Отырар ауданы әкімі аппаратының басшысы, Әдеп жөніндегі уәкіл Ашим Елеусизов мемлекеттік қызметшілер арасында қызметтік әдеп нормаларын сақтау, қызметтік тәртіпті қатаң ұстану және сыбайлас жемқорлық құқық бұзушылықтарының алдын алу мәселелері бойынша түсіндіру жұмыстарын жүргізді.
Аталған мәжіліске аудан әкімінің кеңесшісі Д. Үсетов, Аудан әкімі аппаратының кадр бөлімінің басшысы Н. Момбек, өтініштердің қаралуын бақылау және құжаттамалық қамтамасыз ету бөлімінің басшысы М. Айдаркулов, мемлекеттік-құқықтық және терроризмге қарсы іс-қимыл бөлімі бас инспекторлары Е. Қасымбеков пен Б. Аманбаев, бас инспектор-заңгер А. Әмірхан және келісімшарт бойынша қызметкерлер қатысты.
Бас инспектор-заңгер А. Әмірхан жаңадан қабылданған бір қатар заңдар бойынша түсіндіріп өтті. Сонымен қатар мемлекеттік қызметшілерді заң талаптарын мүлтіксіз сақтауға шақырды.
Мәжіліс соңында қызметтік әдеп талаптарын бұзудың алдын алу, мемлекеттік қызметшілердің мінез-құлық мәдениетін арттыру, сондай-ақ қызметтік этика нормаларын қатаң сақтау мәселелері кеңінен түсіндірілді. Жиын қорытындысында мемлекеттік қызметшілерге әдеп талаптарын тұрақты түрде сақтап, заңнама талаптарын бұлжытпай орындау қажеттігі ескертілді.