1950 жылғы 8 наурызда Көкшетау облысы Қызылту ауданының Бостандық ауылында дүниеге келген. 1972 жылы Қарағанды мемлекеттік медициналық институтын «Емдеу ісі» мамандығы бойынша тәмамдаған.
Жоғары санаттағы хирург, «Денсаулық сақтау саласының үздігі», «Шапағат» медалінің иегері, «Еңбек Ардагері» атағына ие болған, бірнеше мемлекеттік мерейтойлық төсбелгілер иесі.
Ауданның денсаулық сақтау саласына зор үлес қосқан азамат. 1973-2013 жылдар аралығында 40 жыл бойы аудан орталығынан ең шалғай жатқан Қулыкөл ауылдық ауруханасын басқарып, сол ауылдық жағдайларда 5 мыңнан астам операция жасаған. Көптеген жерлестеріне жаңа өмір сыйлай білген азаматтың ерлігін осыдан көруге болады.
Уәлиханов аудандық мәслихатының үш бірдей шақырылымының депутаты болған. Әрдайым медицина саласын дамытуға көңіл бөлген дәрігер-депутат Қулыкөл ауылы ауруханасының қиын жылдары жұмыс істеуімен бірге оның материалдық базасын нығайтуға зор септігін тигізді.
Уәлиханов аудандық мәслихаты сессиясының 2017 жылғы 15 қыркүйектегі №4-17 шешiмiмен «Уәлиханов ауданының құрметтi азаматы» атағы берiлдi.