Түркістан облысы Сауран ауданының Шорнақ ауылында 500 орындық мәдениет үйінің құрылысы жалғасуда. Құрылыс-монтаж жұмыстарының 70%-ы орындалды, жұмыс кестесінен кешігу жоқ. Құрылысты 2026 жылғы қарашада аяқтау жоспарланып отыр.
Қазір нысанда ішкі әрлеу, ғимараттың қасбетін қаптау және сыртқы инженерлік желілерді тарту жұмыстары жүргізілуде. Құрылысқа 40 жұмысшы мен үш бірлік техника жұмылдырылған.
Жоба бойынша жалпы ауданы 2354 шаршы метр болатын екі қабатты ғимарат 1,27 гектар жер учаскесінде салынып жатыр. Құрылыс аяқталғаннан кейін мұнда мәдени іс-шаралар өткізуге, шығармашылық ұжымдардың өнер көрсетуіне және балалар мен жастардың бос уақытын ұйымдастыруға мүмкіндік туады.
Құрылыс 2025 жылы басталды. Тапсырыс беруші - Сауран ауданының құрылыс бөлімі, мердігер - «Дос и К Сервис» ЖШС.
Анықтама үшін: конкурс қорытындысы бойынша жасалған шарттың құны - 1 775,5 млн теңге. Жобада көзделген құрылыс мерзімі - 17 ай. Техникалық қадағалауды «Universal Construction Expert» ЖШС, авторлық қадағалауды «Казинспроект» ЖШС жүзеге асырады.
Түркістан облысында Қазақстан Республикасы Ғылым және жоғары білім министрлігінің Тіл саясаты комитеті ұйымдастырған «Жарнама -тіл тазалығының көрінісі» байқауының облыстық іріктеу кезеңі өткізілді.
Байқаудың негізгі мақсаты - мемлекеттік тілдің мәртебесін арттыру, жарнама мәтіндерінің сауатты әрі талапқа сай жазылуын насихаттау, сондай-ақ қоғамдық ортадағы тіл мәдениетін қалыптастыру.
Іріктеу барысында өңірдегі жарнамалардың тілдік сауаттылығы мен мемлекеттік тіл нормаларына сәйкестігіне назар аударылып, үздік жұмыстар сараланды.
Байқау – мемлекеттік тілдің қолданыс аясын кеңейтіп, «Сауатты жарнама - мәдениетті қоғамның көрінісі» қағидатын қалыптастыруға бағытталған маңызды бастама.
Түркістан облысы мәдениет басқармасының баспасөз қызметі
Түркістан қаласында Түркі мемлекеттері ұйымының 10-шы бейресми саммитін жоғары деңгейде ұйымдастыруға және өткізуге үлес қосқан мәдениет саласының қызметкерлерін марапаттау рәсімі өтті.
Салтанатты жиынға Түркістан облысы әкімінің орынбасары Ертай Алтаев қатысып, Мемлекет басшысы Қасым-Жомарт Тоқаевтың Алғыс хаттарын табыстады.
– Ежелден өркениет пен руханияттың ордасына айналған қасиетті Түркістан өңірінің дамуында сіздердің еңбектеріңіз орасан зор. Президент Жарлығымен Түркістанға ерекше мәртебе берілді. Бүгінде Түркістанның халықаралық аренадағы беделі артып, маңызды іс-шаралар мен кездесулердің орталығына айналуда. Соның бірі – Түркі мемлекеттері ұйымының бейресми саммиті. Осы ауқымды шараның жоғары деңгейде өтуіне қосқан үлестеріңіз үшін Мемлекет басшысы арнайы алғысын білдіріп отыр, – деді Ертай Кенжебекұлы.
Айта кетейік, жуырда рухани шаһарда өткен халықаралық маңызы зор басқосу түркі әлемі үшін маңызды оқиғалардың бірі болды. Саммиттің мазмұнды әрі жоғары деңгейде өтуіне мәдениет саласы мамандарының қосқан үлесі ерекше. Осыған орай, өңірдің мәдени-рухани әлеуетін арттыру бағытындағы еселі еңбегімен көзге түскен және маңызды шараның табысты өтуіне атсалысқан азаматтарға құрмет көрсетілді. Бұл марапат мәдениет қызметкерлерінің кәсіби шеберлігі мен ел дамуына қосқан үлесіне берілген жоғары баға болып саналады.
Түркістан облысы мәдениет басқармасының баспасөз қызметі