Жетісу өңірінде газдандыру жұмыстары қарқын алып, ауыл тұрғындарына заманауи мүмкіндіктер жасалуда. Республика күні қарсаңында шекаралық Панфилов ауданының тағы бір ауылына табиғи газ берілді. Жалпы, аудандағы 40 елді мекеннің 26-сы газдандыруға жатады, бұл жалпы елді мекендер санының 65%-ы. Өткен жылы да ауқымды жұмыстар атқарылды, – деп хабарлайды Жетісу облысы әкімінің баспасөз қызметі.
Газ қосылғанының арқасында ауылдағы 500-ге жуық тұрғын енді экологиялық таза әрі үнемді отынды тұтына алады. Бұл тұрғындардың тұрмыс-тіршілігін едәуір жеңілдетіп, үйлеріне тұрақты жылу берілуіне, өмір сүру сапасын жаңа деңгейге көтеруге мүмкіндік берді. Сонымен қатар бұрынғы қатты отынмен жылытудың машақатынан арылтып, қоршаған ортаға түсетін жүктемені де азайтуға ықпал етеді.
Облыстық энергетика және тұрғын үй-коммуналдық шаруашылық басқармасының мәліметінше, он елді мекенде - Ават, Ынтымақ, Сұптай, Надек, Ақкент, Керімағаш, Қызылжиде, Сарпылдақ, Ақарал және Жиделі ауылдарында жалпы ұзындығы 108,6 км желі арқылы 6,9 мың тұрғынның үйіне газ жеткізілді. Қазіргі уақытта ауданның тағы 12 елді мекенінде құрылыс-монтаж жұмыстары жүргізіліп жатыр. Оларды жыл соңына дейін газға қосуды аяқтау жоспарланған. Алдағы уақытта 60,7 мың тұрғын газға қол жеткізеді, ал желілердің жалпы ұзындығы 682 км-ге жетеді. Сонымен қатар аудан тұрғындарының өтініштерін ескере отырып, 6 елді мекенге газ тартудың жобалық-сметалық құжаттамасын әзірлеу аяқталды. Тұрпан, Садыр, Диханқайрат ауылдарын газдандыруға қатысты мемлекеттік сараптаманың оң қорытындысы алынды. Сарыбел, Басқұншы және Көктал-Арасан ауылдарының жобалары мемлекеттік сараптамадан өткізілуде. Аталған елді мекендерде құрылыс-монтаж жұмыстарын 2027 жылы жүргізу жоспарланған.
Осы ауқымды жұмыстың жалғасы ретінде Алтыүй ауылы газдандырылды. Мамандар ұзындығы 9,9-дан 32 шақырымға дейінгі газ жеткізу құбыры мен ауылішілік тарату желілерін төсеп, сондай-ақ заманауи 7 газ реттеу шкаф пунктін орнатты.
Көптен күткен қуанышты оқиғаға қатысты Алтыүй ауылының тұрғыны Гүлнар Иманбекова әсерін жеткізді:
– Ауылымызға табиғи газ келгені біз үшін нағыз мереке, әрі өмір сүру сапасын жаңа деңгейге көтерген үлкен қуаныш. Бұрын қыс мезгілінде көмір мен отын сатып алу, пеш жағып, күл тазалау сияқты бітпейтін шаруалармен әуреленетінбіз. Енді үйіміз жылы, таза, жайлы. Бір жағынан уақытымыз бен қаражатымыз үнемделсе, екіншіден отбасыларымыздың тұрмысы жеңілдеп, жайлы бола түседі. Ауыл тұрғындарының атынан көрсеткен қамқорлығы және осындай маңызды жобаны жедел жүзеге асырғаны үшін облыс және аудан басшылығына шынайы алғысымды білдіремін, - деді ол.
Атап өтсек, шекара маңындағы аудан тұрғындарын сапалы әрі қолжетімді отынмен қамтамасыз ету жергілікті билік органдарының басым міндеттерінің бірі болып қала береді және бұл жұмыстар облыс басшылығының тұрақты бақылауында.
Бүгінде Жетісу облысында газдандыру деңгейі 67,4 пайызға жетті. Коммуналдық инфрақұрылым 115 елді мекенді қамтып, 468,5 мың тұрғын табиғи газға қол жеткізді. Сонымен қатар тағы 11 ауылда құрылыс жұмыстары жалғасып жатыр.
Жетісу облысы әкімінің баспасөз қызметі
Фотосуреттерді Панфилов ауданының әкімдігі ұсынды
Жетісу облысында Республика күніне орай түрлі салада жемісті еңбек етіп жүрген елуге жуық жетісулық азамат мемлекеттік марапаттарға, сол сияқты «Жетісу облысының Құрметті азаматы» атағына ие болды. Талдықорғандағы Бикен Римова атындағы академиялық драма театры ғимаратында өткен салтанатты жиында наградаларды облыс әкімі Бейбіт Исабаев табыстады, - деп хабарлайды Жетісу облысы әкімінің баспасөз қызметі.
Алдымен сахнаға салтанатты түрде Қазақстанның Мемлекеттік Туы кіргізіліп, Әнұран орындалды. Мұнан соң жиналған көпшілікті өңір басшысы еліміздің басты мерекесі – Республика күнімен құттықтады:
- Республика күні – өткеннен тағылым алып, бүгінгі бағытымызды сараптайтын, келешекке сенімімізді бекемдейтін айрықша мереке. Бұл – туған жерге деген сүйіспеншілікті, Отанға деген адалдықты, елдік мұрат пен ортақ жауапкершілікті терең сезінетін күн. Биыл еліміздің Тәуелсіздігіне 35 жыл толып отыр. Осы мерейлі жыл еліміз үшін ауқымды өзгерістерге толы болды. Мемлекет басшысының ауқымды реформасының нақты нәтижесі ең алдымен халықтың тұрмысынан және өңірлердің дамуынан көрініс табуда. Бұл ретте айтулы нәтижелерге береке-бірлігімен, адал еңбегімен атсалысып жүрген барша жетісулық азаматтарға шынайы алғыс айтамын, - деген Б. Исабаев облыс құрылғаннан бергі өңірдің 4 жылдағы жеткен жетістіктерін атап өтті.
Мұнан кейін марапаттау рәсімі атқарылды.
Атап айтқанда, «Құрмет» орденімен Сарқан ауданындағы «Абылкасымов Б» шаруа қожалығының басшысы Балтабек Әбілқасымов, «Рамазан» шаруа қожалығының басшысы Қайрат Бекиев, Талдықорған қалалық емханасының дәрігері Ләйлә Төлеуханова, Жетісу облысының Дәнеш Рақышев атындағы филармониясының жеке дауыстағы әншісі Абылайхан Хармысов, «Алтынемел» Мемлекеттік ұлттық паркінің бас директоры Қуат Байтұрбаев, ІІІ дәрежелі «Еңбек Даңқы» орденімен Қаратал ауданынан «Нұрсұлтан» шаруа қожалығының жетекшісі Бабай Жанысбаев, «Текелі Су құбыры» кәсіпорнының операторы, Текелі қаласы Марина Коваленко, «Басқуат» серіктестігінің жұмысшысы Валентин Пажитных ие болды. Сол сияқты еңбегі сіңіген тағы бірқатар азаматтарға «Ерен еңбегі үшін», «Шапағат» медальдары, сондай-ақ «Жетісу облысының Құрметті азаматы» атағы берілді.
Марапатталғандар атынан Д.Рақышев атындағы облыстық филармонияның әншісі А. Хармысов сөз алып, барша жерлестерін Республика күнімен құттықтап, тілегін білдірді.
Мерекелік шара жергілікті өнер ұжымдарының концертімен жалғасты.
Еліміздің басты мерекесіне орай шараға арнайы келген және марапат алған тұрғындар пікір білдірді.
- Ауыл шаруашылығы саласында 44 жыл еңбек өтілім бар. Бірнеше жыл мал шаруашылығында мал дәрігері болдым. Кейін жеке шаруашылық ашып, жылқы өсірумен айналысып отырмын. Жүзден астам жылқым бар, 6 адамды жұмыспен қамтып отырмын. Бүгінгі ІІІ дәрежелі «Еңбек Даңқы» орденімен марапатталуым істеген еңбегімнің жемісі деп ойлаймын. Қазір елімізде үлкен өзгерістер болып жатыр. Ауылдық жерлерде жолдар жөнделіп, газ тартылып, емханалар, мектептер салынып жатыр. Ауыл шаруашылығы саласына субсидиялар бөлінеді. Мұның бәрі халықтың игілігіне беріліп отыр. Сондықтан Мемлекет басшысының саясатын қолдап-қуаттаймыз. Барша жетісулықтарға толайым табыс тілеймін, - деді «Нұрсұлтан» шаруа қожалығының жетекшісі Бабай Жанысбаев.
- Медицина саласында 40 жылдай еңбек еттім. Соның 30 жылдай уақытын Текелі қаласының ауруханасында жұмыс істедім, 10 жылдай Талдықорған қаласының емханасында бас дәрігер болдым. Қазір зейнеткермін. Бүгін мені үлкен марапатқа лайық деп сенім білдіріп, награда берген азаматтарға шын жүректен алғыс айтамын. «Құрмет» орденін алу – мен үшін үлкен мәртебе, еңбегіме берілген жоғары баға деп білемін. Барша жұртшылықты Республика күнімен құттықтаймын. Еліміз аман, заманымыз тыныш болсын. Республикамыз көркейіп, гүлдене берсін, - деді медицина саласының ардагері Ләйлә Төлеуханова.
- Кербұлақ ауданы Сарыөзек ауылында тұрамын. «Алацем» зауытында бес жылдан бері дәнекерлеуші әрі токарь болып жұмыс істеймін. Бүгін «Ерен еңбегі үшін» медалімен марапатталдым. Бұл бұдан кейін де жауапкершілігімді арттырып, жұмысымды бар ықыласыммен атқаруыма стимул болып отыр. Адал қызмет еткен адам ешқашан еленбей қалмайды. Сондықтан қатарластарымды белсенді еңбек етуге шақырамын, - деді «Алацем» зауытының жұмысшысы, жас маман Александр Постол.
Жетісу облысы әкімінің баспасөз қызметі.
Фотографтар: Жұмабай Мұсабеков, Қанат Өмірәлинов.
Жетісу облысында медициналық инфрақұрылымды жаңарту жұмыстары жалғасуда. Республика күні қарсаңында Талдықорғанда бір ауысымда 500 адамды қабылдайтын жаңа қалалық емхана пайдалануға беріліп, күрделі жөндеуден кейін Ақсу және Кербұлақ орталық аудандық ауруханалары ашылды. Ауыл тұрғындарына сапалы медициналық қызметтің қолжетімділігін арттыру мақсатында Ескелді ауданында жаңа дәрігерлік амбулатория ашылды, - деп хабарлайды Жетісу облысы әкімінің баспасөз қызметі.
Елтай ауылындағы жаңа дәрігерлік амбулатория бір ауысымда 25 адамды қабылдауға арналған. Ғимаратта балаларды қабылдау, вакцинациялау, ем-шаралар жүргізу, скринингтен өткізу, стоматологиялық көмек көрсету, күндізгі стационар және басқа да медициналық қызметтерге арналған кабинеттер жабдықталған. Осының арқасында ауыл тұрғындары қажетті медициналық көмекті үйіне жақын жерде, анағұрлым қолайлы жағдайда ала алады.
Жаңа медициналық мекеменің ашылуын жергілікті тұрғындар көптен күткенін айтады. 90 жастағы Әуғали Мырзахметов бұрын медициналық көмек 1959 жылы салынған шағын ғимаратта көрсетілгенін жеткізді.
– Мен өмір бойы осы ауылда тұрдым, жақсы медициналық мекеменің жақын жерде болғанының қаншалықты маңызды екенін жақсы білемін. Жаңа амбулаторияның ашылғанына өте қуаныштымыз, өйткені бұл күнді 20 жылдай күттік, бүгінге дейін осы мәселені көтеріп келдік. Бұрын шағын ескі ғимаратқа барып, медициналық көмек алуға тура келетін. Енді ауыл тұрғындары үшін әлдеқайда қолайлы жағдай жасалып отыр. Осындай өзгерістердің Республика күні қарсаңында болып жатқаны ерекше қуантады, – деді ол.
Амбулаторияның ашылуы жас отбасылар үшін де ерекше маңызды. Ауыл тұрғыны Жанаргүл Ермұрат енді болашақ аналар мен балаларға медициналық қызмет көрсету қолайлы бола түсетінін атап өтті.
– Мен үшін, болашақ ана ретінде, жаңа амбулаторияның ашылуы – ерекше қуанышты жайт. Жақында отбасымызда үшінші бала дүниеге келеді. Енді әр дәрігер пациенттерді жеке кабинетте, қолайлы жағдайда қабылдай алады. Бұл болашақ аналарға да, балаларға да, ауылдың барлық тұрғындарына ыңғайлы. Осындай қажетті медициналық нысанның ашылғанына ризамыз, – деді ол.
40 жыл өмірін медицина саласына арнаған Дамира Лятиева да ауыл тұрғындарының қуанышына ортақтасты. Ол еңбек жолында медициналық көмектің қолжетімділігі мен мамандардың жұмыс жағдайының қаншалықты маңызды екенін жақсы түсінеді.
– Медицина менің бүкіл өмірім деуге болады. Сондықтан ауылымызда заманауи амбулаторияның ашылып жатқанына шын жүректен қуаныштымын. Медицина қызметкерлері үшін жұмыс істеуге жақсы жағдай жасалуы керек, өйткені пациенттерге көрсетілетін қызмет сапасы көп жағдайда соған байланысты. Ал тұрғындар үшін ең бастысы – дәрігерге уақытында қаралып, қажетті көмек алуы. Жаңа амбулатория халыққа ұзақ жылдар бойы қызмет етіп, жерлестеріміздің денсаулығын сақтауға ықпал етеді деп ойлаймын, – деді ол.
Соңғы үш жылда Ескелді ауданда 25 әлеуметтік нысан салынды. Оның ішінде 18-і – денсаулық сақтау нысаны.
Атап өтсек, осы күні ауданның тағы бір елді мекені Жалғызағаш ауылында «Ауыл құтқарушылары» ведомстволық бағдарламасы аясында өрт сөндіру бекеті ашылды. Соның арқасында 1230-дан астам адам тұратын Жалғызағаш және Биғаш ауылдары өрттен қорғау шараларымен қамтамасыз етілді.
Жетісу облысы әкімінің баспасөз қызметі
Фотографтар: Жұмабай Мұсабеков, Қанат Өмірәлинов
Республика күні қарсаңында Жетісу облысында 50-ге жуық отбасы қоныс тойын тойлады. Тұрғын үй кезегінде тұрған азаматтарға Талдықорған қаласында, Кербұлақ және Көксу аудандарында пәтерлер мен жеке тұрғын үйлердің кілттері табысталды, – деп хабарлайды Жетісу облысы әкімінің баспасөз қызметі.
Атап айтқанда, Талдықорған қаласында 22 отбасы қоныс тойын тойлап, «Құлагер», «Шығыс» шағынаудандарынан, «Жастар-3» тұрғын алабынан және «Береке» коттедж қалашығынан баспана алды. Жалпы, жыл басынан бері облыс орталығында 639 отбасы қолжетімді баспанамен қамтамасыз етілсе, жыл соңына дейін бұл көрсеткіш 1500-ден асады. Айта кетейік, 9 айда Талдықорған қаласында 92,1 мың шаршы метр тұрғын үй пайдалануға берілді.
– Республика күні қарсаңында отбасымызда қуанышты оқиға болды. Төрт балам бар, баспана күткеніме көп болды. SMS-хабарлама келгенде алғашында тіпті сенбедім. Баршаңызды қоныс тойларыңызбен құттықтаймын, – деп қуанышымен бөлісті қала тұрғыны Ольга Гениевская.
Қоныс тойын тойлағандардың қатарында Көксу ауданының тұрғындары да бар. Оларға Балпық би және Зылиха Тамшыбай ауылдарында орналасқан жеке тұрғын үйлердің кілттері табысталды. Жыл басынан бері Көксу ауданында әлеуметтік осал топтағы 69 азамат баспанамен қамтамасыз етілді.
– Көксу ауданында тұрғын үй кезегіне 2019 жылы тіркелдім. Алты баланы тәрбиелеп отырмын. Облыс әкімінің қолдауымен ауданымызда заманауи үйлер салынып жатыр. Сол үйлердің бірі бізге берілді. Қуанышымды сөзбен жеткізу қиын. Балалар бақытты. Өйткені баспана – әл-ауқаттың басты негізі, – деді Наргиз Қожаназарова.
– Балпық би ауылында тұрамыз. Бүгін отбасымыз жаңа үйдің кілтін алды. Көңілімді қуаныш кернеп тұр. Осы арманымызға жетуімізге көмектескен барша жанға алғыс айтамын. Баршаңызды келе жатқан Республика күнімен құттықтаймын, – деді жерлестеріне Асия Байрамова.
Сарыөзек ауылының тұрғындары да мереке қарсаңында қоныс тойын тойлады. Мұнда апатты деп танылған тұрғын үйлерде тұрған кезекте тұрған 15 азаматқа жаңадан салынған 60 пәтерлі тұрғын үйден пәтер кілттері табысталды. Олардың қатарында Мадина Досан да бар.
– Біздің үйіміз екі жыл бұрын апатты деп танылды. Кезекке сәйкес үш бөлмелі пәтердің кілтін алдым. Жолдасым екеуміз төрт баланы тәрбиелеп отырмыз. Үш қызымыз бен бір ұлымыз бар. Жеке баспанамызға қол жеткізген соң, бұрынғыдан да бақытты бола түстік, – деді ол.
Жалпы, биыл Жетісу облысында 4 600 отбасы баспанамен қамтамасыз етіледі.
Жетісу облысы әкімінің баспасөз қызметі
Фотографтар: Олжас Құрмашев. Сондай-ақ фотосуреттерді Кербұлақ және Көксу аудандарының әкімдіктері ұсынды.
Жетісу облысында жаңартылатын энергетиканы дамыту жұмыстары жалғасуда. Республика күні қарсаңында өңірде қуаты 40 МВт болатын күн электр станциясы іске қосылды. Жаңа нысан пайдалануға берілген соң облыстағы жаңартылатын энергия көздері нысандарының саны 20-ға жетті. Өңірдің электр энергетикасының жалпы белгіленген қуаты 370 МВт болса, оның 291 МВт-ы жаңартылатын энергия көздері нысандарына тиесілі, - деп хабарлайды Жетісу облысы әкімінің баспасөз қызметі.
Панфилов ауданында «Жаркент-2» күн электр станциясы пайдалануға берілді. Құны 5,8 млрд теңгені құрайтын ауқымды инвестициялық жоба өңірдің энергетикалық тәуелсіздігін нығайтуға, экологиялық жүктемені азайтуға, сондай-ақ Қорғас агломерациясындағы тұрғын үйлер мен қарқынды дамып келе жатқан кәсіпорындарды тұрақты әрі таза электр энергиясымен қамтамасыз етуге бағытталған. Салтанатты ашылу рәсіміне облыс әкімінің орынбасары Асет Қанағатов қатысты.
– Жетісу облысының табиғи ресурстары жаңартылатын энергия көздерін дамытуға зор мүмкіндік береді. Осыған байланысты облыс әкімінің басшылығымен өңірде жүйелі жұмыс жүргізілуде. Бүгінде облыста 15 гидроэлектр станциясы, қуаты әртүрлі 2 жел электр станциясы және осы нысанны қоса алғанда 3 күн электр станциясы жұмыс істейді. Бүгінгі күн электр станциясының іске қосылуы генерациялау қуатын арттырып, өңірдің электрмен жабдықтау сенімділігін нығайта алады, - деді А. Қанағатов.
Жоба туралы толығырақ «Jetisu Terra Power» ЖШС директоры Денис Царев баяндап берді.
- Біз қуаты 20 МВт болатын «Жаркент-2» күн электр станциясын іске қостық. Бұл станция жылына 33 млн кВт-қа дейін таза электр энергиясын өндіре алады. Бұл Жаркент қаласы мен оған жақын орналасқан елді мекендерді электр энергиясымен қамтамасыз етуге жеткілікті. Бұл – өңірде жүзеге асырған екінші жобамыз. Наурыз айында осындай көрсеткіштері бар күн электр станциясын іске қосқан болатынбыз. Осылайша, екі станцияның жалпы қуаты 40 МВт-қа жетті, – деді ол.
- Электр энергиясының жетіспеушілігінің алдын алу үшін алдымызда жасыл энергетиканы дамыту мінеді тұр. Осы міндетке орай аумағы 50 гектар жерге 62 мың күн панелі қойылды. Әр панельдің қуаты 650-680 Вт. Таңғы 5-тен кешке дейін энергия өндіреді. Жалпы қуаты – 40 МВт. Станцияда 20 адам жұмыс істейді, - деді станция директоры Серікбай Көбелеков.
Жаңартылатын энергетиканы дамыту өңірдегі басым бағыттардың бірі болып қала береді. 2026-2028 жылдары жалпы қуаты 170 МВт-тан асатын тағы 9 жаңартылатын энергия көздері нысанын пайдалануға беру жоспарланған.
Жетісу облысы әкімінің баспасөз қызметі.
Фотосуреттерді Панфилов ауданының әкімдігі ұсынды.
Республика күні қарсаңында Жетісу облысының Талдықорған қаласында жаңа қалалық емхана ашылды. Бұл медициналық мекеме қаланың қарқынды дамып, жаңа тұрғын үйлер салынып жатқан бөлігінде тұратын халық үшін медициналық көмектің қолжетімділігін арттыруға мүмкіндік береді. Бір ауысымда 500 адам қабылдауға арналған емхана тіркелген 62 мыңға жуық тұрғынға қызмет көрсетеді. Жаңа нысанның ашылу салтанатына Жетісу облысының әкімі Бейбіт Исабаев қатысты, – деп хабарлайды Жетісу облысы әкімінің баспасөз қызметі.
Ашылу салтанатына қатысқан Бейбіт Исабаев жиналған қауымды емхананың ашылуымен құттықтады:
- Мемлекет басшысы Қасым-Жомарт Кемелұлы Тоқаев халықтың өмір сүру сапасын арттыруға, медициналық көмектің қолжетімділігі мен сапасын жақсартуға айрықша мән беріп келеді. Осы бағыттағы міндеттерді жүзеге асыру – біздің өңірлік саясатымыздың басым бағыттарының бірі. Талдықорғанда үшінші емхананың ашылуы – осындай атқарылған жүйелі жұмыстардың нақты нәтижесі. Бұрын бұл ғимарат сот органдарын орналастыру үшін салынып бастаған еді. Алайда облыстар бөлінгеннен кейін оған қажеттілік болмады. Сондықтан жобаны халықтың қажетіне қарай өзгерту туралы шешім қабылданды. Қаланың осы бөлігінде тұрғын үй құрылысының қарқынды жүруіне байланысты халық саны да артып келеді. Осыны ескеріп, үлкен әрі заманауи емхана салуды жөн көрдік. Мұндай емхана өңірде жоқ: іші де, сырты да әдемі, ауласы абаттандырылған, құрал-жабдықтары жаңа заманға сай. Жаңа емхананың ашылуымен баршаңызды құттықтаймын! Бұл маңызды әлеуметтік нысан тұрғындардың игілігі үшін табысты қызмет ете берсін, - деген Б. Исабаев мердігер ұйым басшылығы мен ұжымына құрылыс жұмыстарын сапалы әрі мерзімінде аяқтағаны үшін алғыс айтты.
Емхана заманауи медициналық құралдармен жабдықталған. Мұнда магниттік-резонанстық және компьютерлік томографтар, рентген және маммография аппараттары орнатылған. Сонымен қатар қажетті диагностикалық зерттеулер жүргізуге арналған жеке зертхана қарастырылған.
Облыс әкімінің айтуынша, өңірде медициналық көмектің сапасын арттыру үшін кадр тапшылығы мәселесін шешуге ерекше көңіл бөлінеді. Осыған байланысты облысқа медицина мамандарын тарту мақсатында біржолғы көтермеақы төлеу көзделген. Қалаға жұмысқа барған дәрігерлерге 5 млн теңге, ал ауылдық жерлерге барған мамандарға 10 млн теңге көлемінде қолдау көрсетіледі.
Қабылданып жатқан шаралардың нәтижесінде дәрігер тапшылығы екі еседен астамға қысқарды. Ал 32 медициналық учаскесі жұмыс істейтін жаңа емхананың штаттық бірліктерінің жалпы саны 445. Медициналық мекеме учаскелік қызмет, жалпы практика дәрігерлерінің қабылдауы және бейінді мамандардың консультациялары бар алғашқы медициналық-санитариялық көмек көрсетеді.
Жобада ғимарат ішінде және оған іргелес аумақта қозғалысы шектеулі азаматтардың кедергісіз кіруі мен қауіпсіз жүріп-тұруына қажетті жағдайлар қарастырылған.
Салтанатты рәсімде жаңа ғимараттың символдық лентасы қиылды. Мұнан кейін шараға қатысушылар мен қонақтар емхананың ішін аралап көрді. Облыс әкімі медициналық кабинеттердегі заманауи құрал-жабдықтардың жұмысымен және тұрғындарға көрсетілетін медициналық қызметтердің ұйымдастырылуымен танысты.
Емхана директоры Сәуле Құсмолданованың айтуынша, бұл медицина нысаны отбасылық бағытта.
- Мұнда отбасылық денсаулық орталығы жұмыс істейді. Сол сияқты Талдықорғанда алғаш рет амбулаториялық хирургия орталығы ашылады. Барлық шағын инвозиялық операциялар осы жерде жасалады. Күндізгі стационар, заманауи зертхана да бар, деді Сол.
Жаңа емхананың ашылуына қатысты медицина мамандары, сондай-ақ қала тұрғындары пікір білдірді.
- Өткен жылы жұбайым екеуміз Астанадан Талдықорғанға көшіп келдік. Көтермеақы алдық, бұл жас отбасымызға үлкен қолдау болды. Енді жаңа емханада жұмыс істейміз. Емхана заманауи медициналық жабдықтар орнатылған, сапалы диагностикадан өтуге мүмкіндік бар, барлығы жаңа. Осылайша, қаламызда заманауи медициналық орталық пайда болды, - деді жалпы тәжірибелік дәрігер Ілияс Сәби.
- Жаңа емхана туралы жалпы әсерім өте жақсы. Мұнда көптеген жаңа медициналық аппараттар бар екен. Бұл – жақсы жаңалық. Енді қаламызда сапалы медициналық көмек алудың мүмкіндігі арта түседі, - деді талдықорғандық Анастасия Селеванова.
Жергілікті тұрғын Әният Бейсембекұлы да осындай пікірде:
- Ең бастысы, мұның бәрі халықтың игілігі мен денсаулығын нығайту үшін жасалып жатыр. Өзім осы шағынауданда тұрамын. Енді дәрігердің қабылдауына бару үшін қаланың басқа бөлігіне қатынаудың қажеті болмайды. Бұл емханаға келу маған әлдеқайда ыңғайлы, оның үстіне мұнда бәрі жаңа, - деді ол.
Атап өтсек, бес қабатты жаңа емхана ғимаратының жалпы ауданы 11 562,7 шаршы метр.
Жаңа заманауи медициналық мекеменің ашылуы Жетісу облысының денсаулық сақтау жүйесін дамытудағы және өңірдің әлеуметтік инфрақұрылымын жаңғырту бағытындағы кезекті қадам деуге болды.
Жалпы, Жетісу облысы құрылғаннан бері өңірде 149 жаңа медициналық нысан салынды. Оның 59-ы «Ауылдық денсаулық сақтауды жаңғырту» ұлттық жобасы аясында бой көтерді. Сонымен қатар 15 медициналық нысанға күрделі жөндеу жүргізілді. Соңғы 4 жылда әлеуметтік сала инфрақұрылымын жаңғырту деңгейі 55,8%-ға жетті.
Жетісу облысы әкімінің баспасөз қызметі
Фотографтар: Жұмабай Мұсабеков, Қанат Өмірәлинов
Жетісу облыс құрылғаннан бері білім беру нысандарының 41,8 % жаңғыртылды. Биыл 5 жаңа мектеп пайдалануға беріліп, 2 білім ошағы күрделі жөндеуден өтті. Солардың бірі - дарынды балаларға арналған «Білім-Инновация» мамандандырылған лицей-интернатының 300 орынды заманауи жаңа оқу ғимараты Республика күні қарсаңында пайдалануға берілді. Талдықорған қаласында орналасқан бұл білім ордасының ашылу салтанатына облыс әкімі Бейбіт Исабаев, ардагер ұстаздар, мектеп ұжымы, оқушылар мен ата-аналар қатысты, - деп хабарлайды Жетісу облысы әкімінің баспасөз қызметі.
Өңір басшысы көпшілікті айтулы жаңалықпен құттықтады:
- Соңғы үш жылда жетісулық оқушылар халықаралық олимпиадалар мен зияткерлік конкурстарда 73 медаль иеленді. Аталған марапаттардың 27-сі, яғни 40% тікелей осы лицей шәкірттеріне тиеcілі. Бұл айтулы көрсеткіш – лицейде қалыптасқан сапалы білім беру дәстүрі мен ұстаздардың кәсіби еңбегінің айқын көрінісі. Бүгінгі оқушы – ертеңгі ел тірегі. Сондықтан біз жастардың терең білім алуына, жеке тұлға ретінде жан-жақты дамуына қажетті жағдай жасауды жалғастырамыз, - деді Б.Исабаев.
Мектептің лентасы қиылып, жиналған көпшілік ғимараттың ішкі мүмкіндіктерімен танысты. Облыс басшысы география, тарих, қазақ тілі, роботтехника кабинеттерін аралап көрді. Сол сияқты фоеде қойылған лицей оқушылары жетістіктерінің көрмесімен танысты. Осы жерде халықаралық пән олимпиадаларының жеңімпаздарымен тілдесті. «Мемлекет басшысы парасатты, оқитын, ізденімпаз, технологияны, жасанды интеллектті меңгерген, зерделі ұрпақ қалыптастыруға барлық жағдай жасау туралы міндет қойып отыр. Соған сай ел көлемінде, соның ішінде облыста да үлкен жобалар іске асырылып жатыр. Сіздер де осы үрдістен қалмай, республикадағы ең беделді, өзінің тарихы бар мектеп лицейінде жақсы оқып, үлкен жетістіктерге жете беріңдер, үлкен азамат болып өсіңдер», - деді облыс басшысы.
Осы күні лицей оқушыларына «Кітап оқитын ұлт» жобасына енгізілген кітаптар тізіміндегі 60 жинақ сыйға тартылды.
Мектеп директоры Айбек Аширметовтің айтуынша, «Талдықорған дарынды балаларға арналған «Білім-Инновация» мамандандырылған мектеп-лицейі 1993 жылы құрылған.
- Осы уақыттан бері білім мекемесін 1,5 мыңға жуық түлек бітіріп шықты. Өткен жылы бітірген 48 оқушының бәрі жоғары оқу орындарына оқуға түстін. Мұнда оқыту қазақ, орыс, ағылшын, түрік тілдерінде жүреді. Бүгінгі ашылып отырған жаңа ғимаратта 37 кабинет бар, соның ішінде лингвистикалық кабинет және зертханалар жабдықталған. Бұл оқушылардың жетістіктерін еселей түсуге үлкен ықпал етеді, - дейді А.Аширметов.
Мектепте 100-ден астам адам жұмыс істесе, соның 37-сі – педагог. Солардың бірі жас маман Мирас Медетұлы елеулі қуанышқа орай пікір білдірді:
- Мен осы білім мекемесіне биылғы оқу жылында жас маман болып келіп отырмын. Биология пәнінен сабақ беремін. Бұл мектепте жараталыстану пәндері ағылшын тілінде өтеді, сондықтан биология пәні де ағылшын тілінде жүреді. Өзім Өскемен қаласындағы «Білім-инновация» мектеп-лицейін бітірдім, кейін І. Жансүгіров атындағы Жетісу университетінде оқыдым. Алғашқы еңбек жолымды осы лицейден бастап жатқаныма қуаныштымын, - деді ол.
Жаңа оқу ғимаратының ашылғанына ата-аналар да риза.
- Бүгін біз үшін ерекше күн. «Білім-инновация» мектебінің жаңа ғимараты ашылды. Менің ұлым Жайдар Ескендір бастауышта қаладағы Абай атындағы №1 мектепте, 5-6 сыныптарды № 20 лицейде оқыды, сол алған сапалы білімінің арқасында 7 сыныпта осы мектепке қабылданды. Қазір 11 сыныпта, бұл өте жауапты кезең. Осы жылда жаңа оқу корпусы қолданысқа берілгеніне қуаныштымын. Ішін аралап көрдік әдемі, жайлы, кең, үлкен ғимарат. Жаңа корпустың құрылысына атсалысқан барша азаматтарға ата-аналар атынан алғыс айтамыз, - деді Шынар Ахмадиева.
Атап өтсек, мектеп-лицейде 266 оқушы оқиды. Соның бірі - Әділет Бекмолда.
- Мен 7 сыныптан бері осы мектепте оқимын. Алдыңғы жылы лицей президенті болдым. Лицей өміріне белсене қатысамын. Республикалық олимпиадалар мен ғылым жобалар байқауының үш мәрте жүлдегерімін. Бүгін лицей тарихының жаңа белесі басталды деп білеміз. Отыз жылдан астам уақытта қалыптасқан білім мен тәрбие құндылықтары жаңа ғимаратта жалғасын табады. Менің ойымша, бізден кейінгі өсіп келе жатқан інілеріміз үшін бұл ғимарат керемет мүмкіндіктер береді. Болашақта осы жерден алған білімімді елдің игілігіне арнаймын деп ойлаймын, - дейді Әділет Бекмолда.
Еске салсақ, бұл «Білім-Инновация» мамандандырылған лицей-интернатының оқу ғимаратының құрылысы 2025 жылы мамырда басталған болатын.
Жетісу облысы әкімінің баспасөз қызметі.
Фотографтар: Қанат Өмірәлинов, Жұмабай Мұсабеков.
Жетісу облысында соңғы үш жыл ішінде әлеуметтік нысандарды жаңғырту деңгейі орта есеппен 55,8%-ға жетіп, 276 нысан жаңарды. Соның ішінде биыл 35 әлеуметтік нысанның құрылысы жүргізілсе, 7 мекеме күрделі жөндеуден өтуде. Келесі жылы ашылатын объектілер қатары да арта түспек. Бұл туралы Кербұлақ ауданының тұрғындарымен болған кездесуі кезінде облыс әкімі Бейбіт Исабаев айтты, - деп хабарлайды Жетісу облысы әкімінің баспасөз қызметі.
Өз баяндамасында өңір басшысы халықтың өмір сүру сапасына тікелей әсер ететін әлеуметтік саланы қолдау шараларына кеңінен тоқталды. Мәселен, биыл білім саласында 4 мектеп қолданысқа беріліп, 2 мектепке күрделі жөндеу жүргізілсе, солардың бірі – Кербұлақ ауданы Көксай ауылында орналасқан 60 орындық мектеп. Аталған білім беру нысаны 19 қазан күні пайдалануға берілді. Ал денсаулық сақтау саласында 4 нысан іске қосылған, соның ішінде қайта жаңғыртылып, жуырда ашылған Кербұлақ аудандық ауруханасы да бар. Аурухана жаңа медициналық құралдармен толық қамтылған. Бұл ретте өңір басшысы аудан әкіміне келесі жылдың бюджетіне Қоғалы ауылдық ауруханасын ағымдағы жөндеуге бюджеттік өтінім әзірлеуді тапсырды.
Атап өтсек, Талдықорған қаласында 500 келушіге арналған жаңа емхананың құрылысы және көпсалалы облыстық балалар ауруханасын жөндеу жұмыстары аяқталды. Бұдан бөлек, облыс орталығында мүгедектігі бар адамдарға арналған 150 орындық оңалту орталығы салынуда.
- Биыл облыста 3 мәдениет үйі мен 2 кітапхана пайдалануға берілді. Оның біреуі – сіздердің ауданда, Сарыөзек ауылындағы кітапхана. Президенттің бастамасымен қолға алынып отырған аса маңызды «Кітап оқитын ұлт» жобасын іске асыру аясында Сарыөзектегі жаңа кітапхана 53 мыңнан астам кітап қорымен және заман талабына сай электронды кітаптармен жабдықталды. Жалпы, адамның логикалық ойлау қабілетін, парасат-пайымын, аналитикалық талдауын дамыту үшін кітап оқудың пайдасы үлкен. Сондықтан әсіресе жастар кітап оқуы керек, - деген Б. Исабаев аудан әкіміне кітапхана ғимаратын қысқа мерзімде табиғи газға қосуды тапсырды.
Сондай-ақ, Қоғалы ауылдық мәдениет үйінің материалдық-техникалық базасын нығайтуға және абаттандыруға биыл «Қазақстан халқына» қорынан қаржы бөлінген. Жұмыстарды келесі жылы көктемде аяқтау жоспарланып отыр.
Облыс әкімі сонымен қатар спорт саласындағы жаңа нысандарға да тоқталды. Атап айтқанда, Алакөл ауданының Қабанбай ауылында 80 орындық спорт кешені ашылып, Қаратал ауданының Үштөбе қаласында демеуші қаражаты есебінен дзюдо орталығы салынған. Бұдан бөлек, «Қазақстан халқына» қоры есебінен облыста дене шынықтыру-сауықтыру кешенінің және мүмкіндігі шектеулі азаматтарға арналған инклюзивті спорт орталығының құрылысы жүргізіліп жатыр.
- Жалпы алғанда биыл 35 әлеуметтік нысанның құрылысы жүргізілді, келесі жылы да бұл қарқын бәсеңдемейді, салынып, жөнделетін нысандар қатары артады. Бұл Мемлекет басшысының бастамасымен еліміз тұрақты экономикалық, әлеуметтік, рухани толысу жолына түскенін көрсетеді. Бүкіл Қазақстан бойынша өте үлкен жобалар жүзеге асырылып жатыр. Мұның бәрі халықтың игілігіне, жас ұрпақ игілігіне атқарылып отыр - деді Б. Исабаев.
Жетісу облысы әкімінің баспасөз қызметі.
Фотограф: Жұмабай Мұсабеков.
Жетісу облысында Сарыөзек ауылын айналып өтетін жол төселді. Аталған айналма жол Кербұлақ ауданы тұрғындарының өтінішіне сәйкес салынды. Сол сияқты биыл жалпы ұзындығы ауылдардың 11 шақырым болатын 9 көшесіне орташа жөндеу жүргізілсе, келесі жылы Кербұлақ ауданының 5 ауылында көше жолдары жөнделеді. Сонымен қатар Байғазы ауылындағы көпірдің жөндеу жұмыстары аяқталды. Бұл туралы аудан халқымен кездесуі барысында өңір басшысы Бейбіт Исабаев айтты, - деп хабарлайды Жетісу облысы әкімінің баспасөз қызметі.
Облыс әкімінің айтуынша, жол инфрақұрылымын дамыту бағытында өңірде жүйелі жұмыстар жалғасуда. Мәселен, «Алматы – Өскемен» автомобиль жолының Алматы облысының шекарасынан Талдықорған қаласына дейінгі учаскесінде және Талдықорған қаласының айналма жолдарында жалпы ұзындығы 159 км қамтитын орташа және күрделі жөндеу жобалары іске асырылуда. Бүгінгі күнге жөндеу 103 шақырымда аяқталды, қалған учаскелерде жұмыстар келесі жылы жалғасатын болады.
- Өткен жылы «Сарыөзек – Қорғас» бағытындағы республикалық маңызы бар автомобиль жолының құрылысы бітті. Ал биыл «Алацем» зауыты өз қаражаты есебінен «Сарыөзек-Көктал» автожолының бойында ұзындығы 38 шақырым болатын жүк көліктерінің қозғалысына арналған техникалық жол төсеуде. Сонымен қатар жаңадан салынған жолдарға шамадан тыс жүктеме түсірмеу үшін аталған жолдың 7-ші және 51-ші шақырымдарында автоматтандырылған өлшеу станциялары орнатылған. Сол сияқты тұрғындардың өтінішіне сәйкес Сарыөзек ауылын айналып өтетін 7 шақырым жол салынды, - деді Б. Исабаев.
Облыс әкімі жаңа бір станцияны «Сарыөзек-Алматы» тас жолының бойында орнату керектігін айтып, «Қазавтожол» мекемесінің жергілікті филиалы басшылығына келесі жылға бюджеттік өтінім әзірлеуді тапсырды.
- Жалпы, облыста жол инфрақұрылымын дамыту бағытында атқарылған жұмыстардың нәтижесінде жыл соңына дейін облыстық маңызы бар автомобиль жолдарының жақсы жағдайдағы үлесі жыл соңына қарай 97%-ға жуықтайды. Біз ендігі кезекте негізгі назарды ауылдардың ішкі көше жолдарын жөндеуге бағыттаймыз, - деді облыс басшысы.
Жетісу облысы әкімінің баспасөз қызметі.
Фотограф: Жұмабай Мұсабеков
Бүгін облыс әкімі Бейбіт Исабаев Кербұлақ ауданының тұрғындарымен кездесу өткізді. Онда өңір басшысы облыста атқарылып жатқан жұмыстарға тоқталып, алдағы мақсат-міндеттер жөнінде баяндады. Сондай-ақ аудан әкіміне ауыл шаруашылығын, өңдеу өнеркәсібін, инфрақұрылымды, туризмді және басқа да маңызды салаларды дамыту жөнінде нақты тапсырмалар берді, - деп хабарлайды Жетісу облысы әкімінің баспасөз қызметі.
Өңір басшысының айтуынша, 2026 жылғы 9 айдың қорытындысы бойынша облыс экономикасының негізгі салаларында өсім қамтамасыз етіліп, қысқа мерзімді экономикалық индикатор 105%-ды құрады. 2026-2028 жылдары облыстың агроөнеркәсіптік кешенінде жалпы құны 299 млрд. теңгені құрайтын
18 инвестициялық жоба жүзеге асырылады деп жоспарланса, соның екеуі биыл іске қосылған. Оның бірі - Кербұлақ ауданындағы «Агрохолдинг Жетісу» серіктестігі іске 1,4 мың гектар алқаптағы 21 дана жаңбырлатып суғару құрылғысын іске қосты. Сол сияқты ауданда биыл басталып, 2028 жылы аяқталатын суару жүйелерін қайта жаңғырту жобаларының нәтижесінде Қоғалы, Онжас, Аралтөбе ауылдарының 33 шақырым каналдары қалпына келтіріліп, 2,5 мың гектар жер қайта айналымға енгізілетін болады. Облыста заманауи су үнемдеу технологиялары 45,5 мың гектарға енгізілген, оның 9,3 мың гектары Кербұлақ ауданында, яғни үлесі - 20,4%.
Сондай-ақ Бейбіт Исабаев өз сөзінде су, газ, жол инрақұрылымдарын дамыту, әлеуметтік нысандар құрылысы және басқа да маңызды мәселелерге тоқталды.
Бұл ретте өңір басшысы шалғайда жатқан Қоғалы ауылына назар аударылып, бірқатар маңызды жобалар қолға а
лынатынын айтты. Атап айтқанда, Қоғалы ауылында ауыз су жүйесін жаңғырту, ауылдық ауруханасын ағымдағы жөндеу қарастырылады.
Облыс басшысы сөзінің қорытындысында аудан әкіміне пайдаланылмай жатқан жерлерді қайтару, оларды қайта айналымға қосу, «Ауыл аманаты» бағдарламасының мүмкіндіктерін пайдалана отырып, өңдеу саласын дамыту туралы тапсырмалар берді. Сонымен қатар туризм саласын да назардан тыс қалдырмау керектігін жеткізді. Бұл ретте ауданда орналасқан «Алтынемел» ұлттық табиғи паркінің жұмысымен шектелмей, жеке инвесторларды тарту арқылы тау және экотуризм бағыттарын жандандырып, аудан экономикасын дамыту мүмкіндіктерін қарастыру қажеттігін айтты.
- Жалпы, облыс құрылған кезде Кербұлақ ауданында басты үш мәселе бар болатын - ауыз су, апатты үйлер және Сарыөзек ауылының айналма жолы. Бұл мәселелерге қатысты түбегейлі шаралар қабылдадық. Соның нәтижесінде ауыз су мәселесі шешілді, айналма жол салынды, апатты үйлерде тұратын азаматтарға жаңадан салынған 60 пәтерлі тұрғын үй берілді, тағы бір осындай үйдің құрылысы аяқталды. Жалпы, Мемлекет басшысының алдымызға қойып отырған басты міндеті - халықтың жұмыс істеуіне жағдай жасау. Соған сай жаңа жұмыс орындарын ашу, жеңілдетілген несиелер беру, «Ауыл аманаты» бағдарламасының, кооперативтер құрудың мүмкіндіктерін кеңінен түсіндіру қажет. Аудан әкімі халықпен ашық тілдесіп, қарапайым, түсінікті тілде диалог құра білуі керек, – деген Б. Исабаев аудан басшылығына тиісті тапсырмалар берді.
Осы күні Бейбіт Исабаев азаматтарды жеке мәселелері бойынша қабылдады. Онда көтерілген мәселелер тұрғын үй, газдандыру мәселелеріне қатысты болды. Бұл мәселелердің заң аясындағы шешімі түсіндіріліп, жауапты тұлғаларға нақты тапсырмалар берілді.
Жетісу облысы әкімінің баспасөз қызметі.
Фотограф: Жұмабай Мұсабеков