АҚТӨБЕ ОБЛЫСЫ БОЙЫНША СҰЙЫТЫЛҒАН ГАЗ САУДАСЫНДА ЗАҢБҰЗУШЫЛЫҚ ФАКТІЛЕРІ АНЫҚТАЛДЫ
Ақтөбе облысы бойынша монополияға қарсы департамент "СНПС-Ақтөбемұнайгаз" АҚ-ға қатысты тергеу жүргізді, оның нәтижелері бойынша 2019 жылы сауда биржаларында сұйытылған мұнай газын өткізу кезінде монополиялық жоғары баға белгілеу фактілері анықталды.
Аталған факті бойынша әкімшілік іс қозғау туралы шешім қабылданды. Бұл шешім бойынша Ақтөбемұнайгаз СНПС Нұр-Сұлтан қаласының экономикалық сотына шағымданған. 2021 жылғы 29 қазанда елордалық сот арыз берушінің талаптарын қанағаттандырудан бас тартты. Сот шешімі әлі заңды күшіне енген жоқ.
Сондай-ақ, 2021 жылы "ЖҚС-Лидер" ЖШС газ желісі ұйымының қызметіне жүргізілген тексеру барысында жекеменшік ЖҚС иелеріне сұйытылған газды сатудан бас тартқаны анықталды.
Ұзақ сот талқылауларынан кейін құқық бұзушылық фактісі алдымен экономикалық сотта, содан кейін әкімшілік сотта расталды, «ЖҚС-Лидер" ЖШС-не 5 300 000 теңге айыппұл салынды, айыппұл толық төленді.
Сондай-ақ, осы жылы "АЗС-Лидер" ЖШС және "Еламан" ЖШС газ желісі ұйымдарына қатысты жүргізілген тексеру нәтижелері бойынша осы кәсіпорындардың іс-әрекеттерінде бағалық сөз байласу фактілері анықталды.
Аталған субъектілер әкімшілік жауапкершілікке тартылды:
- "ЖҚС Лидер" компаниясына 1 800 000 теңге айыппұл салынып, 2 200 000 теңге монополиялық табысы тәркіленді;
- "Еламанға" 2 000 000 теңге айыппұл салынды.
Айыппұлдар төленді, монополиялық кіріс толығымен бюджетке салынды.
Қазіргі уақытта Ақтөбе облысында газ 69-80 теңге аралығында сатылады, тапшылық байқалмайды.
Сурет ашық көздерден алынды