Жаңа Конституция жобасының көпшілікке ұсынылуы – Қазақстанның қоғамдық-саяси дамуы жолындағы айрықша мәнге ие кезең. Аталған құжат тек заңнамалық негіздерді айқындаумен шектелмей, ұлттық идеологияны жаңаша пайымдауға, қоғамдық сананы қазіргі тарихи өзгерістерге бейімдеуге бағытталған стратегиялық бастама болып табылады. Конституцияда адам өмірі, оның құқықтары мен бостандықтарының ең жоғары құндылық ретінде бекітілуі азамат пен мемлекет арасындағы өзара жауапкершілікті тереңдетіп, құқықтық мәдениет пен заңға құрметті нығайтудың берік іргетасын қалайды.
Сонымен қатар, жаңа Конституция жобасында қоғамдық келісімді сақтау, ұлттық бірлікті бекемдеу, ұлтаралық татулықты нығайту және әлеуметтік тұрақтылықты қамтамасыз ету қағидаттары жүйелі түрде қамтылған. Бұл ұстанымдар ел ішіндегі бейбіт өмір мен тұрақты дамудың сақталуына, мемлекетшілдік сана мен азаматтық жауапкершіліктің артуына ықпал етеді. Құжатта білім беру, ғылым, мәдениет және жастар тәрбиесі елдің ұзақ мерзімді дамуының негізгі басым бағыттары ретінде айқындалған. Мұндай нормалар жас ұрпақтың тарихи жадысын қалыптастырып, отансүйгіштік пен елжандылық рухын күшейтуге жол ашады.