Күн мен түннің теңеліп, жер жаһанды жылуымен тербеген Ұлыстың Ұлы күні - Наурыз мейрамымен шын жүректен құттықтаймын.
Тамыры тереңге кеткен әз-Наурыз - еңсесі биік елдіктің, іргесі сөгілмес бірліктің, ырыс пен ынтымақтың мерекесі.
Бабаларымыз «Ұлыс күні қазан толса, ол жылы ақ мол болар, Ұлы кісіден бата алсаң, олжалы жол болар» деген. Бұл күні ұлттық болмысымыз дараланып, ерекше сән-салтанатқа ие болады. Күллі табиғат түрленіп, бусанған Жер Ана ырыздығын төгіп, ақ пейілі мен мейірімін, шуағын төгеді.
Наурыз мейрамы биыл рухани жаңа тыныспен он күн тойланады. Әрбір күннің өз ерекшелігі – көрісу, шежіре айту, тарихты тағылымдау, қайырымдылық жасау сынды халқымыздың ұлттық құдылықтарымен байытылған.
Ежелден жаңару мен жасампаздықтың бастауы, ырыс пен берекенің арқауы болған Ұлыстың Ұлы күні әр шаңыраққа мерейлі шаттық, мол ырыс пен мызғымас ынтымақ сыйласын. Баршаңызға амандық, саулық, молшылық тілеймін.
Еліміздегі тұрақтылық тұғыры бекемделіп, бақ-берекеміз арта берсін.
Ұлыс оң болсын, ақ мол болсын!