Бюджет

Бюджет - мемлекеттің өз міндеттері мен функцияларын іске асыруды қаржылық қамтамасыз етуге арналған орталықтандырылған ақша қоры.

Бюджет деңгейлері:

1) республикалық бюджет;

2) облыстық бюджет, республикалық маңызы бар қала, астана бюджеттері;

3) аудандық (облыстық маңызы бар қала) бюджет;

4) аудандық маңызы бар қала, ауыл, кент, ауылдық округ бюджеттері.

Бюджет құрылымы мынадай бөлімдерден тұрады:

1) кірістер:

салықтық түсімдер; салықтық емес түсімдер; негізгі капиталды сатудан түсетін түсімдер; трансферттер түсімі;

2) шығындар;

3) таза бюджеттік кредиттеу:

бюджеттік кредиттер; бюджеттік кредиттерді өтеу;

4) қаржы активтерімен операциялар бойынша сальдо:

қаржы активтерін сатып алу; мемлекеттің қаржы активтерін сатудан түсетін түсімдер;

5) бюджет тапшылығы (профициті);

6) бюджет тапшылығын қаржыландыру (профицитін пайдалану):

қарыздар түсімі; қарыздарды өтеу; бюджет қаражатының пайдаланылатын қалдықтары.

Бюджет кірістерінің болжамы Салық кодексі мен басқа да нормативтік құқықтық актілердің ережелерін ескере отырып, орта мерзімді кезеңге арналған экономикалық көрсеткіштердің болжамы негізінде есептеледі.

Әлеуметтік-экономикалық дамудың қойылған мақсаттары ескеріле отырып, бюджет шығындарының негізгі басымдықтары:

1. Мемлекеттiк әлеуметтiк мiндеттемелердi толық көлемде орындау;
2. Халыққа бюджеттік қызметтердің толық көлемде ұсынылуын қамтамасыз ету;
3. Халықты жұмыспен қамту;
4. Көлiк - логистикалық инфрақұрылымды дамыту;
5. Энергетикалық инфрақұрылымды дамыту;
6. Тұрғын үй-коммуналдық шаруашылық инфрақұрылымын және сумен, жылумен қамту желілерін жаңғырту;
7. Тұрғын-үй инфрақұрылымын күшейту;
8. Әлеуметтiк инфрақұрылымды дамыту;
9. Кәсiпкерлiк пен iскерлiк белсендiлiкті қолдау.