Қыркүйектің 5-і – Қазақстан халқы тілдерінің күні. Бұл күн – әрбір азаматқа өз тілін қастерлеудің, рухани байлықты сақтаудың маңызын еске салатын мереке. Қазақ халқы «Өзге тілдің бәрін біл, өз тіліңді құрметте» деп бекер айтпаған.
Ана тілі – ұлттың жүрегі, елдіктің айнасы. Ол – ата-бабамыздың бізге қалдырған аманаты, ұрпаққа берілетін асыл қазынасы. «Тілі жоғалған жұрттың өзі де жоғалады» деген ұлағатты сөздің мәнін ұмытпау – әрбір қазақстандықтың парызы.
Қазақ тілі – тәуелсіздігіміздің тірегі. Оның мәртебесін көтеру – болашағымызды қорғау. «Жеті жұрттың тілін біл, жеті түрлі білім біл» дегендей, өзге тілдерді меңгеру дұрыс, ал ана тіліңді ардақтау – міндет. Себебі туған тіл – адамға қанмен біткен қасиет..
Тіл – халықтың тарихы мен тағдыры. «Ұлттың сақталуына да, жоғалуына да себеп болатын нәрсенің ең қуаттысы – тіл» деп Ахмет Байтұрсынұлы бекер айтпаса керек. Біз ана тілімізді қадірлегенде ғана ұлттық рухымызды биіктетеміз.
Қазақстан халқы тілдерінің күні – елдегі әрбір этностың тіліне құрмет көрсету, бірлік пен ынтымақты дәріптеу мерекесі. Бұл күн – жас ұрпаққа «Тіл – халықтың жаны» екенін ұқтырып, туған тілді ардақтауға тәрбиелеудің тамаша мүмкіндігі. Қазақстан - көп ұлтты мемлекет, бір шаңырақ астында 130-дан астам ұлт өкілдері тату-тәтті өмір сүруде. Олардың әрқайсысының ана тілі мен ата дәстүрі бар. Әлемдегі кез келген халық тәуелсіздікке ұлттық мәдениетін, ана тілін сақтап қалу үшін ұмтылады. Бүгінгі таңда Қазақстанда тұратын басқа ұлт өкілдеріде қазақ тілін меңеруге зейін қойып, еркін меңгеруге талпынып отыр.
«Ана тілің – арың бұл, ұятың боп тұр бетте» дегендей, туған тілді құрметтеу – әрбір азаматтың міндеті мен перзенттік борышы.
Әділет департаменті және оның құрылымдық бөлімдерінде жалпы «Тіл туралы» Заңды жүзеге асыру мақсатында жоспарланған жұмыстар өз ретімен орындалуда, қазақтың тарихын, әдеп-ғұрпын, салт-дәстүрін, мәдениетін, ең бастысы, тілін насихаттайтын іс-шараларбелсенді жүргізіліп тұрады. Қазақстан халқы тілдерінің күні қарсаңында «Тіл – ең қымбат қазына» атты тақырыпта Департамент қызметкерлерінің балаларымен шығарма жазу байқауы ұйымдастырылуда.
Ана тілін ұлықтап, оның мәртебесін арттырып отыратын халықтың егемендігі баянды, тұғыры биік болады. Біздің борышымыз, азаматтық міндетіміз өз тілімізді ұлықтау, бағалау, мәртебесін арттыру.
Исмагулова Г. Ж.
Әкімшілік бөлімінің бас маманы