Семинардың негізгі мақсаты – комиссия мүшелерінің сайлау процесін ұйымдастыру және өткізу бойынша білімдерін жетілдіру, заңнама талаптарын дұрыс әрі бірізді қолдануын қамтамасыз ету.
Оқыту барысында сайлау заңнамасына енгізілген өзгерістер мен толықтырулар түсіндіріліп, сайлаушылар тізімімен жұмыс жүргізу тәртібіне ерекше назар аударылды. Сонымен қатар мүгедектігі бар азаматтардың сайлау құқықтарын қамтамасыз ету және олар үшін қолайлы жағдай жасау, сайлау процесін қаржыландыру, сайлау алдындағы үгіт жұмыстарын ұйымдастыру мәселелері қамтылды.
Сондай-ақ дауыс беруді ұйымдастыру және өткізу тәртібі, сайлау учаскесіндегі комиссия мүшелерінің іс-әрекеттері, дауыс беру қорытындыларын анықтау және тиісті құжаттарды рәсімдеу бойынша практикалық түсіндірмелер берілді.
Семинар соңында қатысушылардың алған білімдерін бағалау мақсатында тест тапсырылып, нәтижелері бойынша сертификаттар табысталды.