Ақмола облысының бірнеше аудандарында көмір бағасын қолдан көтерудің бірнеше фактісі тіркелді. Қара алтын құнының шамадан тыс шарықтап кеткенін Ақмола облысының бәсекелестікті қорғау және дамыту жөніндегі облыстық департаменті анықтаған, - деп хабарлайды «Адырна» ұлттық порталының тілшісі.
Бағаны белгіленген межеден асырып жіберу фактілері Шортанды, Ақкөл, Бұланды және Жарқайың аудандарында орын алған. Ведомствоның берген мәліметтеріне сенсек облыста көмір бағасын шекті бағадан асырып сатқан 8 компания анықталған.
Қазіргі уақытта көмір тасымалымен айналысатын аталған компанияларға қатысты тиісті шара қолданылып, бағалар қайта қалпына келтірілген.
Мәселен Шортанды ауданындағы «Ақ Сұңқар 2000» жауапкершілігі шектеулі серіктестігі «Д» маркалы көмірді 15 200 теңгеден 14 200 теңгеге және 14 500 теңгеден 13 900 теңгеге дейін төмендетті. Сондай-ақ жеке кәсіпкер «Акопян» осыған ұқсас көмір маркасын 16 500 теңгеден 15 мың теңгеге дейін төмендетілді, - дейді департаменттің баспасөз қызметінен.
Департамент алдағы уақытта да көмірдің бағасын реттеу үшін тиісті жұмыстардың жүргізілетінін жеткізді.
Бұл ретте сатып алу бағасы және басқа да шығындар ескерілмек.
“Осылайша, бәсекелесктік ортадағы тиісті баға мөлшері бағдарлана отырып, көмірдің шекті бағасын өз бетінше межелеу практикасы тоқтатылады”, – деп толықтырды ведомстводан.
Абзал АЛПЫСБАЙҰЛЫ,
"Адырна" ұлттық порталы