ТЖД тұрғындарды су айдындарындағы қауіпсіздік ережелерінің талаптарын сақтауға шақырады

Жетісу облысы бойынша суға шомылу кезінде пайдалануға болатын барлығы 46 ашық су айдындары бар (4 көл, 18 өзен, 8 су қоймасы, 16 тоған), олардың негізгілері Алакөл және Балқаш көлдерінің жағалаулары. Қазіргі таңда адамдардың су айдындарында қауіпсіздігін қамтамасыз ету үшін 18 құтқарушы бекет және 4 медициналық пункт құрылды. Адамдардың судағы қауіпсіздігін қамтамасыз ету мақсатында Жетісу облысының Төтенше жағдайлар департаменті жергілікті атқарушы органдармен және Полиция департаментімен өзара іс-қимыл жасай отырып, алдын ала бекітілген жоспарларға сәйкес жергілікті халық арасында үгіт-насихат жұмыстарын жүргізуде.

Сонымен қоса облыс аумағында 140 ескерту белгілері және су айдындарындағы қауіпсіз жүріс-тұрыс ережелері көрсетілген 4 көрнекі стенд орнатылды. Сондай-ақ судағы қауіпсіздік ережелерін сақтау бойынша 25 мың дана жадынама дайындалды.

Осыған байланысты ел азаматтарының назарын су айдындарындағы қауіпсіздік ережелерінің талаптарын сақтауға аударып, бірінші кезекте тыйым салынатын әрекеттерді атап өтсек:

- суға алкогольдік немесе есірткілік мас күйінде шомылуға;

- қайықтардан, айлақтардан, сондай-ақ осы мақсаттарға бейімделмеген құрылыстардан суға секіруге;

- тексерілмеген және жабдықталмаған жерлерде сүңгуге;

- жүзу шекараларын белгілейтін қалқымалардан тыс жүзуге;

- жүзуге арналмаған заттармен жүзуге;

- техникалық және ескерту белгілеріне, қалтқыларға көтерілуге;

- ересектердің қарауынсыз балаларға суға түсуге тайым салынады.

 

Жетісу облысы бойынша ТЖД