Теміртаудағы Самарқанд су қоймасында «Таза Қазақстан» республикалық бастамасының бір бөлігі – «Таза жағалау» акциясы басталды. Ол 30 мамырға дейін жалғасады.
Осы уақыт ішінде Самарқанд су қоймасының барлық учаскелерін ғана емес, Ботақара көлін, Көгілдір тоғандарды, Федоров, Ынтымақ және Саран су қоймаларын да тазарту жоспарланып отыр.
– «Таза жағалаулар» акциясы – «Таза Қазақстан» науқаны аясындағы маңызды бастамалардың бірі. Ол республикамыздың су ресурстарын сақтауға бағытталған. Бүгінде біз балық шаруашылығы су қоймаларына тасталған және иесіз қалған балық аулау торларынан тазалап, жағалау аумақтарындағы қоқыстарды жинап жатырмыз, – дейді Қарағанды облысының табиғи ресурстар және табиғат пайдалануды реттеу басқармасының басшысы Бахтияр Санбаев. – Экологияны қолдау – ортақ міндет.
Акцияға табиғи ресурстар басқармасының қызметкерлері, мемлекеттік инспекторлар, балық шаруашылығының өкілдері, еріктілер, экологиялық белсенділер және жергілікті тұрғындар қатысты.
Теміртаудағы № 16 мектептің экология пәнінің мұғалімі, «Отражение» қоғамдық бірлестігінің жетекшісі Елена Варганова оқушылармен бірге акцияға келді. Ол мұндай іс-шаралар жастардың жаңа ойлау бағыты мен табиғат үшін жауапкершілігін қалыптастырады деп санайды.
– Бұл акцияны барлық экологиялық ұйымдар мен мемлекеттік құрылымдар қолдады, – деді ол. – Біздің ортақ мақсатымыз - болашақ ұрпақ үшін табиғатты сақтау, су қоймаларының экологиясын жақсарту. Мен мұны сенбілік деп атамас едім: жастар қоршаған ортаны қорғау ісіне өз үлестерін қосу үшін жүрек қалауымен келді.
№ 16 мектептің он бірінші сынып оқушысы Алина Кочетова үшін экология – өмірдің бір бөлігі. Ол тренингтерге қатысады, әлеуметтік желілерде тақырыптық парақша жүргізеді, ауа сапасы мәселелерімен айналысады.
– Біз мұнда отбасымызбен жиі демалып тұрамыз. Мен үшін қаламыздың және оның төңірегінің таза болуы маңызды. Бұл тек билікке ғана емес, әрқайсымызға да байланысты, – деп есептейді мектеп оқушысы.
Акцияға қатысушылар табиғат жағдайына жеке жауапкершіліктерін сезінетінін атап өтті.
Қарағанды индустриалды университетінің бірінші курс студенті Әлия Ескендір Шымкент қаласының тумасы. Ол да акцияға қосылды.
– Қазақстан – біздің ортақ үйіміз. Қай жерде болсаң да, өз еліңнің экологиясы мен табиғатына қамқорлық жасау маңызды, – деп атап өтті бойжеткен.
Қорықшылық қызметтің бастығы Василий Волков демалушыларды табиғатты қорғауға шақырды, өйткені олар қолайлы демалыс пен табиғи ресурстарды сақтау үшін қолдан келгеннің бәрін жасауда.
– Жағалау бойында қоқысқа арналған арнайы контейнерлер орнатылған, олар тұрақты түрде тазартылып отырады. Балықшылармен бірге біз жаз бойы аумақты жинап жүреміз. Өткен жылы су қоймасын балықтандырып, тұқы жібердік. Биыл ол шараны қайталауды жоспарлап отырмыз, – деді Василий Волков.
Акцияның басты мақсаты – балық ресурстарын сақтау, олардың тіршілік ету ортасын қорғау және су фаунасының табиғи өсімін молайту үшін жағдай жасау.
Оған қатысушылар жағалаулар мен су қоймаларын қоқыс пен торлардан тазартады.
«Таза Қазақстан» жалпыұлттық бастамасының іске қосылғанына бір жыл толды. Қарағанды облысының тұрғындары тазалық пен көгалдандырудың республикалық челленджін белсенді қолдауын жалғастырып жатыр, қалалар мен ауылдардың жайлы болуы үшін өз үлестерін қосуда. Өңірде жаппай ағаш егу жүріп жатыр.
Бүгін Қарағанды қаласының «Алаш» саябағында жүзден астам ағаш егілді. Акция табиғатқа бей-жай қарамайтын түрлі жастағы және мамандықтағы тұрғындарды біріктірді. Еріктілер, жас белсенділер, қалалық мәслихат депутаттары, бизнес-қоғамдастық өкілдері, қоғам қайраткерлері мен коммуналдық қызмет қызметкерлері қатысты.
– «Алаш» саябағы – қаланың маңызды қоғамдық кеңістіктерінің бірі, осындай бастамалардың арқасында ол жайлы әрі көгалданып келеді. Экологияны қолдау – біздің ортақ міндетіміз, – деп атап өтті қалалық мәслихат депутаты Нұрлан Әубәкіров.
Қарағанды қаласының кәсіпкерлер қауымдастығының басшысы Серік Санаубаев мұндай акциялар қоршаған ортаға жауапкершілікті қалыптастыратынына сенімді. Әсіресе, жастарды экологиялық құндылықтардың болашақ сақтаушылары ретінде тарту маңызды.
Саранда үш мыңнан астам оқушы білім беру аллеясы мен мектеп жанындағы аумақтарды абаттандыруға шықты.
Алдымен қоқыс, құрғақ жапырақтар мен бұтақтар жиналып, петуниялар
мен 600 жуық қайың көшеттері егілді.
Акцияның жас қатысушылары көгалдандыруға арналған гүл көшеттерін мектеп жылыжайында өздері өсірген. № 17 мектеп-гимназиясының оқушылары өз еңбектерінің жемісін берді.
Ал Абай атындағы мектептің оқушылары «Қысқы бақ» үйірмесінің қызметі туралы әңгімелеп, гидропоника – топырақсыз өсімдіктерді өсірудің заманауи әдісі саласындағы білімдерімен бөлісті.
– Біз «Таза Қазақстан» бастамасын белсенді қолдаймыз, өйткені тазалық пен абаттандыру – әркім қатысуы тиіс ортақ іс. Бүгінгі акция ортақ мақсат үшін бірігудің қаншалықты маңызды екенін тағы да дәлелдеді. Мұндай іс-шаралар жастарда экологиялық ойлау мен азаматтық жауапкершілік сезімін қалыптастыруға көмектеседі, – дейді мектептің өзін-өзі басқару президенті Данияр Байдаров.
Қарағанды тұрғындары аулаларын көгалдандырады, ағаштар мен бұталар екті.
Ал Орталық мәдениет және демалыс саябағында алма бағы пайда болады. Мұнда бес мың көшет егіле бастады.
Қарағанды облысының барлық қалалары мен аудандарында ағаш, бұта және гүл көшеттері егіледі. Экологиялық акциялар өңірдегі өмір сүру сапасын жақсартуға ықпал ететін болады.
Теміртау тұрғындарын бос орындар жәрмеңкесіне шақырыады. Жұмыс іздеушілерді Теміртау жоғары политехникалық колледжінде 25 сәуірде сағат 16:00 күтеді.
Жәрмеңкеге түрлі салалардан 30 компания қатысады. Олар барлығы 150-ге жуық бос жұмыс орнын ұсынады.
Сұранысқа ие мамандықтар қатарында слесарь-жөндеуші, электр газымен дәнекерлеуші, түрлі жұмысшы, автобус жүргізушісі, электр монтажшы, қосалқы жұмысшы бар.
Сондай-ақ, жәрмеңкеде Теміртауда жұмыспен қамтуға жәрдемдесудің қандай шаралары қолданылатыны туралы айтылады. Ниет білдірушілер кәсіптік оқыту, «Бастау Бизнес» жобасы және өз ісін дамытуға гранттар алу тетіктері бойынша кеңес ала алады.
Толығырақ мына нөмірден білуге болады: (8-7213) 91-64-20
Теміртау жоғары политехникалық колледжі Республика даңғылында орналасқан, 26.
Идеядан стартапқа, бизнестен масштабтауға дейін: Қарағандыдағы Демокүні үздік командалар өнер көрсетті. Олардың қатарында болжамдардан бастап алғашқы клиенттерге дейінгі жолды жүріп өткен жобалар да, шетелдік нарықтарды бағындыруға батылданған жобалар да болды. Арасында тек тәжірибелі командалар ғана емес, мектеп оқушылары да бар. Диабетпен ауыратын адамдарды қолдауға арналған Diabalance қосымшасын әзірлеген жоғары сынып оқушыларының командасы ерекше назарға ие болды.
– Біз жылына үш рет бизнес-бағдарламалар өткіземіз: идея сатысындағы стартаптарға арналған «Инкубатор» және ауқымданғысы келетін бизнеске арналған «Акселератор». Үздік командалар бағдарламалар финалында – Демокүні өнер көрсетіп, гранттар мен инвестицияларға үміткер болу үшін қазылар алқасына өз жобаларын ұсыну мүмкіндігіне ие болады, – деді «Террикон алқабының» басқарушы серіктесі Диана Салехова.
Кезекті Демокүні 18 сәуірде IT-хабта өтті. Оған 14 жоба қатысты. Қазылар алқасының шешімі бойынша «Инкубатордың» үш түлегі одан әрі дамыту үшін 500 мың теңге көлемінде грант алды.
Диабетпен ауыратын адамдарды қолдауға арналған Diabalance қосымшасын әзірлеген командаға ерекше назар аударылды. Назарбаев Зияткерлік мектебінің жоғары сынып оқушылары Вадим Назаренко, Әмірхан Сандыбаев және Әміржан Байкенжин алғаш рет «Инкубаторға» қатысты. Табысқа жетеміз деп үміттенген, бірақ бәсекелестікті тиянақты бағалаған: әлдеқайда тәжірибелі мықты командалармен иық тіресу керек болды.
– Біз үшін бұл сынақ болды – идеяны іске қосу, нарықтың қалай жұмыс істейтінін түсіну және өз өнімімізді таныстыруды үйрену. Бағдарлама құрылымды берді, ал Демокүн – біздің дұрыс жолда екенімізге сенімділік берді. Жеңісті күтпеген едік, бірақ өте ынталандырарлық болды, – дейді Вадим.
Демокүні өз жобаларын ұсынған «Акселератор» түлектерінің арасында келесі қадам – инвестиция тартуға дайын қатысушылар да болды. Демокүн қорытындылары негізінде өңірдің әлеуетті стартаптарын қолдау үшін хаб базасында іске қосылған Terricon Venture венчурлік қоғамдастығымен одан әрі келіссөздер жүргізу үшін бірнеше жобалар ұсынылатын болады.
14–35 жас аралығындағы жас дизайнерлер білімі мен тәжірибесіне қарамастан өздерінің шығармашылық идеяларын Design Future: One Day облыстық байқауында көрсете алады. Ұйымдастырушылар қатысушыларға қазылар алқасы мен көрермендер назарына кәсіби сахнада «Болашақтың экологиялық дизайны» тақырыбында авторлық бейне әзірлеуді ұсынады.
Өтінімдер 27 сәуірге дейін қабылданады. Байқауға қатысу тегін.
Соңғы көрсетілім 22 мамырда Қарағандыда өтеді. Жеңімпаздарға жүлделер табыс етіледі. Ал Гран-при иегері Saryarka Art Fest байқауына қатысады.
Тіркелу үшін телефон: +7-771-698-30-85.
Ұйымдастырушы – Қарағанды облысының Жастар ресурстық орталығының қолдауымен Design Studio.
«Қазақстан Республикасының үздік 100 колледж студенті» республикалық байқауының қорытындысы шығарылды. Мемлекет басшысының Жарлығымен жарияланған Жұмысшы мамандықтар жылында ол жаңа тыныс алды. Байқау үш кезеңде өтіп, бүкіл елді қамтыды. Финалға 200-ге жуық үміткер шықты. Үздіктер атағы үшін оқу озаттары, халықаралық және республикалық жобалардың, WorldSkills чемпионаттарының, олимпиадалардың, байқаулардың, жарыстардың көшбасшылары мен белсенді қатысушылары бақ сынасты. Онлайн-дауыс беру және қазылар алқасының шешімі жүздеген жеңімпазды анықтады. Олардың ішінде Қарағанды облысындағы жеті колледж студенті бар.
Іріктеу өте қатаң болды. Өңірдің 52 колледжінде 33 мыңнан астам студент білім алуда. Жұмысшы кадрларды 126 мамандық бойынша дайындайды. Топ-100 байқауының облыстық кезеңінде 69 студент сайысқа түсіп, олардың ішінен үздік ондық таңдалды. Олар республикалық кезеңге жолдама алды.
Нәтижесінде топ-100-ге:
Аяна Қадырбаева – Абай Құнанбаев атындағы Саран жоғары гуманитарлық-техникалық колледжінің студенті, болашақ қазақ тілі мен әдебиеті мұғалімі;
Мәдина Кәрімова – Қарағанды жоғары гуманитарлық колледжінің студенті, болашақ музыка мұғалімі;
Әнел Тікенова – Қарағанды Bolashaq жоғары колледжінің студенті, болашақ қазақ тілі мен әдебиеті мұғалімі;
Разия Әбдуәлі – Қарағанды тамақтану және сервис колледжінің студенті, болашақ кондитер-безендіруші;
Айбар Жоланов – Теміртау жоғары политехникалық колледжінің студенті, болашақ металлург;
Гүлпахат Құттыбаева – Қарағанды технология және сервис колледжінің студенті, болашақ модельер-пішуші;
Нұрдос Түсенов – А. Мусин атындағы Балқаш гуманитарлық-техникалық колледжінің студенті, болашақ бастауыш сынып мұғалімі.
Олардың әрқайсысының жетістіктері, табысты жобалары бар.
Мысалы, Enaktus Kazakhstan жобасының қатысушысы Гүлпахат Құттыбаева өз алаңында жүнді қайта өңдеу бойынша бизнес-идеяны қорғап, оны іске асыра алды. Қарағанды технология және сервис колледжінің үшінші курс студенті DalaSkills өңірлік фестиваль-конкурсының жеңімпазы және Wordskills Kazakstan республикалық кезеңінің жүлдегері болды.
Разия Әбдуәлі Қарағанды тамақтану және сервис колледжінің екінші курсында оқиды, сонымен қатар ісін жаңа бастаған кәсіпкер. Туған ауылында наубайхана ашқан. Ауылдастары дәмді және сапалы тамақтанып, тұрақты жұмыс істеуі үшін жерлестеріне пайда әкелгісі келеді.
Әнел Тікенова – Bolashaq колледжінің студенттер парламентінің президенті. Қазақ әдебиетін жақсы көреді, оқырмандар байқауына белсенді қатысып, жетістіктерге жеткен.
Теміртау жоғары политехникалық колледжінің төртінші курс студенті Айбар Жоланов – металлургиядан халықаралық олимпиаданың жүлдегері. Астанадағы «Жұмысшы мамандықтар қаласы» республикалық фестиваліне қатысып, өзінің колледжі мен металлургия мамандығын ұсынды. Болашақта саладағы жаңа шешімдерді іздестіріп, металл өңдеудің инновациялық технологияларын әзірлеуге қатысқысы келеді.
«Қазақстан Республикасының үздік 100 колледж студенті» байқауының мақсаты – талантты жастарды қолдау, кәсіби дағдыларды дамыту және тұлғалық өсуге ынталандыру. Қатысушылар оқу аяқталғанға дейін жұмыс берушілердің назарын өзіне аударуға мүмкіндік алады.
Жеңімпаздарды марапаттау сәуір айының соңында Астанада өтеді.
Қарағанды қаласының Әлихан Бөкейхан ауданында дезинсекциялық жұмыстар жүргізілуде. Иесіз қалған су қоймалары мен таяз су қоймалары, қорғалатын нысандардың аумақтары, саябақтар, гүлбақтар, шағын гүлбақтар мен үй маңындағы учаскелер өңделуде.
Жұмыстар ІІІ кезеңмен өткізіледі, құрттармен және масалардың ұшатын түрлерімен және басқа да шыбын-шіркей түрлерімен күрес жүргізіледі.
Жәндіктерді жою үшін құрамында адам мен жануарлар үшін қауіпсіз заттар бар инсектицидтер пайдаланылады. Препараттарды Қазақстан аумағында қолдануға рұқсат етілген.
Жұмыстарды жүргізуге «Farza group» ЖШС-мен шарт жасалды.
Қазыбек би атындағы ауданда да осындай жұмыстар мамыр айында басталмақ.
Қабылданып жатқан шаралар жәндіктердің санын айтарлықтай азайтуға мүмкіндік береді. Бірақ оларды толығымен жою мүмкін емес, өйткені масалар – экожүйенің маңызды бөлігі.
Қарағандыда қоғамдық аумақтарды көгалдандыру жалғасуда. Орталық мәдениет және демалыс саябағында көпшіліктің сүйікті аттракционы – балалар темір жолының бойында алма бағы пайда болады. Оны салу басталды.
"Біз қазірдің өзінде бес мың алма ағашын егуге кірістік. Бұл ағаштар қалалық саябақтың артқы жағында, Ғазалиев көпірінің бойында және теміржол бойымен өтетін маршрут бойынша пайда болады. Уақыт өте келе бұл аллеялар қаланың сыртқы келбетін өзгертіп қана қоймай, тұрғындарды гүлденуімен және балғын жемістерімен қуантады", – деп хабарлайды Қарағанды саябақтар басқармасы Instagram-дағы ресми парақшасында.
Кәсіпорынның мәліметінше, биылғы маусымда Назарбаев даңғылы мен Орталық саябақта 10 мың қарақат көшеті егіледі.
Бұл жобаға бюджет есебінен бір де бір теңге жұмсалмайды. Астаналық тәлімбақ серіктестік қарым-қатынас аясында көшеттерді тегін берді.
Талдықорғанда шахматтан 9–11 сынып оқушылары арасында Ұлттық мектеп лигасының республикалық кезеңі аяқталды. Қарағандылық команда жарыстан күміс медальмен оралды.
Шахмат жарысына еліміздің барлық облыстарынан барлығы 60-қа жуық оқушы қатысты.
Қарағандының намысын әл-Фараби атындағы мектеп-гимназиясының төрт жоғары сынып оқушысы – Рауан Тұспаев, Қамшат Ерғали, Нұрасыл Дәулетбеков және Азамат Ғалымқадыр қорғады.
Олардың барлығы сабақтан тыс уақытта бала кезінен бастап шахматпен айналысады, ал мектепте оларды дене шынықтыру пәнінің мұғалімі Дәулет Кеңесбай жаттықтырады.
– Бұл жарыстарда барлық қатысушылар мықты болды. Біздің жоғары сынып оқушылары жақсы нәтиже көрсетті. Әрине, толқу болды. Эмоционалдық кедергі салдарынан біздің шахматшылар көп ұпай жинай алмағаны әбден мүмкін, – деп есептейді Дәулет Кеңесбай.
Барлық жүлдегерлер медальдармен және дипломдармен марапатталды.
Қарағандыда тоғызқұмалақтан ерлер мен әйелдер арасында XVII жеке чемпионатта «рапид» және «блиц» түрлерінен 15 облыс пен республикалық маңызы бар үш қала – Астана, Алматы және Шымкент қалаларының өкілдері қатысады.
Спорт шеберлігіне үміткерден төмен емес атақта 14 жастан асқан 134 спортшы жарысқа түседі.
– Қарағанды облысы тамаша нәтижелер көрсетуде. Соңғы екі жылда мұнда әлем чемпиондары мен халықаралық турнирлердің жүлдегерлері арта түсті, – деп тоғызқұмалақтан ҚР мемлекеттік жаттықтырушысы, ҚР еңбек сіңірген жаттықтырушысы Дәулет Әбдікәрімов өңірдің ұлттық спорт түрін дамытуға қосқан үлесін атап өтті.
Турнирге қатысушылар арасында бес дүркін әлем чемпионы, он дүркін әлем чемпионы, еңбек сіңірген спорт шеберлері, халықаралық дәрежедегі спорт шеберлері бар.
– Құрам өте қуатты. Шынымен де мықтылар жиналды. Партиялар қызықты, ал күрес – табанды болады, – дейді ересектер арасындағы Қазақстан құрамасының бас бапкері Айнұр Жақапбаева. – Тоғызқұмалақ бойынша классикалық партия төрт сағатқа созылады. Бірақ бізде рапид және блиц жарыстары болғандықтан, мұнда барлығы нақты реттелген: ерлер мен әйелдердің әрқайсысында 20 минуттан, блицте – 5 минуттан плюс 2 секундтан. Партия шамамен 15 минутқа созылады.
Соңғы жылдары Қарағанды облысы осы спорт түрінен қарқынды дамып келеді. Өткен жылы Асылхан Қожанәсіп тоғызқұмалақта үздік деп танылып, «Алтын тұғырды» жеңіп алып, әлем чемпионы атанды. Аңсаған Қожанәсіп көшпенділер ойындарында алтын мен күміс жүлдеге ие болды.
Жарысқа қатысушылардың бірі, 23 жастағы қарағандылық спорт шебері Ернұр Кәріғұл тоғызқұмалақпен мектеп үйірмесінде айналыса бастаған, ал қазір жарысқа жеке қатысуды жаттықтырушылық жұмыспен біріктіреді. Оның қоржынында әр түрлі чемпионаттарда ұтқан бірнеше жүлделі орын бар.
– Тоғызқұмалақ шыдамдылықты, тез санауды және логикалық ойлауды талап етеді. Бұл нақты ғылымдарға өте көмектеседі – мысалы, менің математикадан бағаларым әрдайым жақсы болды, – деп бөлісті Ернұр.
Чемпионат 24 сәуірге дейін жалғасады және зияткерлік күресте мықтыларды анықтайды.
Бірінші және екінші орын алған спортшылар Азия чемпионатында еліміздің намысын қорғайды, ал үшінші орын алған спортшылар шілдеде Чехияда өтетін Әлем кубогына қатысады.
