Астанадағы Триатлон паркінде 20-21 маусым күндері Asia Triathlon Cup Astana 2026 халықаралық турнирі өтеді. Ауқымды жарысқа әлемнің үздік триатлоншылары мен Қазақстанның әр өңірінен келген спорт әуесқойлары қатысады, деп хабарлайды елорда әкімдігінің ресми сайты.
Қазіргі уақытта жарысқа әлемнің 20 елінен 270-тен астам спортшы тіркелген. Қатысушыларды тіркеу әлі де жалғасып жатыр.
Байрақты бәсекеде Қазақстан, Әзербайжан, Австрия, Бангладеш, Бруней, Гуам, Индонезия, Иран, Жапония, Ливан, Люксембург, Моңғолия, Біріккен Араб Әмірліктері, Палестина, Ресей, Словакия, Түркия, Өзбекстан, Финляндия және Чехия елдерінің өкілдері бақ сынайды.
Халықаралық турнир Elite, Junior, Age Group және паратриатлон санаттары бойынша өтеді.
20 маусымда Elite санатындағы спортшылар спринттік қашықтықта жарысады. Олар 750 метрге жүзіп, 20 шақырым веложарысқа қатысып, 5 шақырым қашықтыққа жүгіреді.
21 маусымда Junior санатындағы спортшылар бақ сынайды. Жасөспірімдер де дәл осы спринттік қашықтық бойынша жарысады.
Сол күні Age Group санатындағы әуесқой спортшылар арасында да жарыстар өтеді. Қазіргі уақытта бұл санатқа шамамен 200 қатысушы тіркелген. Олар 1,5 шақырым жүзу, 40 шақырым веложарыс және 10 шақырым жүгіруден тұратын олимпиадалық қашықтықты еңсеруі тиіс.
Age Group санатында ерлер мен әйелдер 18-24, 25-29, 30-34, 35-39, 40-44, 45-49, 50-54, 55-59, 60-64 және 65 жастан жоғары жас топтары бойынша жарысады.
Asia Triathlon Cup Astana 2026 турнирін Қазақстан триатлон федерациясы World Triathlon және Asia Triathlon халықаралық ұйымдарының қолдауымен ұйымдастырады.
Жобаға ҚР Туризм және спорт министрлігі, ҚР Спорт және дене шынықтыру істері комитеті, ҚР Ұлттық олимпиада комитеті, Спортты дамыту дирекциясы және Астана қаласының әкімдігі қолдау көрсетіп отыр.
Жарыстың төрешілер құрамына техникалық делегат, оның көмекшісі, бас төреші және жарыстың халықаралық стандарттарға сай өтуін қамтамасыз ететін 20-дан астам төреші мен ассистент кіреді.
Астанада Азия кубогы кезеңін өткізу отандық триатлонды дамытуға, оны халықаралық олимпиадалық жүйеге кіріктіруге, төрешілер мен жаттықтырушылардың біліктілігін халықаралық талаптарға сәйкестендіруге, сондай-ақ Қазақстан құрамасының халықаралық аренадағы бәсекеге қабілетін арттыруға ықпал етеді.
Қазақстанда әлеуметтік осал санаттағы азаматтарды қолдауға бағытталған мемлекеттік гранттар бағдарламасы іске асып жатыр. Бұл туралы елорданың Коммуникациялар қызметінде өткен брифингте Астана қаласы әкімдігінің «Еңбек мобильділігі орталығы» КММ директоры Олжас Омар мәлім етті, деп хабарлайды қала әкімдігінің ресми сайты.
Грант жаңа бизнес-идеяларын іске асыруға арналған және көлемі 400 айлық есептік көрсеткішке (АЕК) дейін өтеусіз қаржыландыру алуға мүмкіндік береді. 2026 жылы бұл сома 1 730 000 теңгені құрайды. Спикердің айтуынша, грант қаражаты қайтарымсыз негізде беріледі, шағын бизнесті дамытуға және жаңа жұмыс орындарын ашуға ықпал ете отырып, өз кәсібін бастағысы келетін кәсіпкерлерді қолдауға бағытталған.
«Грант қаражаты нақты мақсаттарға ғана пайдаланылады. Қаражатты қолма-қол ақшасыз түрде кәсіп жүргізуге қажетті құрал-жабдықтар мен техникаларды сатып алуға, мал, тұқым мен көшет алуға, өндірістік үй-жайларды жалға алу және бизнес-жобаны жүзеге асыруға қажетті өзге де шығындарды өтеуге жұмсауға болады.
Бұл ретте заңанамада бірқатар шектеулер көзделген. Грант қаражатын жеке қажеттіліктерге, тұрғын үй сатып алуға, несие немесе басқа да қарыздарды өтеуге пайдалануға тыйым салынады.
Грантқа әлеуметтік осал топтарға жататын азаматтар үміткер бола алады. Олардың қатарында атаулы әлеуметтік көмек алушылар, көпбалалы отбасылар, асыраушысынан айырылған азаматтар, мүгедектігі бар бала тәрбиелеп отырған адамдар, мүгедектігі бар азаматтар, қоныс аударушылар және қандастар бар», – дейді спикер.
Оның айтуынша, бағдарламаға қатысу үшін өтінім беруші бірнеше міндетті талапқа сәйкес келуі тиіс. Өтінім тапсырған кезде азамат ресми түрде жұмыссыз ретінде тіркелуі не бір жылдан аз уақыт бұрын ашылған жеке кәсіпкерлігі болуы қажет.
Сонымен қатар, соңғы үш жыл ішінде «Бастау Бизнес» жобасы бойынша оқуды аяқтағаны туралы сертификаты болуы міндетті шарт болып табылады. Сондай-ақ, өтінім беруші жоба сипаттамасы, қаржылық есептері мен болжанатын нәтижелерін қамтитын бизнес-жоспар дайындауы тиіс.
Өтінім берушілерді тексеру мемлекеттік ақпараттық жүйелер арқылы жүзеге асырылады. Кейбір жағдайларда портал өтінімді комиссияның қарауынсыз автоматты түрде кері қайтарады.
«Еңбек шарты бойынша ресми жұмысы бар азаматтар, несиелері бойынша мерзімі өткен берешегі бар тұлғалар, сондай-ақ бұрын жұмыспен қамту мен кәсіпкерлікті қолдау бағдарламалары шеңберінде мемлекеттік грант немесе микрокредит алған азаматтарға грант беруден бас тартылады.
Сонымен қатар банкрот деп танылған азаматтар, зейнеткерлер, сондай-ақ өтінім бергенге дейін алты ай ішінде жеке кәсіпкерлігін жапқан тұлғалар да қатыса алмайды. Егер таңдалған бизнес түрі ресми лицензиялауды талап еткен жағдайларда лицензияңыз болмаса да бас таруға негіз болады.
2026 жылдан бастап мемлекеттік грант алушылар үшін бюджет қаражатын пайдалану тиімділігін арттыруға және кәсіпкерлік белсенділікті дамытуға бағытталған қосымша талаптар енгізілді. Негізгі жаңашылдықтың бірі – жобаларды мониторингілеу мерзімінің ұзаруы», – дейді орталық басшысы.
Бұрын бизнес идеяларды іске асыруды бақылау бір жыл бойы жүргізілсе, енді бұл мерзім 24 айды құрайды.
Грант алған кәсіпкер алғашқы 18 ай ішінде кемінде бір жаңа жұмыс орнын ашып, Мансап орталығы жіберген азаматты тұрақты жұмысқа қабылдауы тиіс.
Сондай-ақ грант алушылар жобаны іске асыру барысы туралы тұрақты түрде есеп беруге міндетті. Есепті екі жыл бойы әр үш ай сайын business.enbek.kz порталы арқылы беру қажет.
Тағы бір жаңашылдық – ақпараттың ашықтығын арттыру. Грант иегерлері, жүзеге асырылып жатқан жобалар және құрылған жұмыс орындары туралы мәліметтер жыл сайын 10 сәуірге дейін ашық түрде жарияланып отырады.
Бағдарламаға қатысушыларды іріктеу рәсімі қабылданған шешімдердің ашықтығы пен объективтілігін қамтамасыз етуге негізделген.
Астана қаласындағы «TANYM» көпфункционалды кешенінде «Жауапты әке – тұрақты қоғамның тірегі» қалалық форумы өтті, деп хабарлайды елорда әкімдігінің ресми сайты.
Қоғамдық орталарда әкелер беделін насихаттап, отбасы құндылықтарын дәріптеп, жанұя тірегін сақтауға, ұрпақ тәрбиесін қолға алуға үлес қосып жүрген әртүрлі сала мамандарына, үлгілі жандарға құрмет көрсетіліп «Алғыс хат» табысталды.
Форумның басты мақсаты – қазақ қоғамындағы әкенің абыройын арттырып, беделін көтеріп, жаһандану процесін ескеріп, ұлттық құндылықтарға терең тамыр жіберіп, қоғамдағы береке мен тұрақтылықты сақтауға үлес қосу.
Әртүрлі сала мамандары еркін форум аясында өздерінің өмірден алған, көрген-түйген, парасат-пайымдарын жеткізіп, ойын ортаға салды. Соның ішінде отбасында ер адамның рөлін нығайту, қоғамдағы ер-азаматтардың рухын көтеру сияқты бағыттар қамтылды.
Белгілі тұлғалар, саяси қайраткерлер, қоғам белсенділері, психологтар, қаржыгерлер, ұстаздар және т.б. білікті мамандар өздерінің өмір-тәжірибесімен бөлісті.
Астана қаласы білім басқармасының басшысы Қасымхан Сенғазыұлы отбасы құндылықтарын дәріптейтін игі іс-шаралардың әрқашан керек екендігін мәлімдеді.
«Бүгінгі форум өзінің көздеген мақсатына жетті. Әр спикер құнды дүниелер айтты. Өзім 7 баланың әкесімін. Отбасы құндылықтарына аса зер саламыз. Көп білім ошақтарында әртүрлі тағылымды дүниелер жасалып келеді. Алда әкелер мен аналар форумын бірлесіп өткізуді көздейміз. Әрдайым қоғамда әкелердің қадір-қасиетін жоғары ету өте өзекті, – деді ол.
Астана қаласындағы дарынды ер балаларға арналған «Білім-Инновация» лицейі ата-аналар комитетінің төрағасы Айдос Майданбекұлы қалалық әкелер форумы ұдайы жалғасын тауып, өңірлерде де белең алғаны жөн деп санайды.
Астанада 17-30 маусым аралығында Мәңгілік Ел даңғылы мен Сығанақ көшесінің көлік айрығында жол жұмысына байланысты қозғалыс ішінара шектеледі, деп хабарлайды елорда әкімдігінің ресми сайты.
Бұл ретте көлік қозғалысы екі бағытта жолдың бір жағымен ұйымдастырылады.
Жүргізушілер мен жаяу жүргіншілер жүру бағытын алдын ала жоспарлауы және ықтимал өзгерістерді ескеруі қажет. Қауіпсіздікті қамтамасыз ету және қолайсыздықты азайту үшін уақытша жол белгілері мен көрсеткіштер орнатылатын болады.
Елордадағы «Дәулет» теннис орталығында арбадағы теннистен Қазақстан Республикасының чемпионатының салтанатты ашылу рәсімі өтті, деп хабарлайды Астана әкімдігінің ресми сайты.
Іс-шараға Мүмкіндігі шектеулі жандарға арналған спорттық даярлау орталығының директоры Болатбек Дүкетаев пен Қазақстан теннис федерациясының вице-президенті Диас Досқараев қатысты. Олар қатысушыларға жарыста сәтті өнер көрсетуіне тілектес екенін білдірді.
«Арбадағы теннис Қазақстандағы ең қарқынды дамып келе жатқан паралимпиадалық спорт түрлерінің бірі саналады. Жыл сайын осы спортпен айналысатын спортшылар саны артып, қатысушылар географиясы кеңейіп келеді. Бүгінде қазақстандық теннисшілер халықаралық аренада ел намысын лайықты қорғап, жоғары нәтижелер көрсетіп жүр. Биыл арбадағы теннистен Қазақстан чемпионаты бесінші рет өткізіліп отыр. Жарыс қорытындысы бойынша еліміздің ұлттық құрамасына енетін ең мықты спортшылар анықталады», – деді Болатбек Дүкетаев.
Чемпионатқа Ақтөбе, Атырау, Қарағанды, Қызылорда және Маңғыстау облыстарынан, сондай-ақ Астана мен Алматы қалаларынан келген 40-қа жуық спортшы қатысуда.
Жарыстар ерлер, әйелдер және аралас жұп арасында Open және Quad санаттары бойынша өтіп жатыр.
Турнирде елорда намысын Дінмұхамед Әлияқпаров, Қайнар Нұрлыбек, София Степанова және Әлібек Әменов қорғайды.
Қазақстан чемпионаты 20 маусымға дейін жалғасады. Жарыс қорытындысы бойынша Қазақстан ұлттық құрамасының сапына енетін үздік спортшылар анықталады.
Астанада масаларға қарсы ауқымды дезинсекциялық жұмыс жүріп жатыр. Өңдеу жұмысы екі ауысымда жүреді, деп хабарлайды елорда әкімдігінің ресми сайты.
16 маусымнан бастап қаланың орталық бөлігінде жаппай өңдеу басталды. Кейін масаларды шеткі аудандарға қуып, олардың қайта таралуына жол бермеу шаралары жүргізіледі. Маусым басталғалы бері елорданың 26 мың гектар аумағы өңделген.
Жұмыс түнгі уақытта, сағат 21:00-ден таңғы 04:00-ге дейін жүргізіледі. Әр кезең 20 күнге созылады.
Жалпы дезинсекциялық науқан алты кезеңнен тұрады. Масалар табиғи экожүйенің бір бөлігі болғандықтан, оларды толық жою мақсаты қойылмаған. Алайда жүргізіліп жатқан жұмыс олардың санын 90 пайызға дейін азайтуға мүмкіндік береді.
Қала аумағын өңдеуге механикалық роторлы бүріккіштер, арнайы техникалар, қамыс басқан және жетуі қиын аумақтарға арналған квадрокоптерлер, сондай-ақ ірі су айдындарында арнайы жабдықталған қайықтар пайдаланылады.
Дезинсекциялық жұмысқа арнайы дайындықтан өткен және қауіпсіздік техникасы бойынша нұсқамадан өткен 150-ден астам маман жұмылдырылған.
Сонымен қатар тұрғын үйлерге қызмет көрсететін басқарушы компаниялар, ПИК пен МИБ, сондай-ақ білім беру, денсаулық сақтау, мәдениет және спорт ұйымдары, құрылыс нысандары, базарлар мен сауда орталықтары жертөлелерді тазалап, құрғатып, қосымша өңдеу жүргізуі тиіс.
Мамандар дезинсекциялық жұмыс кезінде қауіпсіздік шараларын сақтауға шақырады. Өңдеу жүргізіліп жатқан аумақтарға бармаған жөн, сол сияқты терезелерді жауып қою қажет.
Астанада өтіп жатқан «Жауапты әке – тұрақты қоғамның тірегі» атты қалалық әкелер форумында «Әкелер одағы» республикалық қоғамдық бірлестігінің елордалық филиалының бір жылдық қызметінің қорытындысы таныстырылды, деп хабарлайды қала әкімдігінің ресми сайты.
Форумда елордалық филиалдың төрағасы Бекдайыр Күзембай баяндама жасады. Оның айтуынша, өткен бір жыл ішінде отбасы институтын нығайту, жауапты әке ұғымын насихаттау және ата-аналарды тәрбие үдерісіне тарту бағытында бірқатар жұмыс атқарылған.
Ұйымның негізгі бағыттары ретінде түсіндіру шаралары, мектептермен және қоғамдық ұйымдармен өзара іс-қимыл, сондай-ақ ата-аналардың жауапкершілігін арттыруға бағытталған бастамалар аталды.
Баяндама барысында алдағы міндеттер де айқындалды. Олардың қатарында әкелер қозғалысын дамыту, әлеуметтік жобаларды кеңейту және жасөспірімдер арасында профилактикалық жұмыстарды күшейту бар.
«Бір жыл ішінде Астанадағы «Әкелер одағы» 15 мыңнан астам әкені және 60 мың оқушыны қамтыды. «Адал азамат» бірыңғай тәрбие бағдарламасы аясында біз «Әкелер мектептерін» іске қосып, 200-ге жуық қалалық іс-шара өткіздік. Олардың қатарында ашық кездесулер мен «Таза Қазақстан» экологиялық акциялары бар. Ұлы Абай айтқандай, баланың мінезі әке үлгісімен қалыптасады. Бүгінде елордалық әкелер мектеп өміріне белсене араласып, ұлттық құндылықтарды дәріптеуге үлес қосып жүр», – деді Бекдайыр Күзембай.
Астанада «Жауапты әке – тұрақты қоғамның тірегі» атты қалалық әкелер форумы өтіп жатыр. Іс-шараның негізгі тақырыптарының бірі – отбасылық құндылықтарды қалыптастыру және бала тәрбиесіндегі ата-аналардың өзара қарым-қатынасының рөлі, деп хабарлайды елорда әкімдігінің ресми сайты.
«Баланың болашағына әкенің анаға құрметі – өмірлік сабақ» тақырыбында баяндама жасаған Назгүл Мақжан отбасындағы ата-ана мінез-құлқы баланың басты бағдаршамы екенін атап өтті.
Оның айтуынша, отбасы ішіндегі өзара құрмет пен түсіністік баланың эмоционалдық дамуына және оның өмірлік ұстанымдарының қалыптасуына тікелей әсер етеді.
«Егер мықты қоғам құрғымыз келсе, ең алдымен мықты отбасынан бастауымыз керек. Балаларға қалдыратын ең үлкен мұра – өзара сыйластық пен жеке үлгі», – деді Назгүл Мақжан.
Сондай-ақ отбасындағы серіктестік қатынастардың маңыздылығы да айтылды. Ерлі-зайыптылар арасындағы құрмет, қолдау және өзара түсіністік берік әрі үйлесімді отбасы қалыптастырады.
Астанада «Жауапты әке – тұрақты қоғамның тірегі» атты қалалық әкелер форумы басталды. Іс-шара отбасы институтын нығайтуға, дәстүрлі отбасылық құндылықтарды дәріптеуге және өскелең ұрпақты тәрбиелеудегі әкенің рөлін арттыруға бағытталған, деп хабарлайды елорда әкімдігінің ресми сайты.
Форум «TANYM» көпфункционалды кешенінде өтіп жатыр. Іс-шараға 300-ге жуық адам қатысуда. Олардың қатарында мемлекеттік органдардың өкілдері, қоғамдық бірлестіктер мүшелері, мектеп директорлары, психологтар және ата-аналар комитеттерінің белсенділері бар.
Форум отбасы қарым-қатынасының маңызы мен ұрпақтар сабақтастығына арналған тағылымды бейнероликпен ашылды.
Пленарлық отырыстың модераторы ретінде «Әкелердің республикалық одағының» елордалық филиалының жетекшісі Бекдайыр Күзембай сөз сөйледі. Ол өз баяндамасында баланың тұлға болып қалыптасуындағы ер азаматтың маңызды рөліне тоқталды.
«Жауапты әке болу – отбасын тек материалдық тұрғыдан қамтамасыз ету ғана емес. Бұл – бала өмірінің алғашқы күндерінен бастап оның өміріне шынайы араласып, уақыт бөліп, көңіл бөліп, қолдау көрсету деген сөз. Біз әрбір ер азаматқа әкенің жеке үлгісі баланың ішкі өзегін қалыптастырып, оның сенімді болашағының негізін қалайтынын еске салғымыз келеді. Саналы әке – дені сау әрі тұрақты қоғамның тірегі», – деді ол.
Сондай-ақ форумның ашылуында Оқу-ағарту министрінің орынбасары Шынар Ақпарова құттықтау сөз сөйлеп, мектеп пен отбасы арасындағы өзара ықпалдастықтың маңызын атап өтті.
Форум бағдарламасына жетекші сарапшылардың қатысуымен өтетін мазмұнды панельдік пікірталастар, TEDx форматындағы қысқа әрі әсерлі дәрістер, сондай-ақ тәжірибелі психологтар мен педагогтардың практикалық кеңестері енгізілген. Қатысушылар отбасыларды әлеуметтік қолдау мәселелеріне және әкелерді білім беру үдерісіне тартудың заманауи тетіктеріне де ерекше назар аударады.
Астанада өзгенің мүлкін бүлдіру жағдайларын анықтау және оның алдын алу жұмысы тұрақты түрде жүргізіліп келеді. Құқық қорғау органдары құқық бұзушылықтардың жолын кесуге және тұрғындардың қала инфрақұрылымына ұқыпты қарау мәдениетін орнықтыруға баса мән беріп отыр, деп хабарлайды елорда әкімдігінің ресми сайты қалалық Полиция департаментіне сілтеме жасап.
Елордада қоғамдық орындарды бақылайтын бейнебақылау жүйесі жұмыс істейді. Қала аумағына тұрақты мониторинг жүргізіледі. Аялдама павильондарындағы камералардың басым бөлігі Жедел басқару орталығына қосылған. Бұл вандализм әрекеттерін дер кезінде анықтап, оған қатысы бар адамдарды табуға мүмкіндік береді. Сонымен қатар полиция тұрғындарға түсіндіру жүргізуде. Бұл үшін дауыс зорайтқыштар мен дрондар қолданылады. Азаматтарға қоғамдық тәртіпті сақтап, ортақ мүлікке жанашырлықпен қарау қажеттігі ескертіледі.
Жыл басынан бері елордада мүлікті бүлдірудің 80-ге жуық дерегі тіркелген. Көбіне аялдама павильондары, орындықтар, қоқыс жәшіктері, жарнама құрылымдары, тұрғын үйлердегі бейнебақылау камералары мен лифт жабдықтары зардап шегеді.
Мәселен, биыл вандалдар бірнеше рет аялдама павильондарын бүлдірген. Кейбір азаматтар есіктерді сындырған, павильон ішіндегі розеткалар мен орындықтарды бүлдірген, шыныларын шағып кеткен. Олардың барлығы жауапқа тартылып, кейбіріне әкімшілік қамау жазасы қолданылған.
Кәмелетке толмағандар арасында да мұндай жағдайлар жиі кездеседі. Балалардың тентектігі немесе абайсыз әрекеті салдарынан қоршаулар, ойын алаңдарының жабдықтары және басқа да инфрақұрылым нысандары бүлінеді. Осындай оқиғалардың бірінде тоғыз жасар бала шлагбаумға секіріп, оны сындырып кеткен. Кейін полиция оның ата-анасын анықтап, келтірілген шығынды өтеуді міндеттеген.
Барлық жағдайда кінәлілер келтірілген залалды өтеп, заң аясында жауап береді. Егер құқық бұзушылықты кәмелетке толмаған бала жасаса, оның әрекеті үшін заңды өкілдері жауапты болады.
Полиция бөтеннің мүлкін қасақана бүлдіргені үшін жауапкершілік қарастырылғанын еске салады. Мұндай жағдайда келтірілген шығын өтеліп, айыппұл салынуы немесе әкімшілік қамау жазасы қолданылуы мүмкін.
Полиция департаменті тұрғындарды мұндай жағдайларға немқұрайлы қарамауға шақырады. Вандализм фактілері байқалған жағдайда дереу «102» нөміріне хабарлау қажет. Сонымен қатар балаларға қоғамдық мүлікке құрметпен қарауды үйретіп, қоршаған ортаға жауапкершілікпен қарау мәдениетін қалыптастыру маңызды.
Қаладағы тәртіп пен тазалықты сақтау – әрбір тұрғынның ортақ міндеті.