Сейсенбі күні аудан әкімі Ербол Жиенқұлов Сарымолдаев және Ақтоған ауылдарының тұрғындарымен кездесті.
Кездесулер барысында аудан әкімі ауыл тұрғындарына ауданның әлеуметтік-экономикалық даму көрсеткіштері жөнінде кеңінен баяндап, негізгі салалардағы атқарылған жұмыстар мен алдағы жоспарлар туралы айтты.
2025 жылдың қаңтар-тамыз айларының қорытындысы бойынша аудан экономикасында оң динамика байқалды. Ауыл шаруашылығының жалпы өнім көлемі 19,2 млрд теңгені құрап, өсім 107,3 пайыз болды. Ал негізгі капиталға тартылған инвестициялар көлемі 22,1 млрд теңгеге жетіп, 118,3 пайыздық көрсеткішке қол жеткізілді. Жалпы алғанда, ауданның әлеуметтік-экономикалық даму қарқыны тұрақтылығын сақтап, негізгі бағыттарда жоспарлы межелер орындалуда.
Ербол Жұмабекұлы ауданның басты даму бағыты болып саналатын ауыл шаруашылығы саласына ерекше тоқталды. Атап айтқанда, ол рентабельділігі жоғары дақылдарды егудің маңыздылығына назар аударып, бұл бағытта ауыл шаруашылығын әртараптандыру, жаңа технологияларды енгізу және өнім сапасын арттырудың қажеттілігін атап өтті.
Кездесу барысында тұрғындар көгілдір отынмен қамту, жол жөндеу және ауылдық дәрігерлік амбулаторияға дәрігер қажеттігі сынды өзекті мәселелерді көтерді. Аудан әкімі барлық сұрақтарға егжей-тегжейлі жауап беріп, көтерілген мәселелердің назарда болатынын айтты.
Кездесуден кейін Ербол Жұмабекұлы азаматтарды жеке қабылдап, олардың жеке өтініштері мен ұсыныстарын тыңдады.