Жарыспалы әрекет нысанында тарихи түрде қалыптасқан және өзіне тән дене шынықтыру жаттығуларын және де дене шынықтыру белсенділігі ұйымдастырылуының өзіндік қағидалары мен тәсілдері бар халық ойындарын білдіретін спорт түрлері.
Ұлттық спорт тарихы ұлтымыздың тарихымен тығыз байланысты. Қандай да болмасын мәдени-рухани құндылықты сақтау, оны дамыту үшін дені сау мықты ұрпақ қажет, осы саланы іске асыратын дене тәрбиесі мәдениеті оның бастауы қазақтың ұлттық ойындары болып саналады.
Қазақ халқының тарихы ержүректікке, күштілікке, табандылыққа, шапшаңдыққа, төзімділікке, тапқырлыққа, адамгершіліккке баулитын ұлттық спорт түрлеріне бай. Дана бабаларымыз ұрпақ тәрбиесін ұлттық спорт ойындары арқылы баланың жастайынан ой-өрісін, таным-түсінігін жетілдіріп отырған.
Ұлттық спорт түрлері спорттың және дене тәрбиесінің ажырамайтын бөлігі, ұлттық патриотизмге және ұлттық тарих пен дәстүрлерге құрмет көрсетуге тәрбиелеу арқылы жастарды спортқа тартатын және халықтың денсаулығын нығайтатын фактор болып табылады.
Мемлекет басшысының 2017 жылғы 12 сәуірдегі "Болашаққа бағдар: рухани жаңғыру" бағдарламалық мақаласына қайта бағдарлану мақсатында ұлттық спорт түрлерін жаңғырту және дамыту арқылы жалпыұлттық патриотизм идеясын іске асыру бағытында облыс аумағында 10-нан астам ұлттық спорт түрі жанданып дамыды. 2019 жылдың қорытындысы бойынша қарқынды түрде дамыған ұлттық спорт түрлерімен 727,776 мыңға жуық адам шұғылданады.