Бұл іс-шара дәстүрге айналды және халық арасында ақпараттық-түсіндіру жұмыстары аясында өткізілді. Бұл жолы басты күн тәртібіндегі мәселе "Зейнетақы заңнамасындағы жаңашылдық: ЖМЗЖ" тақырыбы болды.
Қазақстанның зейнетақы жүйесі бірнеше деңгейден және төлем көздерінен тұрады: мемлекеттік бюджеттен базалық және ортақ бөліктер, жинақтаушы бөлік – БЖЗҚ-ға міндетті және ерікті жарналар есебінен түседі.
2024 жылғы 1 қаңтардан бастап жинақтаушы зейнетақы жүйесінің (ЖЗЖ) жаңа құрамдауышын - жұмыс берушінің өз қаражаты есебінен жүзеге асыратын жұмыс берушінің міндетті зейнетақы жарналарын (ЖМЗЖ) кезең-кезеңімен енгізу басталды. Бұл зейнетақымен қамсыздандыру үшін жауапкершілікті мемлекет, жұмыс беруші және қызметкер арасында оңтайлы бөлуге мүмкіндік береді.
ЖМЗЖ енгізу тетігі "БЖЗҚ" АҚ ағымдағы жылдың 15 наурызында өткізген "Ашық есік күні" шарасының негізгі тақырыбына айналды. Іс-шараны ұйымдастырушылар қатысушыларға жаңа құрамдауыштың мақсаты туралы айтып берді. Мысалы, бұл 1975 жылы және одан кейін туылған, 1998 жылға дейін жұмыс істемеген және бұдан былай ортақ зейнетақыны алмайтын қазақстандықтардың жаңа ұрпағын қолдауға бағытталған. Оларды зейнетақымен қамсыздандыру мемлекеттің базалық зейнетақысынан және жұмыс берушілердің жарналарынан қалыптастырылған зейнетақы жинақтарынан төленетін төлемдерден құралатын болады. Кездесуге қатысқан жұмыс берушілерге қызметкерлер үшін қосымша төлемнің бір мезетте емес, біртіндеп енгізілетіні де түсіндірілді: қызметкердің табысының бір жарым пайызынан 2028 жылға қарай 5 пайызға дейін. Бұл олардың жүктемесін азайту және бизнесті өз бюджетінен міндетті зейнетақы жарналарын төлеуге дайындау үшін жасалған.