«Жамбыл облысы әкімінің аппараты» коммуналдық мемлекеттік мекемесі туралы ЕРЕЖЕ

Жамбыл облысы әкімдігінің 2022 жылғы   25 тамыздағы № 199 қаулысымен бекітілген

 

 

«Жамбыл облысы әкімінің аппараты»

коммуналдық мемлекеттік мекемесі туралы

ЕРЕЖЕ

 

 

1 тарау. Жалпы ережелер

 

  1. «Жамбыл облысы әкімінің аппараты» коммуналдық мемлекеттік мекемесі (бұдан әрі – Аппарат) әкімнің қызметін ақпараттық-талдау тұрғысынан, ұйымдық-құқықтық және материалдық-техникалық жағынан қамтамасыз етуді жүзеге асыратын Қазақстан Республикасының мемлекеттік органы болып табылады.
  2. Аппарат өз қызметін Қазақстан Республикасының Конституциясына және заңдарына, Қазақстан Республикасының Президенті мен Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.
  3. Аппарат мемлекеттік мекеменің ұйымдық-құқықтық нысанындағы заңды тұлға болып табылады, Қазақстан Республикасының Мемлекеттік Елтаңбасы бейнеленген мөрі, қазақ және орыс тілдерінде өз атауы бар мөртаңбалары, белгіленген үлгідегі бланкілері, Қазақстан Республикасының заңнамасына сәйкес қазынашылық органдарында шоттары болады.
  4. Аппарат азаматтық-құқықтық қатынастарға өз атынан түседі.
  5. Егер Қазақстан Республикасының заңнамасына сәйкес осыған уәкілеттік берілген болса, аппараттың мемлекет атынан азаматтық-құқықтық қатынастардың тарапы болуға құқығы бар.
  6. Аппарат өз құзыретіндегі мәселелер бойынша заңнамада белгіленген тәртіппен Аппарат басшысының бұйрықтарымен және Қазақстан Республикасының заңнамасында көзделген басқа да актілермен ресімделетін шешімдер қабылдайды.
  7. Аппараттың құрылымы мен штат санының лимиті Қазақстан Республикасының заңнамасына сәйкес бекітіледі.
  8. Заңды тұлғаның орналасқан жері: 080000, Жамбыл облысы, Тараз қаласы, Абай даңғылы, 125.
  9. Осы Ереже Аппараттың құрылтай құжаты болып табылады.
  10. Аппараттың қызметін қаржыландыру Қазақстан Республикасының заңнамасына сәйкес жергілікті бюджеттен жүзеге асырылады.
  11. Аппаратқа кәсіпкерлік субъектілерімен Аппараттың өкілеттігі болып табылатын міндеттерді орындау тұрғысында шарттық қатынастарға түсуге тыйым салынады.

Егер Аппаратқа заңнамалық актілермен кірістер әкелетін қызметті жүзеге асыру құқығы берілсе, онда алынған кірістер, егер Қазақстан Республикасының заңнамасымен өзгеше белгіленбесе, мемлекеттік бюджетке жіберіледі.

 

 

2-тарау. Мемлекеттік органның мақсаттары мен өкілеттіктері

     

  1. Мақсаттары:

1) облыс әкімінің қызметін ақпараттық-талдау және құқықтық қамтамасыз ету;

2) облыс әкіміне қаржылық, шаруашылық және материалдық-техникалық қызмет көрсету;

3) Қазақстан Республикасының заңнамасында белгіленген өзге де міндеттер.

  1. Өкілеттіктері:

1) құқықтары:

барлық меншік нысанындағы мемлекеттік органдардан, кәсіпорындардан, мекемелер мен ұйымдардан облыс әкімінің құзыретіне жатқызылған мәселелер бойынша қажетті ақпарат, ауызша және жазбаша түсініктемелер алу;

жергілікті атқарушы органдарда, Мемлекет басшысының, облыс әкімдігінің және облыс әкімінің актілері мен тапсырмаларының орындалу жағдайына тексеру жүргізу, анықталған бұзушылықтар мен кемшіліктерді жоюды талап ету, тиісті лауазымды тұлғалардың ауызша түсініктемелерін тыңдау және жазбаша түсініктемелерін талап ету;

облыс әкіміне жергілікті атқарушы органдардың басшыларын тәртіптік жауапкершілікке тарту туралы ұсыныстар енгізу;

аппараттың құзыретіне жататын мәселелер бойынша мемлекеттік органдармен және ұйымдармен қызметтік хат алмасуды жүргізу;

басқармалардың, департаменттердің және басқа да облыстық қызметтердің алқа отырыстарына, комиссияларына, кеңестеріне қатысу;

басшылықтың тапсырмасы бойынша Мемлекеттік органдардың, кәсіпорындар мен ұйымдардың қызметкерлерін облыс әкімдігінің құзыретіне жатқызылған мәселелерді шешуге қатысуға тарту.

2) міндеттері:

Қазақстан Республикасының Конституциясын және заңнамасын сақтау;

азаматтар мен заңды тұлғалар құқықтарының, бостандықтары мен заңды мүдделерінің сақталуын және қорғалуын қамтамасыз ету;

облыс әкімі қызметінің ашықтығын қамтамасыз ету;

мемлекеттік көрсетілетін қызметтерді уақытылы және сапалы көрсетуді қамтамасыз ету;

облыс әкімдігінің ақпаратына қол жеткізуді қамтамасыз ету;

Қазақстан Республикасының заңнамасында белгіленген өзге де міндеттер.

  1. Функциялар

1) Жамбыл облысының әлеуметтік-экономикалық даму, ақпараттық даму және халықаралық ынтымақтастық, ақпараттық-коммуникациялық технологияларды (бұдан әрі-АКТ) дамыту бағыттары бойынша әкімнің қызметін ақпараттық – талдамалық қамтамасыз ету;

2) Қазақстан Республикасы Заңдарының, Қазақстан Республикасы Президенті мен Үкіметі актілерінің орындалуын ұйымдастыру және қамтамасыз ету және оларды Жамбыл облысының аумағында орналасқан азаматтардың, кәсіпорындардың, ұйымдар мен мекемелердің орындауын бақылау;

3) Қазақстан Республикасы Президентінің Әкімшілігімен, Қазақстан Республикасы Премьер-Министрінің Кеңсесімен, Үкіметпен, Қазақстан Республикасының Парламентімен, Жамбыл облыстық мәслихатымен, орталық мемлекеттік органдардың аумақтық бөлімшелерімен, жергілікті бюджеттен қаржыландырылатын атқарушы органдармен, бұқаралық ақпарат құралдарымен, қоғамдық ұйымдармен және азаматтармен өзара іс-қимылды қамтамасыз ету;

4) сыртқы экономикалық қызмет және халықаралық байланыстарды дамыту саласындағы мемлекеттік саясатты іске асыруды қамтамасыз ету;

5) мемлекеттік органдардың қызметін үйлестіру және тиісті жылға арналған Жамбыл облысының даму жоспарлары мен бағдарламалары бойынша іс-шаралардың орындалуы туралы әкімді хабардар ету;

6) әкімнің және әкімдік мәжілістерінің, қажет болған жағдайларда консультативтік-кеңесші органдардың қызметін құжаттамалық қамтамасыз ету және оларға қызмет көрсету;

7) бюджеттік бағдарламалардың әкімшісі рөлінеде болу;

8) әкімдік регламентіне сәйкес әкімдік қаулылары жобаларының қаржы-экономикалық, құқықтық және өзге де аспектілеріне, әкім қабылдайтын шешімдер мен өкімдерге, сондай-ақ аппарат басшысының бұйрықтарына сараптама жүргізу, сараптама нәтижелері бойынша қорытындылар (анықтамалар) дайындау;

9) әкімде, оның орынбасарларында, аппарат басшылығында кеңестер өткізуді ұйымдастыру, кеңестердің материалдарын, хаттамаларын ресімдеу және тарату;

10) жергілікті бюджеттен қаржыландырылатын атқарушы органдар қызметінің тиімділігін бағалау;

11) әкімдік қаулыларының, әкім және оның орынбасарларының актілері мен тапсырмаларының, әкімдік отырыстарының хаттамалық шешімдерінің орындалуын бақылау, осы мәселелер бойынша әкімді хабардар ету;

12) жергілікті атқарушы органның норма шығару қызметінің тетігін жетілдіру жөнінде шаралар қабылдау;

13) әкімнің тапсырмасы бойынша соттарда әкімдіктің және әкімнің мүдделерін білдіру және қорғау, прокурорлық ден қою актілерін қарау;

14) құпия іс жүргізуді, арнайы байланысты ұйымдастыру және жүргізу, хат-хабарларды өңдеу, нормативтік құқықтық актілердің талаптарына сәйкес әкімдік ғимаратында құпиялылық режимін, өткізу және объектішілік режимді қамтамасыз ету болып табылады;

15) мемлекеттік органдардың іс қағаздарын жүргізу талаптарын сақтау жөніндегі қызметін, оның ішінде құпиялылық режимін қамтамасыз ету және құпия іс қағаздарын жүргізу жай-күйін кешенді, тақырыптық және бақылау тексерулерін, сондай-ақ қорғау құралдары мен қорғалған баспа-бланкі өнімдерін пайдалануды үйлестіру;

16) Жамбыл облысының аумағында қызметін жүзеге асыратын әкімдіктің ведомстволық бағынысты ұйымдары мен коммуналдық кәсіпорындарына мониторинг жүргізу;

17) аппарат пен әкімдіктің номенклатурасына кіретін кадрлар бойынша зерделеуді ұйымдастыру және ұсыныстар енгізу, кадрлар резервін қалыптастыру, олардың оқуын, тағылымдамасын және қайта даярлығын ұйымдастыру арқылы кадр саясатын жүзеге асыру;

18) әкім тағайындайтын не онымен келісім бойынша тағайындалатын кадрлармен жұмыс;

19) аппараттың балансындағы материалдық құндылықтардың сақталуын есепке алуды және бақылауды жүргізу;

20) АКТ-ны және ақпараттық жүйелерді, сондай-ақ деректер алмасудың халықаралық стандарттарын, АКТ-ны құру, енгізу және пайдалану процестерін жергілікті бюджеттен қаржыландырылатын жергілікті атқарушы органдардың қызметіне енгізу;

21) әкімдіктің құрылымдық бөлімшелерінде электрондық құжат айналымының бірыңғай жүйесін құру бойынша жұмыстарды үйлестіру;

22) әкімнің және әкімдіктің қызметін бұқаралық ақпарат құралдарында жариялауды қамтамасыз ету;

23) мемлекеттік тілде іс жүргізуді кезең-кезеңмен енгізу;

24) аппаратта және оның құрылымдық бөлімшелерінде іс жүргізуді жолға қою және жетілдіру;

25) мемлекеттік орган жұмысының сапасы мен өнімділігін арттыру мақсатында оның қызметінің бағыттары бойынша ішкі бақылауды жүзеге асыру;

26) Мемлекеттік қызметтер көрсету сапасының сақталуын бақылауды жүзеге асыру;

27) Жамбыл облысы аумағында қоғамдық тәртіп пен қауіпсіздікті қамтамасыз ету бойынша құқық қорғау органдарымен өзара іс-қимылды ұйымдастыру;

28) Жамбыл облысы аумағындағы жедел жағдайға талдау және бағалау жүргізу;

29) Жамбыл облысының жұмылдыру дайындығы мен аумақтық қорғанысының жай-күйіне талдау жүргізу;

30) мемлекеттік органдар мен ұйымдарды жұмылдыру, соғыс жағдайы кезеңінде және соғыс уақытында жұмыс істеуге көшіру жөніндегі іс-шаралар кешенін іске асыру;

31) жергілікті әскери басқару органдарына олардың бейбіт уақыттағы және жұмылдыру жарияланған кездегі жұмысына жәрдемдесу;

32) Жамбыл облысында гендерлік және отбасылық-демографиялық саясатты іске асыру;

33) гендерлік аспектілерді қарау және сақтау;

34) Қазақстан Республикасы заңнамасының талаптарына сәйкес іс қағаздарын жүргізу және хат-хабарларды өңдеу;

35) азаматтар мен заңды тұлғалардың өтініштерін қарау;

36) азаматтарды қабылдауды ұйымдастыру;

37) әкімдіктің, консультативтік-кеңесші органдардың отырыстарын, жалпы қалалық қоғамдық-саяси іс-шараларды дайындау;

38) Қазақстан Республикасының заңдарында, Қазақстан Республикасы Үкіметінің, облыс әкімдігінің және облыс әкімінің актілерінде көзделген өзге де функцияларды, сондай-ақ облыс әкімінің тапсырмаларын орындайды.

 

 

3 тарау. Мемлекеттік органның бірінші басшысының мәртебесі, өкілеттігі

      

  1. Аппаратқа басшылықты Аппаратқа жүктелген міндеттердің орындалуына және оның өз өкілеттіктерін жүзеге асыруға дербес жауапты болатын бірінші басшы жүзеге асырады.
  2. Аппараттың бірінші басшысы Қазақстан Республикасының заңнамасына сәйкес қызметке тағайындалады және қызметтен босатылады.
  3. Аппараттың бірінші басшысының Қазақстан Республикасының заңнамасына сәйкес қызметке тағайындалатын және қызметтен босатылатын орынбасарлары болады.
  4. Аппараттың бірінші басшысының өкілеттігі:

1) Аппаратқа жүктелген мақсаттарды іске асыруды ұйымдастырады;

2) өз құзыреті шегінде аппараттың құрылымдық бөлімшелерінің қызметін ұйымдастырады, үйлестіреді және бақылайды; ;

3) Аппараттың құрылымы мен штат кестесін, оның құрылымдық бөлімшелері туралы ережені бекітеді;

4) Аппараттың «Б» корпусының мемлекеттік әкімшілік қызметшілерін мемлекеттік лауазымдарға тағайындайды және мемлекеттік лауазымдардан босатады;

5) аппараттың тәртіптік және конкурстық комиссияларының қызметіне жалпы басшылықты жүзеге асырады;;

6) қызметтік тәртіптің сақталуын бақылауды жүзеге асырады;

7) еңбек қатынастары мәселелері Жоғары тұрған лауазымды адамдардың құзыретіне жатқызылған жұмыскерлерді қоспағанда, аппараттың мемлекеттік қызметшілерін іссапарға жіберу, оларға демалыстар беру, материалдық көмек көрсету, даярлау, қайта даярлау және олардың біліктілігін арттыру, көтермелеу, үстемеақылар белгілеу мәселелерін шешеді;

8) еңбек қатынастары мәселелері Жоғары тұрған лауазымды адамдардың құзыретіне жатқызылған жұмыскерлерді қоспағанда, аппараттың мемлекеттік қызметшілерінің тәртіптік жауаптылығы мәселелерін шешеді;

9) өз құзыреті шегінде Қазақстан Республикасының Сыбайлас жемқорлыққа қарсы іс-қимыл туралы заңнамасы талаптарының орындалуын қамтамасыз етеді;;

10) облыстың, республикалық маңызы бар қаланың, астананың жергілікті атқарушы және өкілді органдары қабылдаған шешімдердің орындалу барысын бақылайды;

11) Қазақстан Республикасының заңдарымен және өзге де нормативтік құқықтық актілерімен жүктелген өзге де өкілеттіктерді жүзеге асырады.

Аппараттың бірінші басшысы болмаған кезеңде оның өкілеттіктерін орындауды қолданыстағы заңнамаға сәйкес оны алмастыратын адам жүзеге асырады.

  1. Бірінші басшы өз орынбасарларының өкілеттіктерін қолданыстағы заңнамаға сәйкес белгілейді.

 

 

4 тарау. Мемлекеттік органның мүлкі

     

  1. Аппараттың заңнамада көзделген жағдайларда жедел басқару құқығында оқшауланған мүлкі болу мүмкін.

Аппараттың мүлкі оған меншік иесі берген мүлік, сондай-ақ өз қызметі нәтижесінде сатып алынған мүлік (ақшалай кірістерді қоса алғанда) және Қазақстан Республикасының заңнамасында тыйым салынбаған өзге де көздер есебінен қалыптастырылады.

  1. Аппаратқа бекітілген мүлік коммуналдық меншікке жатады.
  2. Егер заңнамада өзгеше көзделмесе, аппараттың өзіне бекітілген мүлікті және қаржыландыру жоспары бойынша өзіне бөлінген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.

 

 

5 тарау. Мемлекеттік органды қайта ұйымдастыру және тарату

 

  1. Аппаратты қайта ұйымдастыру және тарату Қазақстан Республикасының заңнамасына сәйкес жүзеге асырылады.

Аппараттың қарамағындағы ұйымдардың тізбесі

  1. «Жамбыл облысы әкімі аппаратының Шаруашылық басқармасы» коммуналдық мемлекеттік мекемесі;
  2. Алып тасталды - Жамбыл облысы әкімдігінің 2025 жылғы 8 сәуірдегі № 88 қаулысымен.
«Жамбыл облысы әкімінің аппараты» коммуналдық мемлекеттік мекемесі туралы ЕРЕЖЕ
Дата публикации
12 августа 2021