Әз Наурыз ұлт пен ұлысты ұйыстырып, берекенің тайқазанын тасытқан ұлық мереке. Сол үшін де қазақ халқы бұл мейрамды Ұлыстың ұлы күні деп ерекше әспеттеген.
Халқымыз бұл кезеңді береке-бірлік, ырыс-құт мезгілі санаса, мейрамды кешірім мен мейірімнің, үміт пен сенімнің, ізгілік пен түсіністіктің мерекесіне балаған.
Қазіргі уақытта Наурыз жаңа сипатқа ие болып, ұлтына, діни сеніміне қарамастан Қазақстанды мекендейтін барлық этностың ортақ мерекесіне айналды. Біз Ел бірлігінің құндылығын, отбасылық бақыттың және жақындарымыздың амандығының маңызын түсініп, Қазақстан халқының біртұтас отбасына жататынымызды, Еліміздің болашағы үшін жауапкершілігімізді бұрынғыдан да айқын сезіне бастадық.
Елімізде тұрақтылықты сақтау мемлекетеміздің негізгі бағыттарының біріне айналды. Соның ішінде Қазақстан халқы Ассамблеясы – еліміздің халқын үйлесімді біріктіріп, қоғамдағы келісімді орнатуға айтарлықтай үлес қосты.
Сондай-ақ Ұлыстың ұлы күні елдік, бірлік, берекелік, сипатын былай қойғанда, адамзатты инабаттылыққа, адамгершілікке, иманжүзділікке, ізгілікке баулиды.
Қадірлі жерлестер!
Наурыз мерекесі баршаңызға құтты болсын! Жаңа жетістіктер мен жеңістер көп болсын, молшылық пен татулық әкелсін. Еліміз тыныш, бірлігіміз берік, ынтымағымыз арта берсін. Әрбір жаңа күн барлық отбасына шадыман шаттық, бақ-береке сыйласын.
Ұлыстың ұлы күні құтты болсын!
Аудан әкімі Жорабек Баубеков