Қазақстан Республикасы Тәуелсіздігінің 30 жылдығы қарсаңында Орал қаласының әкімі Абат Шыныбеков ел дамуы мен көркеюіне үлес қосып, табысты еңбек еткен сала өкілдеріне мерекелік наградаларды табыс етті.

Қазақстан Республикасы Тәуелсіздігінің 30 жылдығы қарсаңында Орал қаласының әкімі Абат Шыныбеков ел дамуы мен көркеюіне үлес қосып, табысты еңбек еткен сала өкілдеріне мерекелік наградаларды табыс етті.
Шаһар басшысы салтанатты жиын барысында қатысушыларды мерекемен құттықтады.
–Баршаңызды ұлық мереке – Қазақстан Республикасының Тәуелсіздігіне 30 жыл толуымен шын жүректен құттықтаймын. Әр халық үшін тәуелсіздіктен артық қасиетті де қастерлі ұғым жоқ. Бірлігіміздің арқасында тәуелсіздік жылдары іргелі мемлекет болып қалыптасып, өзгелермен теңесіп, даму жолында жаңа қадамдарға бастадық. 30 жыл ішінде мемлекетіміз нығайып, шекарасын бекітіп, әлеуметтік-экономикалық дамып, әлемдік аренадан өзіндік орын алды. Жасампаздық пен ілгерілеу, бейбітшілік пен келісім орнаған елімізде табыс пен тұрмыс сапасы артып, жаһандық бәсекеге қабілеттілік артты. Мүмкіндіктер кезеңінде Қазақстанның тұрақтылығы мен өркендеуі негіз болды.Баршаңызды Қазақстан Республикасының Тәуелсіздік күнімен құттықтай отырып, отбасыларыңызға амандық пен береке, еңбектеріңізге табыс тілеймін. Өркениет көшіне ілескен халқымыз гүлденіп, көркейе берсін. Еліміз аман, жұртымыз тыныш, тәуелсіздігіміз баянды болсын! – деді қала әкімі.
Салтанатты шарада Тәуелсіздік жылдарында еліміздің қалыптасуы мен дамуына үлес қосқан бір топ сала өкілдері «Қазақстан Республикасының Тәуелсіздігіне 30 жыл» мерекелік медалімен марапатталды. Сондай-ақ үздік сала қызметкерлеріне БҚО әкімі және Орал қаласы әкімінің Құрмет грамотасы табыс етілді.
Жиын соңында Абат Абайұлы марапат иелеріне еліміздің тұрақты дамуы мен кемелденуі жолындағы еңбектеріне табыс,барлық бастамаларына сәттілік тілеп, алғыс білдірді.