Ұлытау облысының аумақтық сайлау комиссиясы жанынан қоғамдық бірлестіктердің, саяси партиялардың жастар қанаттарының, бұқаралық ақпарат құралдарының, ресурстық орталықтардың өкілдерін, сондай-ақ мемлекеттік органдардың жас мамандарын біріктірген Жас сайлаушылар клубы (ЖСК) құрылды. Клубтың негізгі мақсаты - жастардың сайлау процесіне қатысты мәселелерге қызығушылығын арттыру, олардың электоралдық белсенділігін, құқықтық санасы мен құқықтық мәдениетін дамыту.
Жас сайлаушылар клубы жастар үшін Қазақстан Республикасының сайлау жүйесі туралы білімдерін тереңдетуге, өзекті қоғамдық-саяси мәселелерді талқылауға және азаматтық қоғамды дамытуға бағытталған бастамаларға қатысуға мүмкіндік беретін ашық диалог алаңы болуға бағытталған. Мұндай жобалар белсенді, жауапкершілігі жоғары әрі құқықтық тұрғыдан сауатты, елдің демократиялық болашағын саналы түрде қалыптастыруға дайын жастарды тәрбиелеуде маңызды рөл атқарады.
Ұлытау облысының қала және аудандық аумақтық сайлау комиссиялары жанынан да осындай Жас сайлаушылар клубтары құрылды. Олардың қызметі Жас сайлаушылар клубы туралы ережемен айқындалып, жеке құрамы бекітілді, сондай-ақ жұмыс және іс-шаралар жоспарлары әзірленді. Жас сайлаушылар клубтарының жүйелі әрі мақсатты қызметі жастарды сайлау процесіне кеңінен тартудың және демократиялық институттарға деген сенімді нығайтудың тиімді құралына айналады.