Солтүстік Қазақстан облысы бойынша Бәсекелестікті қорғау және дамыту агенттігі департаментіне «Вавиот Азия» ЖШС-нен «Солтүстік Қазақстан таратушы электр желілік компаниясы» АҚ-ның («СК РЭК» АҚ) тарапынан бәсекелестікке кедергі келтіру мүмкіндігі туралы өтініш келіп түсті.
Өтініште есепке алу аспаптарына қойылатын заңнамаға қайшы талаптарды мәжбүрлеп енгізу және жаңа қатысушыларды шектеулі ресурстарға жолатпау фактілері көрсетілген.
Өтінішті қарау барысында антимонополиялық орган «СК РЭК» АҚ желілеріне қосылған тұтынушылардың электр қондырғыларында электр энергиясын коммерциялық есепке алу жүйелерін (электр есептегіштерін) қабылдау (пломбалау) қызметтері нарығындағы бәсекелестік жағдайына талдау жүргізді.
Талдау нәтижесінде «СК РЭК» АҚ-ның осы тауар нарығында монополиялық жағдайы бар екені анықталды.
Компания үстем жағдайын пайдалана отырып, «Вавиот Азия» ЖШС сататын есепке алу аспаптарына Қазақстан Республикасының заңнамасында көзделмеген талаптар қою арқылы нарыққа кіруге кедергілер жасағаны белгілі болды.
Осыған байланысты «СК РЭК» АҚ-ның атына Қазақстан Республикасының Кәсіпкерлік кодексінің 174-бабының 10) тармақшасы бөлігінде заңнаманы бұзу белгілерінің бар екендігі жөнінде хабарлама жолданды.
Хабарлама заңмен белгіленген мерзімде толық көлемде орындалды.