Мемлекеттік қызмет саласында жұмыс істеуге ниетті жандарға тағы да бір мүмкіндік туып отыр. ҚР Мемлекеттік қызмет істері агенттігінің бастамасымен ЖОО үздік тәмамдаған түлектер мемлекеттік қызметке қабылданып, еңбек парақшасының жаңа беттерін ашылуда.
Еліміздегі іргелі оқу орындарында (GPA 3.33-тен жоғары) оқуды бітіргеннен кейін бір жыл ішінде аудандық, ауылдық деңгейдегі төменгі лауазымдарға конкурстық іріктеусіз қабылдана алады. Республикада 140-тан астам түлек аудандық, ауылдық деңгейдегі төменгі және басшылық емес лауазымдарға конкурстық іріктеусіз қабылданса, оның 1-і ауданымызға тиесілі болып отыр.
Бүгін Отырар ауданы әкімінің орынбасары, Әдеп жөніндегі уәкіл Жансұлтан Сейтжанов мемлекеттік қызметке конкурстық іріктеусіз жаңадан қабылданған жас маман Айсұлтан Оралханды қабылдады.
Айсұлтан Оралхан – Мұхтар Әуезов атындағы Оңтүстік Қазақстан мемлекеттік университетін «мемлекеттік және жергілікті басқару» мамандығы бойынша үздік бітірген. Қолданыстағы заң талаптарына сай Отырар ауданы, Талапты ауылдық округі әкімі аппаратының инфрақұрылым жөніндегі бас маманы қызметіне тағайындалды.
Мемлекеттік қызмет саласындағы алғашқы қадамына сәттілік тілеп, мемлекеттік қызметшілердің әдеп нормаларын, өзге де шектеулерді қатаң сақтау ұсынылды.