10 тамыз күні А.С. Пушкин атындағы облыстық кітапханада Абай күніне арналған мерекелік іс-шаралар ұйымдастырылды.
Кітапхана қонақтары «Абайды оқы, таңырқа!» интерактивті әдебиеттер көрмесімен, әлемнің 37 тіліндегі құжаттарды қамтитын «Біздің Абай» толықмәтінді электронды кітапханасымен танысса, балалар мен жасөспірімдер «Абай – білім арнасы, ақыл ойдың айнасы» атты қызықты танымдық квестке қатысып, ақын жайлы білімдерін көтерді. Жас оқырмандарға арналған бағдарламаны ұлы ақынмен байланысты киелі жерлерге арналған мозайка-пазлдар құрастыру мен сурет салу сайыстары жалғастырды. Ересектер белгілі жерлес сөзжұмбақшы Қ. Алтыбаевтың ақын өмірі мен шығармашылығын қамтитын сөзжұмбақтарын қызыға шешіп, шатыр астында шахмат және тоғызқұмалақ ойнаудан сынға түсті.
Мерекелік бағдарламаны Абай Құнанбайұлы туралы өзбек тіліндегі «Миллат Виждони»/«Ұлт санасы» кітабының авторы – жазушы Исокжон Нишоновпен онлайн кездесу жалғастырды.
Іс-шара барысында ақынның әлемнің түрлі тілдеріндегі өлеңдері оқылып, әндері шырқалды.
Осы күні қала тұрғындарынан «Абай шығармаларын білесіз бе?» атты сауалнама алынып, қалалықтар ақын шығармаларын жатқа оқыды.