Жамбыл облысының 445 мектебінде 2023-2024 оқу жылында 26 425 педагог қызметкер жұмыс істейді. Оның ішінде 25 388 педагог жоғары білімді. Жыл сайын облыс мектептеріндегі педагог кадрлардың тапшылығына мониторинг жұмыстары тұрақты түрде жүргізіліп отырады.
2023 жылдың 1 тамыз айынан бастап «Мемлекеттік білім беру ұйымдарының бірінші басшылары мен педагогтерін лауазымға тағайындау, лауазымнан босату қағидаларын бекіту туралы» Қазақстан Республикасы Білім және ғылым министрінің 2012 жылғы 21 ақпандағы №57 бұйрығына сәйкес мемлекеттік білім беру ұйымдары педагогінің бос және (немесе) уақытша бос лауазымына тағайындау конкурстары өткізілді.
Бүгінгі күні облыстағы білім беру ұйымдарына 48 маманға, оның ішінде: орыс тілі, математика, физика, химия т.б мамандықтар бойынша қажеттілік туындап отыр.
Атап айтқанда, Қордай-17 (математика, физика, орыс тілі, химия, биология, география), Мойынқұм-5 (математика, орыс тілі, химия), Сарысу-8 (математика, физика, химия, география), Талас - 5 (математика, физика, химия), Шу-9 (математика, орыс тілі, биология, химия), Меркі - 4 (математика, музыка) пәндерінен қажеттілік бар.
Сонымен қатар, білім басқармасы түлектерді жұмысқа орналасуына көмек беру мақсатында Абай атындағы Қазақ Ұлттық педагогикалық университетімен және өңіріміздің М.Х.Дулати атындағы Тараз өңірлік университетімен жасалған меморондум аясында бітіруші түлектерді ауыл мектептеріне тарту жұмыстары бойынша жоғарғы оқу орындарының басшыларымен тығыз байланыста жұмыстар жүргізілді.