Қазақстан Республикасының Сингапур Республикасындағы Елшілігі

Қазақстан Республикасы мен Сингапур Республикасы арасындағы дипломатиялық қатынастар 1993 жылы 30 наурызда орнатылды. 2003 ж. қарашада Сингапурда ҚР Дипломатиялық миссиясы ашылып, 2008 ж. 11 желтоқсанда ол ҚР Елшілігі болып қайта құрылды.

2019 жылғы 6 маусымда Аркен Кеңесбекұлы Арыстанов Қазақстанның Сингапурдағы Төтенше және Өкілетті Елшісі болып тағайындалды.

2014 жылғы 28 мамырдан резиденциясы Сингапурда орналасқан Сингапурдың Қазақстандағы Елшісі Зулкифли бин Бахарудин болып табылады.

Елшілік Қазақстан Республикасының Сыртқы істер министрлігінің жүйесіне енеді және ҚР Сингапурдағы мүдделеріне өкілдік етеді.

Елшіліктің негізгі міндеттері:

- Қазақстан Республикасының Сингапурдағы ұлттық мүдделерін қамтамасыз ету және оның сыртқы саяси курсын іске асыру;

- Қазақстанның азаматтары мен заңды тұлғаларының Сингапурдағы құқықтары мен мүдделерін қорғау;

- Қазақстанның Сингапурмен ынтымақтастығын дамытуды қамтамасыз ету, Қазақстанның мемлекеттік органдарының, қоғамдық ұйымдарының және іскер топтар өкілдерінің Сингапурмен байланыстарын орнату және қатынастарын дамыту;

- Қазақстанның Сингапурмен халықаралық келісімшарттары жобаларын, келісімшарттарды жасасу, орындау және тоқтату жөніндегі ұсыныстарды әзірлеуге қатысу, Қазақстанның болу елімен жасасқан келісімшарттарының орындалуына бақылау жасау;

- консулдық қызмет;

- өзге де міндеттер.

ҚР Сингапурдағы Елшілігі сондай-ақ Қазақстанның Аустралия және Жаңа Зеландия өкілдігі болып табылады. 2020 жылғы 22 мамырда Қазақстан Республикасының Сингапур Республикасындағы Төтенше және Өкілетті Елшісі, Қазақстан Республикасының Жаңа Зеландиядағы Төтенше және Өкілетті Елшісі қызметін қоса атқарушы Аркен Кеңесбекұлы Арыстанов Қазақстан Республикасының Аустралия Одағындағы Төтенше және Өкілетті Елшісі қызметін қоса атқарушы қызметіне тағайындалды.