Тоғызкент ауылдық округінде көктем мезгілінің келуімен бірге Конго-қырым геморрагиялық қызбасының (КҚГҚ) алдын алу мақсатында жоспарлы санитарлық-эпидемиологиялық шаралар ұйымдастырылды. Бұл жұмыстар тұрғындардың денсаулығын сақтау және қауіпті жұқпалы аурудың таралуына жол бермеу мақсатында қолға алынды.
Ауылдық округке қарасты елді мекендерде кенеге қарсы дәрілеу жұмыстары жүргізілді. Атап айтқанда, мал қоралары, аулалар, суат маңайы және жайылымдық жерлер арнайы мамандардың қатысуымен залалсыздандырылды. Сонымен қатар, ауыл тұрғындарына кенеден сақтану жолдары түсіндіріліп, ақпараттық парақшалар таратылды.
Ауылдық ветеринария қызметі тарапынан үй жануарларына уақтылы дегельминтизация мен инсектицидтік өңдеу жұмыстары жүргізіліп жатыр. Бұл шаралар кене арқылы таралатын қауіпті вирустың алдын алуға бағытталған.
Медицина қызметкерлері тұрғындармен кездесулер өткізіп, Конго-қырым геморрагиялық қызбасының алғашқы белгілері, жұғу жолдары және алдын алу шаралары туралы түсіндірме жұмыстарын жүргізді. Ауыл тұрғындарына денсаулықтарына мұқият қарап, кене шағу жағдайында бірден дәрігерге қаралу қажеттігі ескертілді.
Ауыл әкімі мен жауапты мекемелердің үйлесімді жұмысының нәтижесінде алдын алу шаралары жүйелі түрде жалғасуда. Алдағы уақытта да бұл бағыттағы жұмыстар өз жалғасын табатын болады.