ҚР Еңбек кодексінің 87-бабына сәйкес, жыл сайынғы ақы төленетін еңбек демалысы жұмыскердің тынығуына, жұмысқа қабілеттілігін қалпына келтіруіне, денсаулығын нығайтуына және жұмыскердің өзге де жеке қажеттіліктеріне арналады және жұмыс орны (лауазымы) мен орташа жалақысы сақтала отырып, белгілі бір күнтізбелік күндер санына беріледі.
Жұмыскерлерге жыл сайынғы ақы төленетін еңбек демалысының мынадай түрлері беріледі:
1) жыл сайынғы негізгі ақы төленетін еңбек демалысы;
2) жыл сайынғы ақы төленетін қосымша еңбек демалысы.
"Семей ядролық сынақ полигонындағы ядролық сынақтардың салдарынан зардап шеккен азаматтарды әлеуметтік қорғау туралы" ҚР Заңының 13-бабының 3-тармақшасына сәйкес, 5, 6, 7, 8, 9-баптарда аталған аумақтарда тұратын халық жыл сайын ақысы төленетiн қосымша демалыс алуға құқылы.
ҚР Еңбек кодексінің 90-бабының 2-тармағына сәйкес, жыл сайынғы ақы төленетін еңбек демалысының жалпы ұзақтығын есептеу кезінде жыл сайынғы ақы төленетін қосымша еңбек демалыстары жыл сайынғы ақы төленетін негізгі еңбек демалысына қосылады.
Жұмыскерге жұмыс істеген бірінші және келесі жылдары үшін жыл сайынғы ақы төленетін еңбек демалысы тараптардың келісімі бойынша жұмыс жылының кез келген уақытында беріледі (ҚР Еңбек кодексінің 92-бабы 1-тармағы).
ҚР Еңбек кодексінің 93-бабының 3-тармағына сәйкес, жыл сайынғы ақы төленетін еңбек демалысы жұмыскер мен жұмыс беруші арасындағы келісім бойынша бөліктерге бөлінуі мүмкін. Бұл ретте жыл сайынғы ақы төленетін еңбек демалысы бөліктерінің бірі күнтізбелік он төрт күннен кем болмауға тиіс.
Жоғарыда айтылғандардың негізінде экологиялық демалыс жыл сайынғы ақылы еңбек демалысының бөлігі болып табылады және тараптардың келісімі бойынша немесе демалыс кестесі бойынша жұмыс жылының кез келген уақытында беріледі және келесі жылға ауыстырылады.