Республика күні қарсаңында Жетісу облысында 50-ге жуық отбасы қоныс тойын тойлады. Тұрғын үй кезегінде тұрған азаматтарға Талдықорған қаласында, Кербұлақ және Көксу аудандарында пәтерлер мен жеке тұрғын үйлердің кілттері табысталды, – деп хабарлайды Жетісу облысы әкімінің баспасөз қызметі.
Атап айтқанда, Талдықорған қаласында 22 отбасы қоныс тойын тойлап, «Құлагер», «Шығыс» шағынаудандарынан, «Жастар-3» тұрғын алабынан және «Береке» коттедж қалашығынан баспана алды. Жалпы, жыл басынан бері облыс орталығында 639 отбасы қолжетімді баспанамен қамтамасыз етілсе, жыл соңына дейін бұл көрсеткіш 1500-ден асады. Айта кетейік, 9 айда Талдықорған қаласында 92,1 мың шаршы метр тұрғын үй пайдалануға берілді.
– Республика күні қарсаңында отбасымызда қуанышты оқиға болды. Төрт балам бар, баспана күткеніме көп болды. SMS-хабарлама келгенде алғашында тіпті сенбедім. Баршаңызды қоныс тойларыңызбен құттықтаймын, – деп қуанышымен бөлісті қала тұрғыны Ольга Гениевская.
Қоныс тойын тойлағандардың қатарында Көксу ауданының тұрғындары да бар. Оларға Балпық би және Зылиха Тамшыбай ауылдарында орналасқан жеке тұрғын үйлердің кілттері табысталды. Жыл басынан бері Көксу ауданында әлеуметтік осал топтағы 69 азамат баспанамен қамтамасыз етілді.
– Көксу ауданында тұрғын үй кезегіне 2019 жылы тіркелдім. Алты баланы тәрбиелеп отырмын. Облыс әкімінің қолдауымен ауданымызда заманауи үйлер салынып жатыр. Сол үйлердің бірі бізге берілді. Қуанышымды сөзбен жеткізу қиын. Балалар бақытты. Өйткені баспана – әл-ауқаттың басты негізі, – деді Наргиз Қожаназарова.
– Балпық би ауылында тұрамыз. Бүгін отбасымыз жаңа үйдің кілтін алды. Көңілімді қуаныш кернеп тұр. Осы арманымызға жетуімізге көмектескен барша жанға алғыс айтамын. Баршаңызды келе жатқан Республика күнімен құттықтаймын, – деді жерлестеріне Асия Байрамова.
Сарыөзек ауылының тұрғындары да мереке қарсаңында қоныс тойын тойлады. Мұнда апатты деп танылған тұрғын үйлерде тұрған кезекте тұрған 15 азаматқа жаңадан салынған 60 пәтерлі тұрғын үйден пәтер кілттері табысталды. Олардың қатарында Мадина Досан да бар.
– Біздің үйіміз екі жыл бұрын апатты деп танылды. Кезекке сәйкес үш бөлмелі пәтердің кілтін алдым. Жолдасым екеуміз төрт баланы тәрбиелеп отырмыз. Үш қызымыз бен бір ұлымыз бар. Жеке баспанамызға қол жеткізген соң, бұрынғыдан да бақытты бола түстік, – деді ол.
Жалпы, биыл Жетісу облысында 4 600 отбасы баспанамен қамтамасыз етіледі.
Жетісу облысы әкімінің баспасөз қызметі
Фотографтар: Олжас Құрмашев. Сондай-ақ фотосуреттерді Кербұлақ және Көксу аудандарының әкімдіктері ұсынды.
Жетісу облысында соңғы үш жыл ішінде әлеуметтік нысандарды жаңғырту деңгейі орта есеппен 55,8%-ға жетіп, 276 нысан жаңарды. Соның ішінде биыл 35 әлеуметтік нысанның құрылысы жүргізілсе, 7 мекеме күрделі жөндеуден өтуде. Келесі жылы ашылатын объектілер қатары да арта түспек. Бұл туралы Кербұлақ ауданының тұрғындарымен болған кездесуі кезінде облыс әкімі Бейбіт Исабаев айтты, - деп хабарлайды Жетісу облысы әкімінің баспасөз қызметі.
Өз баяндамасында өңір басшысы халықтың өмір сүру сапасына тікелей әсер ететін әлеуметтік саланы қолдау шараларына кеңінен тоқталды. Мәселен, биыл білім саласында 4 мектеп қолданысқа беріліп, 2 мектепке күрделі жөндеу жүргізілсе, солардың бірі – Кербұлақ ауданы Көксай ауылында орналасқан 60 орындық мектеп. Аталған білім беру нысаны 19 қазан күні пайдалануға берілді. Ал денсаулық сақтау саласында 4 нысан іске қосылған, соның ішінде қайта жаңғыртылып, жуырда ашылған Кербұлақ аудандық ауруханасы да бар. Аурухана жаңа медициналық құралдармен толық қамтылған. Бұл ретте өңір басшысы аудан әкіміне келесі жылдың бюджетіне Қоғалы ауылдық ауруханасын ағымдағы жөндеуге бюджеттік өтінім әзірлеуді тапсырды.
Атап өтсек, Талдықорған қаласында 500 келушіге арналған жаңа емхананың құрылысы және көпсалалы облыстық балалар ауруханасын жөндеу жұмыстары аяқталды. Бұдан бөлек, облыс орталығында мүгедектігі бар адамдарға арналған 150 орындық оңалту орталығы салынуда.
- Биыл облыста 3 мәдениет үйі мен 2 кітапхана пайдалануға берілді. Оның біреуі – сіздердің ауданда, Сарыөзек ауылындағы кітапхана. Президенттің бастамасымен қолға алынып отырған аса маңызды «Кітап оқитын ұлт» жобасын іске асыру аясында Сарыөзектегі жаңа кітапхана 53 мыңнан астам кітап қорымен және заман талабына сай электронды кітаптармен жабдықталды. Жалпы, адамның логикалық ойлау қабілетін, парасат-пайымын, аналитикалық талдауын дамыту үшін кітап оқудың пайдасы үлкен. Сондықтан әсіресе жастар кітап оқуы керек, - деген Б. Исабаев аудан әкіміне кітапхана ғимаратын қысқа мерзімде табиғи газға қосуды тапсырды.
Сондай-ақ, Қоғалы ауылдық мәдениет үйінің материалдық-техникалық базасын нығайтуға және абаттандыруға биыл «Қазақстан халқына» қорынан қаржы бөлінген. Жұмыстарды келесі жылы көктемде аяқтау жоспарланып отыр.
Облыс әкімі сонымен қатар спорт саласындағы жаңа нысандарға да тоқталды. Атап айтқанда, Алакөл ауданының Қабанбай ауылында 80 орындық спорт кешені ашылып, Қаратал ауданының Үштөбе қаласында демеуші қаражаты есебінен дзюдо орталығы салынған. Бұдан бөлек, «Қазақстан халқына» қоры есебінен облыста дене шынықтыру-сауықтыру кешенінің және мүмкіндігі шектеулі азаматтарға арналған инклюзивті спорт орталығының құрылысы жүргізіліп жатыр.
- Жалпы алғанда биыл 35 әлеуметтік нысанның құрылысы жүргізілді, келесі жылы да бұл қарқын бәсеңдемейді, салынып, жөнделетін нысандар қатары артады. Бұл Мемлекет басшысының бастамасымен еліміз тұрақты экономикалық, әлеуметтік, рухани толысу жолына түскенін көрсетеді. Бүкіл Қазақстан бойынша өте үлкен жобалар жүзеге асырылып жатыр. Мұның бәрі халықтың игілігіне, жас ұрпақ игілігіне атқарылып отыр - деді Б. Исабаев.
Жетісу облысы әкімінің баспасөз қызметі.
Фотограф: Жұмабай Мұсабеков.
Жетісу облысында Сарыөзек ауылын айналып өтетін жол төселді. Аталған айналма жол Кербұлақ ауданы тұрғындарының өтінішіне сәйкес салынды. Сол сияқты биыл жалпы ұзындығы ауылдардың 11 шақырым болатын 9 көшесіне орташа жөндеу жүргізілсе, келесі жылы Кербұлақ ауданының 5 ауылында көше жолдары жөнделеді. Сонымен қатар Байғазы ауылындағы көпірдің жөндеу жұмыстары аяқталды. Бұл туралы аудан халқымен кездесуі барысында өңір басшысы Бейбіт Исабаев айтты, - деп хабарлайды Жетісу облысы әкімінің баспасөз қызметі.
Облыс әкімінің айтуынша, жол инфрақұрылымын дамыту бағытында өңірде жүйелі жұмыстар жалғасуда. Мәселен, «Алматы – Өскемен» автомобиль жолының Алматы облысының шекарасынан Талдықорған қаласына дейінгі учаскесінде және Талдықорған қаласының айналма жолдарында жалпы ұзындығы 159 км қамтитын орташа және күрделі жөндеу жобалары іске асырылуда. Бүгінгі күнге жөндеу 103 шақырымда аяқталды, қалған учаскелерде жұмыстар келесі жылы жалғасатын болады.
- Өткен жылы «Сарыөзек – Қорғас» бағытындағы республикалық маңызы бар автомобиль жолының құрылысы бітті. Ал биыл «Алацем» зауыты өз қаражаты есебінен «Сарыөзек-Көктал» автожолының бойында ұзындығы 38 шақырым болатын жүк көліктерінің қозғалысына арналған техникалық жол төсеуде. Сонымен қатар жаңадан салынған жолдарға шамадан тыс жүктеме түсірмеу үшін аталған жолдың 7-ші және 51-ші шақырымдарында автоматтандырылған өлшеу станциялары орнатылған. Сол сияқты тұрғындардың өтінішіне сәйкес Сарыөзек ауылын айналып өтетін 7 шақырым жол салынды, - деді Б. Исабаев.
Облыс әкімі жаңа бір станцияны «Сарыөзек-Алматы» тас жолының бойында орнату керектігін айтып, «Қазавтожол» мекемесінің жергілікті филиалы басшылығына келесі жылға бюджеттік өтінім әзірлеуді тапсырды.
- Жалпы, облыста жол инфрақұрылымын дамыту бағытында атқарылған жұмыстардың нәтижесінде жыл соңына дейін облыстық маңызы бар автомобиль жолдарының жақсы жағдайдағы үлесі жыл соңына қарай 97%-ға жуықтайды. Біз ендігі кезекте негізгі назарды ауылдардың ішкі көше жолдарын жөндеуге бағыттаймыз, - деді облыс басшысы.
Жетісу облысы әкімінің баспасөз қызметі.
Фотограф: Жұмабай Мұсабеков
Бүгін облыс әкімі Бейбіт Исабаев Кербұлақ ауданының тұрғындарымен кездесу өткізді. Онда өңір басшысы облыста атқарылып жатқан жұмыстарға тоқталып, алдағы мақсат-міндеттер жөнінде баяндады. Сондай-ақ аудан әкіміне ауыл шаруашылығын, өңдеу өнеркәсібін, инфрақұрылымды, туризмді және басқа да маңызды салаларды дамыту жөнінде нақты тапсырмалар берді, - деп хабарлайды Жетісу облысы әкімінің баспасөз қызметі.
Өңір басшысының айтуынша, 2026 жылғы 9 айдың қорытындысы бойынша облыс экономикасының негізгі салаларында өсім қамтамасыз етіліп, қысқа мерзімді экономикалық индикатор 105%-ды құрады. 2026-2028 жылдары облыстың агроөнеркәсіптік кешенінде жалпы құны 299 млрд. теңгені құрайтын
18 инвестициялық жоба жүзеге асырылады деп жоспарланса, соның екеуі биыл іске қосылған. Оның бірі - Кербұлақ ауданындағы «Агрохолдинг Жетісу» серіктестігі іске 1,4 мың гектар алқаптағы 21 дана жаңбырлатып суғару құрылғысын іске қосты. Сол сияқты ауданда биыл басталып, 2028 жылы аяқталатын суару жүйелерін қайта жаңғырту жобаларының нәтижесінде Қоғалы, Онжас, Аралтөбе ауылдарының 33 шақырым каналдары қалпына келтіріліп, 2,5 мың гектар жер қайта айналымға енгізілетін болады. Облыста заманауи су үнемдеу технологиялары 45,5 мың гектарға енгізілген, оның 9,3 мың гектары Кербұлақ ауданында, яғни үлесі - 20,4%.
Сондай-ақ Бейбіт Исабаев өз сөзінде су, газ, жол инрақұрылымдарын дамыту, әлеуметтік нысандар құрылысы және басқа да маңызды мәселелерге тоқталды.
Бұл ретте өңір басшысы шалғайда жатқан Қоғалы ауылына назар аударылып, бірқатар маңызды жобалар қолға а
лынатынын айтты. Атап айтқанда, Қоғалы ауылында ауыз су жүйесін жаңғырту, ауылдық ауруханасын ағымдағы жөндеу қарастырылады.
Облыс басшысы сөзінің қорытындысында аудан әкіміне пайдаланылмай жатқан жерлерді қайтару, оларды қайта айналымға қосу, «Ауыл аманаты» бағдарламасының мүмкіндіктерін пайдалана отырып, өңдеу саласын дамыту туралы тапсырмалар берді. Сонымен қатар туризм саласын да назардан тыс қалдырмау керектігін жеткізді. Бұл ретте ауданда орналасқан «Алтынемел» ұлттық табиғи паркінің жұмысымен шектелмей, жеке инвесторларды тарту арқылы тау және экотуризм бағыттарын жандандырып, аудан экономикасын дамыту мүмкіндіктерін қарастыру қажеттігін айтты.
- Жалпы, облыс құрылған кезде Кербұлақ ауданында басты үш мәселе бар болатын - ауыз су, апатты үйлер және Сарыөзек ауылының айналма жолы. Бұл мәселелерге қатысты түбегейлі шаралар қабылдадық. Соның нәтижесінде ауыз су мәселесі шешілді, айналма жол салынды, апатты үйлерде тұратын азаматтарға жаңадан салынған 60 пәтерлі тұрғын үй берілді, тағы бір осындай үйдің құрылысы аяқталды. Жалпы, Мемлекет басшысының алдымызға қойып отырған басты міндеті - халықтың жұмыс істеуіне жағдай жасау. Соған сай жаңа жұмыс орындарын ашу, жеңілдетілген несиелер беру, «Ауыл аманаты» бағдарламасының, кооперативтер құрудың мүмкіндіктерін кеңінен түсіндіру қажет. Аудан әкімі халықпен ашық тілдесіп, қарапайым, түсінікті тілде диалог құра білуі керек, – деген Б. Исабаев аудан басшылығына тиісті тапсырмалар берді.
Осы күні Бейбіт Исабаев азаматтарды жеке мәселелері бойынша қабылдады. Онда көтерілген мәселелер тұрғын үй, газдандыру мәселелеріне қатысты болды. Бұл мәселелердің заң аясындағы шешімі түсіндіріліп, жауапты тұлғаларға нақты тапсырмалар берілді.
Жетісу облысы әкімінің баспасөз қызметі.
Фотограф: Жұмабай Мұсабеков
Жетісу облысында Кербұлақ ауданын газдандыруға жататын 26 елді мекеннің барлығына көгілдір отын жеткізілді. Атап айтқанда, Сарыөзек ауылынан 80 шақырым қашықтықта орналасқан Қоғалы ауылына дейін магистралды газ құбыры тартылып, 21 ауылға газ жеткізілді. Дегенмен бүгінде тұрғындардың газға қосылу көрсеткіші төмен. Осыған байланысты облыс әкімі Бейбіт Исабаев халықпен кездесу барысында аудан әкіміне абоненттерді газға қосу жұмыстарын жеделдетуді тапсырды, – деп хабарлайды Жетісу облысы әкімінің баспасөз қызметі.
- Тұрғын үйлерді табиғи газға қосу үшін тиісті техникалық құжаттаманы рәсімдеуді, газға қосу жұмыстарын жандандыруды, сондай-ақ әлеуметтік нысандарды газбен қамтамасыз ету жұмысын күшейтуді тапсырамын. Сондай-ақ аудан тұрғындарының өтініші бойынша өңірді газдандыру схемасына енгізілмеген 6 елді мекенді - Сарыбастау, Қарашоқы, Арқарлы, Сәмен, Шилісу, Малайсары ауылдары газдандыруға арналған жобалық-сметалық құжаттама әзірленді. Келесі жылы құрылыс жұмыстарын бастау үшін тиісті ұсыныс республикалық бюджетке жолданды. Нәтижесінде 2028 жылы ауданның 32 елді мекені немесе 31 мың тұрғын табиғи газға қол жеткізеді, – деді Б. Исабаев.
Сонымен қатар алдағы уақытта облыста газ тапшылығының алдын алу мақсатында Алматы облысындағы Қазбек станциясынан Сарыөзекке дейінгі магистралды газ құбырының екінші желісін (лупинг) салуға арналған жобалық-сметалық құжаттама әзірленді.
– Биыл үйімізге газ кіргіздік. Бұрын көмір мен отын дайындап, күл шығаратынбыз. Мұның бәрі көп әуре еді. Ал қазір қажет кезде газды қосасың, үй ысып кетсе, өшіріп қоясың, үйді өзіңе қажетті температурада ұстауға мүмкіндік бар. Бөлмелер жылы әрі таза күйде тұрады. Жерлестеріме де газға қосылуға кеңес беремін. Газ қосылғанда үйге жылумен қатар, қолайлылық пен жайлылық та келді, – деді Сарыөзек ауылының тұрғыны Айман Ысқаққызы.
Жетісу облысы әкімінің баспасөз қызметі
Фотограф: Жұмабай Мұсабеков
Жетісу облысы құрылғаннан бері орталық сумен жабдықтау деңгейі 93% ға жетті. Бұл ретте халықты ондаған жылдар бойы толғандырған суға қатысты күремеуі қиын мәселелер шешімін тапты. Соның бірі - Сарыөзек ауылын үздіксіз сумен қамтамасыз ету мәселесі толық шешілді, енді шалғайдағы Қоғалы ауылының су жүйесі жаңғыртылады. Бұл туралы облыс әкімі Бейбіт Исабаев Кербұлақ ауданының халқымен кездесуі барысында айтты, - деп хабарлайды Жетісу облысы әкімінің баспасөз қызметі.
Сол сияқты өңір басшысы өз сөзінде биыл ауданда жүргізілген ауыз сумен қамтамасыз ету жұмыстарына тоқталды.
- Жылдар бойы өзекті мәселе болған Сарыөзек ауылының ауыз су мәселесі шешімін тапты. Былтырғы кездесуде мен сіздерге жобаны 2026 жылы аяқтаймыз деп уәде берген болатынмын. Жоба аясында 110 шақырым жаңа су құбыры жүргізіліп, 3 169 абонентке ауыз су берілді. Әлеуметтік және коммерциялық нысандар да жаңа жүйеге қосылды. Енді аудан әкіміне келесі жылдың бюджетіне Қоғалы ауылының ауыз су құбырын жаңғыртуға өтінім әзірлеуді тапсырамын, - деді Б.Исабаев.
Жалпы, ауданда 63 елді мекеннің 59 елді мекені орталықтандырылған ауыз су жүйесімен қамтылған. Биыл Алтынемел, Көктал, Көксай ауылдарындағы ауыз су жүйелеріне ағымдағы жөндеу жұмыстары жүргізілді.
Ауыз су мәселесінің шешілгеніне қатысты тұрғындардың пікірін мынадай.
- Бұрын су мәселесі өзекті болған. Биыл су жаңа жүйеге қосылғалы, үздіксіз ағып тұр. Үйге газ тартылды. Сусыз оны қосу мүмкін болмас еді. Кір жуатын машина, басқа да техникалар жұмыс істеп тұр. Сарыөзекте тұрып жатқаныма отыз жылдан асты. Жұбайым аудандық ауруханада акушер маман болып жұмыс істейді. Өзім де сол ауруханада жұмыс істегенмін, қазір зейнеткермін. Көмір дайындау, от жағып, күл шығару қиындығынан құтылдық. Үйде жылу, су – барлық жағдай бар, - дейді Саоыөзек ауылының тұрғыны Қабікен Анықбаев.
- Біз осы жаңа тұрғын ауданда тұрып жатқанымызға алты жыл болды. Төрт жылдай судың қиындығын көрдік, флякпен тасыдық. Енді бұл мәселе шешілді, краннан су тоқтаусыз ағады. Газымыз үйге кіргізілген. Қазір қаладағы үйлердің жағдайынан бір мысқал кем емес жайлы жағадайда өмір сүріп жатырмыз, - деп пікір білдірді Шолпан Тынышбайқызы.
Сондай-ақ тұрғындардың өтінішіне сәйкес Малайсары бекетіндегі көп қабатты 4 тұрғын үйдің кәріз жүйесіне ағымды жөндеу жұмыстары жүргізіліп жатыр. Бұл жұмыстар биылғы жылдың қараша айында аяқталады.
- Біз осы Малайсарыдағы кәріз жүйесінің мәселесін 2025 жылы облыс әкімінің алдында көтердік. Ол кезде аудан әкіміне осы мәселеге қатысты нақты тапсырма берді. Биылғы көктемде құрылыс жұмыстары басталды. Мердігер ұйым өкілдері қараша айында бітіреміз деді, - деп атап өтті Малайсары станциясының тұрғыны Марат Шымболатұлы.
Атап өтсек, биыл облыстың 11 елді мекенінде ауыз сумен қамту жұмыстары жүргізілуде, соның 8-інде жыл соңына дейін аяқталады, 3 елді мекендегі жұмыстар келесі жылы жалғасады.
Жетісу облысы әкімінің баспасөз қызметі.
Фотограф: Жұмабай Мұсабеков,
2026 жылғы 7 қазаннан бастап жоғары оқу орнын үздік аяқтаған, яғни GPA көрсеткіші 3.33 және жоғары түлектер eqyzmet.gov.kz порталы арқылы мемлекеттік қызметтегі төменгі бос лауазымдармен танысып, өтінім бере алады.
🔎 Инфографикамен танысып, eQyzmet порталындағы "Түлектерге арналған бос лауазымдар" бөлімінің мүмкіндіктерін пайдаланыңыз.
☎️ Қосымша сұрақтар туындаған жағдайда ҚР Мемлекеттік қызмет істері Агенттігінің Жетісу облысы бойынша Департаментке хабарласуға болады: +7(7282)240688, +77073010071.
@elgeqyzmet.gov.kz
ҚР Мемлекеттік қызмет істері Агенттігінің Жетісу облысы бойынша департаменті
Республика күні қарсаңында Жетісу облысында бейімделген ғимараттың орнына жаңа мектеп пайдалануға берілді. Осылайша, биыл өңірде 5 жаңа мектептің құрылысы аяқталып, тағы 2 мектепке күрделі жөндеу жұмыстары жүргізілді. Облыс құрылғаннан бері 24 жаңа білім беру нысаны салынып, 27 нысанға күрделі жөндеу жүргізілді. Сонымен қатар бейімделген ғимараттарда орналасқан мектептер саны екі есе азайды, - деп хабарлайды Жетісу облысы әкімінің баспасөз қызметі.
Жаңа мектеп Кербұлақ ауданының Көксай ауылында пайдалануға берілді. Бұған дейін мектеп 1970 жылдардың соңында салынған, бейімделген бір қабатты ғимаратта орналасқан еді. Онда асхана мен спорт залы болмаған. Ал ғимарат салынғалы бері тек ағымдағы жөндеу жұмыстары жүргізілген.
- Біздің мектеп 60 орынға арналған. Бұрынғы ғимараттың салынғанына 50 жылдан астам уақыт болғандықтан, қазіргі талаптарға сай келмеді. Енді оқушыларымыз пәндік кабинеттермен, спорт және акт залдарымен, кітапхана және зертханалармен жабдықталған заманауи мектепте білім алады. Қазіргі уақытта мектебімізде 20 мұғалім жұмыс істейді, оның бесеуі – жас маман. Мектепте 51 бала оқиды, - деді Көксай негізгі мектебінің директоры Әсем Сарыбаева.
Лента қию рәсімінен кейін іс-шараға қатысушылар мен ауыл тұрғындары жаңа мектептің ішін аралап көрді.
Жаңа мектеп туралы ұстаздар, оқушылар мен ата-аналар пікір білдірді.
- Көксай мектебінде 38 жыл еңбек еттім. Жаңа мектептің ашылуы – бәріміз үшін, тұтас ауыл үшін үлкен қуаныш. Әрине, барлық қажетті құрал-жабдықтармен қамтылған заманауи мектепте бізге, ұстаздарға, жұмыс істеу әлдеқайда қолайлы болады. Мен өскелең ұрпақтың тәрбиесіне бұдан былай да үлесімді қоса беремін, – деді мектеп мұғалімі Рауза Сқақбаева.
- Бұл мектепте менің балаларым оқыды, енді немерелерім білім алып жүр. Барлық ауылдастарымды құттықтаймын! Балаларымыз жаңа мектепте жақсы оқысын, – деді ауыл тұрғыны Коку Даева.
- Ескі мектеп қыста салқын болатын, ал жаңа мектеп жылы, жайлы әрі жарық. Мұнда арнайы кабинеттер мен сан түрлі жабдықтар бар. Енді олимпиадалар мен байқауларға қатысуға мүмкіндігіміз молайды. Біз мектебіміздің мәртебесін көтеруге бпар күш-жігерімізді саламыз, - деді мектеп оқушысы Сания Асхатқызы.
9-сынып оқушысы Сайдхасан Балтаев та осындай пікірде:
- Жаңа мектеп ескі мектептен әлдеқайда үлкен. Жеке спорт залы мен заманауи жабдықталған түрлі кабинеттері бар. Білім алуға жағдай әлдеқайда жақсарды. Біз де жақсы оқуға тырысамыз, – деді ол.
Атап өтсек, биыл өңірде Панфилов ауданының Сұптай ауылында, Текелі қаласының Рудничный ауылында, Ақсу ауданының Көлтабан ауылында және Кербұлақ ауданының Көксай ауылында жаңа мектептер пайдалануға берілді. Сондай-ақ Көксу ауданының Бозтоған ауылындағы Мұсабек атындағы және Ескелді ауданының Елтай ауылындағы С. Сейфуллин атындағы мектептерге күрделі жөндеу жұмыстары жүргізілді.
Бұдан бөлек, Қаратал ауданының Үштөбе қаласында 600 орынды жаңа мектептің құрылысы жүргізілуде. Сонымен қатар қайтарылған активтер есебінен Көксу ауданының Балпық би ауылында 600 орындық мектеп салынып жатыр.
Жетісу облысы әкімінің баспасөз қызметі
Фотограф: Қанат Өмірәлинoв
Жетісу облысы Кербұлақ ауданының тұрғындары сапалы медициналық көмекке қол жеткізу мүмкіндігіне ие болды. Енді қажетті тексерулерден өтіп, ем-домды аудан аумағында алуға болады. Республика күні қарсаңында Сарыөзек ауылында күрделі жөндеу жұмыстары жүргізіліп, сейсмикалық күшейтуден өткен орталық аудандық аурухана ашылды. Жалпы, соңғы үш жылда ауданның ауылдық елді мекендерінде 19 жаңа денсаулық сақтау нысаны салынып, пайдалануға берілді, - деп хабарлайды Жетісу облысы әкімінің баспасөз қызметі.
Кербұлақ аудандық орталық ауруханасының стационарлық бөлімі 1986 жылы салынған. Ғимарат пайдалануға берілгеннен бері күрделі жөндеу жүргізілмеген. Жүргізілген жұмыстар стационарлық медициналық көмек көрсету жағдайларын жақсартуға, пациенттер мен медицина қызметкерлері үшін қолайлы орта қалыптастыруға, сондай-ақ мекеменің материалдық-техникалық базасын нығайтуға мүмкіндік береді. Жаңартылған ғимарат 120 төсек-орынға арналған.
- Біздің аурухана - аудан тұрғындарына алғашқы медициналық-санитариялық және мамандандырылған медициналық көмек көрсететін көпбейінді медициналық ұйым. Мұнда терапиялық, хирургиялық және травматологиялық көмек көрсетіледі. Аурухана құрылымына перзентхана, педиатрия, инфекциялық және басқа да бөлімшелермен қатар, диагностика және реанимация бөлімдері кіреді, - деді Кербұлақ аудандық ауруханасының директоры Жанета Нұрманбетова.
Аудандық орталық аурухананы жаңғыртудың басты игіліктерінің бірі – мұнда медициналық жабдықтар жаңартылды.
Мекемеде кадр мәселесіне де ерекше көңіл бөлінген.
Мұнда 83 бірлік медициналық техника, сондай-ақ 601 дана жиһаз бен төсек-орын жабдықтары сатып алынды. Қазіргі уақытта ауруханада компьютерлік томограф, рентген, маммограф және ультрадыбыстық зерттеу (УЗИ) аппараттары толыққанды жұмыс істеп тұр. Осылайша аудан тұрғындарына заманауи диагностикалық қызмет көрсетіледі. Бұл - өңір халқының өмір сүру сапасын арттыруға бағытталған жүйелі жұмыстың нәтижесі.
Мекемеде кадр мәселесіне де ерекше көңіл бөлінген. Кадрлық әлеуетті нығайту мақсатында 2024 жылдан бері ауданға 14 дәрігер жұмысқа келді.
- Мен аудандық ауруханада жас маманмын, эндокринолог дәрігер болып жұмыс істеймін. Маған 10 млн теңге көлемінде біржолғы көтермеақы берілді, бұл бізге - үлкен қолдау. Сонымен қатар баспана мәселесі де шешілді. Мұндай мемлекеттік қолдау ауылдық жерлерді білікті медицина мамандарымен қамтамасыз етуге мүмкіндік береді деп ойлаймын. Ендігі менің басты міндетім – өзіме артылған сенімді ақтау. Өз тарапымнан пациенттерге сапалы медициналық көмек көрсету үшін бар күшімді салып келемін. Осы тұрғыдан алғанда, аурухананың жаңартылуы да жұмысымызға үлкен қолдау болып отыр, - деді Айдана Маратқызы.
Жаңартылған аурухана туралы жергілікті тұрғындар пікір білдірді. Солардың қатарында Сарыөзек ауылының тұрғыны Жанат Ахметова да бар:
– Менің төрт қызымның төртеуі де осы ауруханада дүниеге келді. Әрине, соңғы жылдары аурухана ғимараты ескіріп, тозған болатын, сондықтан күрделі жөндеу жасағаны жақсы болды. Ауруханамыз заманауи кейіпке енді, жаңа құрал-жабдықтар әкелінді. Ауданға дәрігерлер, жаңа мамандар келіп жатқанына қуаныштымыз. Жалпы алғанда, мұның бәрі тұрғындардың денсаулығын жақсартуға оң әсер етеді деп сенеміән, - деді ол.
Бұл пікірге ауыл тұрғыны Сламбай Тоқабаев та қосылды:
- Ауруханамыз ашылғалы бері, яғни осыдан 40 жылдай уақыт бұрын салынғаннан бері күрделі жөндеу жүргізілмеген. Мысалы, бұрын стационарға емделуге келгенде іші қараңғы, бәрі ескі болатын. Тіпті, кейде жазылып шығатыныңа деген сенім де азаятын. Қазір бәрі өзгерді: іші жарық әрі жайлы. Сонымен қатар барлық қажетті медициналық жабдықтар орнатылған. Бұрын компьютерлік томографиядан (КТ) өту үшін Талдықорғанға баруға тура келетін. Енді бұл мәселе де шешілді. Бұған қоса, мемлекеттік қолдаудың арқасында ауданымызға білікті дәрігерлер келді, – деп ой бөлісті ауыл тұрғыны.
Кербұлақ аудандық орталық ауруханасының жаңартылып, қолданысқа берілуі ауданның денсаулық сақтау саласын дамытудағы маңызды кезең деуге болады. Медицина мамандарының жұмысына және пациенттердің ем алуына заманауи жағдай жасау медициналық қызмет сапасын арттыруға әрі тұрғындарға уақытылы көмек көрсетуге бағытталған.
Еске салсақ, бұған дейін Ақсу ауданындағы орталық аудандық аурухана да күрделі жөндеу мен сейсмикалық күшейту жұмыстарынан кейін пайдалануға берілген болатын.
Жетісу облысы әкімінің баспасөз қызметі.
Фотограф: Қанат Өмірәлинов
Жетісу облысындағы «Алтынемел» мемлекеттік ұлттық табиғи паркінде өткен «Алтынемел – құландар мекені» туристік және мәдени-экологиялық фестиваліне мыңнан астам адам жиналды. Қатысушылар қатарында Ұлыбритания, Үндістан, Франция, Ресейден, соның ішінде Якутиядан қонақтар, сондай-ақ Астана, Алматы, Талдықорған қалалары мен Алматы облысының тұрғындары бар. Биыл фестиваль алғаш рет республикалық деңгейде ұйымдастырылды. Фестиваль аясында спорттық жүгіру жарыстары, этномәдени қойылымдар, ежелгі петроглифтерге экскурсиялар өткізіліп, құландарды табиғи мекенінде тамашалау мүмкіндігі жасалды. Бүгінде табиғи парктегі құландар саны 3500 бастан асқан, - деп хабарлайды Жетісу облысы әкімінің баспасөз қызметі.
Фестивальге облыс әкімінің орынбасары Марлен Көлбаев, ҚР Туризм және спорт министрлігінің өкілдері, travel-блогерлер, инфлюнсерлер, жалпы экологиялық туризмге қызығушылар қатысты. Ұйымдастырушылар - «Алтынемел» мемлекеттік ұлттық табиғи паркі, облыстық туризм басқармасы, «Vizit Zhetysu» туристік ақпараттық орталығы.
Ұйымдастырушылардың айтуынша, фестивальдің мақсаты – өңірдің туристік әлеуетін насихаттау.
- Бұл фестиваль – Туризм және спорт министрлігінің ірі мәдени-туристік іс-шаралар күнтізбесіне енгізілген үш шараның бірі. Оның ауқымы жыл сайын кеңейіп келеді. Негізгі мақсаты – келушілерді ұлттық парктің бірегей табиғи және тарихи-мәдени мұрасымен таныстыру, сирек кездесетін жануарларды қорғауға назар аудару және табиғатты аялаудың маңызын насихаттау. Жалпы, облыс әкімі Бейбіт Исабаевтың басшылығымен өңірде туризмді дамытуға қажетті шаралар қабылданып, туристік инфрақұрылымды жетілдіруге ерекше көңіл бөлінуде. Соның нәтижесінде Жетісу облысына жыл сайын 2 милиондай турист келеді, – деді Марлен Көлбаев.
Биыл фестиваль Шолақ тауларының бөктерінде 5 және 10 шақырымдық эко-жарыспен басталды. Жарысқа қатысушылар белсенді демалыс пен экологиялық мәдениетті ұштастыра отырып, тау ландшафтары аясында жүгірді. Жарыс жеңімпаздары арнайы медальдармен марапатталды.
Осы күні ұлттық парктегі визит орталық алаңында далалық рухтағы мәдени шаралар көрермен назарына ұсынылды. Атап айтқанда, кеушілер фестиваль сахнасынан «Қылыш айналдыру», «Айбалта шоуын» тамашалап, көшпелілердің жауынгерлік дәстүрі көпшілікке паш етілді. Сол сияқты өнерпаздар ұлттық аспаптарда өнер көрсетті.
Фестиваль қонақтары Шолақ тауларындағы ежелгі петроглифтерге экскурсияға барып, мыңдаған жыл бұрын жартастарға қашалған, Жетісудың көне тарихынан сыр шертетін суреттер мен таңбаларды көрді.
Сол сияқты визит-орталық алаңында петроглифтер мен көне түркі жазуына және дәстүрлі қолөнерге арналған шеберлік сабақтары, балаларға арналған ойындар мен квесттер өткізіліп, қолөнер бұйымдарының жәрмеңкесі ұйымдастырылды.
Сөйтіп, фестиваль табиғатпен бірге тыныстай отырып, ұлттық мәдениетті тануға, туған өлкенің тарихын сезінуге мүмкіндік беретін мәдени-танымдық алаңға айналады.
Келген қонақтар іс-шара туралы ой-пікірлерін білдірді.
- «Алтынемел» ұлттық паркіне визит-орталық ашылғанда бірінші рет келгенмін. Бүгін екінші мәрте келіп отырмын. Осы фестивальдің өтетіні туралы Инстаграм әлеуметтік желісінен көріп, күйеуім екеуіміз Алматыдан арнайы келдік. Таңертең 5 шақырымдық кросқа қатыстық. Маршрут өте қызық болды. Өзім жартасқа өрмелеумен айналысамын, сондықтан спорттық шараға қатысу аса қиындық туғызған жоқ. Бүгінгі фестивальда этникалық атмосфера бар, ежелгі тарих туралы сан қилы фантазияға берілдік, көне көшпелі халықтардың тынысын сезіндік. Сондықтан бұл сапар маған ерекше әсер етті, - дейді алматылық Дарья Никишина.
- Туристік компания өкілімін. Ұлттық паркке алғаш рет келіп отырмын. Өзіміз туристік салада жүргеннен кейін Қазақстанның табиғаты мен тарихын үйлестірген осындай көрнекті жерлерін насихаттауға атсалысайық деген ойымыз бар, оның үстіне фестивальді тамашаласақ, құландарды көрсек деп келдік. Өзім SMM маманымын, менімен бірге дронмен түсірілім жасаушы азамат бірге келді, біз бейнежазбалар түсіріп, осы парктің мүмкіндіктерін барынша кең таратсақ дейміз, - дейді Гүлдана Қаршигина.
Келушілердің ішінде шетелдік азаматтар да бар.
Ұлттық парк мамандары бір кездері саны күрт азайып, Қазақстанның Қызыл кітабына енгізілген құландардың бүгінде «Алтынемелде» арнайы бағдарлама негізінде саны көбейтіліп, ол парктің табиғи символдарының біріне айналғанын айтады.
- Бүгінгі фестивальға келушілерге құландарды табиғи ортада тамашалауға мүмкіндік жасалып отыр. Бір атап өтерлігі, 1982 жылы небәрі 32 құлан болса, биыл олардың саны 3 571 басқа жетті. Бұл – табиғатты қорғау жұмыстарының нақты нәтижесі және сирек кездесетін жануарлар популяциясын қалпына келтірудің жарқын үлгісі, – дейді «Алтынемел» мемлекеттік ұлттық табиғи паркінің директоры Қуат Байтұрбаев.
Жалпы, өңірде туризм саласын дамыту 5 дестинацияға негізделген, соның бірі – ұлттық парктер. Былтыр «Алтынемел» мемлекеттік ұлттық табиғи паркіне 32 мың адам келсе, соның 11 мыңы – шетелдіктер.
Жетісу облысы әкімінің баспасөз қызметі.
Фотограф: Бекен Нұрхан.