриоттар керней үнімен оянып, таңғы дене шынықтыру жаттығулары жасайды. Одан соң таңғы ас ішіп, байқауларға, қызықты кездесулер мен мәдени-демалыс іс-шараларына қатысады.
Жарыстар шет мемлекеттердің командалары, өңірлердегі әскери-патриоттық клубтар, күштік құрылымдардың командалары және әскери оқу орындарының командалары секілді төрт санат бойынша ұйымдастырылған.
Smart Sarbaz байқауы аясында жас бағдарламашылар робототехника, ақпараттық технологиялар және ұшқышсыз жүйелер салалары бойынша авторлық жобаларын ұсынды. Мысалы, «Жас теңізшілер» командасы төтенше жағдайлар кезінде адамдарды қауіпсіз аймаққа эвакуациялауға арналған роботтандырылған техниканы таныстырды. Робот-эвакуатор салмағы 100 келіге дейінгі зардап шеккен адамды көтеріп, тасымалдай алады. Сонымен бірге адам өміріне қауіпті аймақтарда барлау жүргізуге және миналарды іздеуге арналған автоматтандырылған кешендер де қазылар алқасының ерекше қызығушылығын тудырды.
«Айбын дарыны» зияткерлік ойынына қатысушылар да тест тапсырмаларын, ребустар мен логикалық есептерді шешу барысында өздерінің білімділігі мен тапқырлығын көрсете білді.
Ал ұлдар арасында белтемірге тартылуда, сондай-ақ қыздар арасында шалқалай жатып денені көтеру жаттығуларын орындау кезінде тартысты әрі қызықты бәсекелестік өрбіді.
– «Айбын» жиынына үшінші рет қатысып отырмын. Жыл сайын алдыма сайыста ең жоғары нәтиже көрсету мақсатын қоямын. Өткен жылы бұл жаттығуды 67 рет орындаған едім, ал бүгін өз көрсеткішімді жаңартып отырмын. Шалқалай жатып, денені көтеруді 83 рет қайталап, жеке рекордымды орнаттым. Әрине, бұл жетістіктің артында айлар бойы жүргізілген тынымсыз жаттығулар, орасан зор еңбек пен темірдей тәртіп жатыр. Тәлімгерлерімнің үмітін ақтағаныма қуаныштымын, – деді «Сұңқар» әскери-патриоттық клубының тәрбиеленушісі Нұрдана Ерғазы.
«Айбын жұлдызы» шығармашылық байқауында еліміздің әр өңірінен келген әскери-патриоттық клубтардың тәрбиеленушілері өздерінің таланттары мен қабілеттерін паш етті.
Жарыстар жалғасуда. Алда жас патриоттарға төзімділігін, тапқырлығын және командамен жұмыс істеу қабілетін көрсетуге мүмкіндік беретін жаңа сынақтар күтіп тұр.
Қазақстан Қарулы күштері Арнайы операциялар күштерінің Тау дайындығы орталығының альпинистер тобы Солтүстік Американың ең биік шыңы – Деналиді бағындырды.
6190 метр биіктікте әскери қызметшілер салтанатты түрде Қазақстан Республикасының Мемлекеттік Туын және Арнайы операциялар күштерінің туын көтерді.
Сәтті аяқталған экспедиция қазақстандық әскери қызметшілердің жоғары кәсіби даярлығын, төзімділігі мен рух күшін айқын көрсетті. Солтүстік Американың ең биік шыңын бағындыру олардың тамаша дене және психологиялық дайындығымен қатар, олардың отансүйгіштік, ерлік, табандылық қасиеттерін тағы бір паш етті.
Еске сала кетейік, аңызға айналған Денали шыңы Алясканың орталық бөлігінің оңтүстігінде орналасқан және жергілікті ұлттық парк пен қорықтың құрамына кіреді. Денали сөзі үндістердің атабаска тілінен аударғанда «Ұлы» деген мағынаны білдіреді.
Қазақстан Республикасы Қорғаныс министрінің тыл және әскери инфрақұрылым жөніндегі орынбасары генерал-майор Алмаз Джумакеев Қарағанды, Балқаш және Приозерск гарнизондарына жұмыс сапарымен барып, әскери қызметшілердің қызмет өткеру жағдайымен және әскери инфрақұрылым нысандарының жай-күйімен танысты.
Жұмыс сапары барысында генерал-майор Алмаз Джумакеев «Астана» өңірлік қолбасшылығында, Қарағанды, және Приозерск гарнизондарына қарасты әскери бөлімдерде, авиациялық базада, әуе шабуылына қарсы қорғаныс бригадасында, сондай-ақ әскери лазаретте болды. Материалдық-техникалық қамтамасыз ету, әскери қызметшілерді тамақтандыруды ұйымдастыру, медициналық қызмет көрсету және әлеуметтік-тұрмыстық жағдайларды жақсарту мәселелеріне ерекше назар аударылды.
Қорғаныс министрінің орынбасары мерзімді әскери қызметшілердің киім-кешек мүлкімен қамтамасыз етілуін тексеріп, жеке құрамның тұрмыс жағдайымен, медициналық бөлімшелер мен тылдық қамтамасыз ету нысандарының жұмысымен танысты. Сонымен қатар екі гарнизондағы әскери техника, қару-жарақ және әскери инфрақұрылым нысандарының жай-күйіне инспекция жүргізілді.
Әскери қызметшілермен және бөлім командирлерімен кездесулер барысында Алмаз Джумакеев қызметті ұйымдастыруға қатысты өзекті мәселелер мен шешуді қажет ететін кемшіліктер жөніндегі баяндамаларды тыңдады. Көтерілген әрбір мәселе бойынша оларды жоюға бағытталған нақты шаралар айқындалды.
– Қолбасшылықтың басты міндеті – әскери қызметшілерге лайықты қызмет жағдайын жасау, сапалы тамақтандыруды ұйымдастыру, уақтылы медициналық көмек көрсетуді және сенімді материалдық-техникалық қамтамасыз етуді жолға қою. Бұл бөлімшелердің жауынгерлік әзірлігі мен қойылған міндеттердің тиімді орындалуына тікелей әсер етеді, – деп атап өтті Қорғаныс министрінің орынбасары.
Жұмыс сапарының қорытындысы бойынша генерал-майор Алмаз Джумакеев әскерлерді тылдық қамтамасыз ету жүйесін одан әрі жетілдіруге, әскери қызметшілердің әлеуметтік-тұрмыстық жағдайларын жақсартуға және әскери бөлімдердің материалдық-техникалық базасын нығайтуға бағытталған бірқатар нақты тапсырмалар берді.