Қазақ спортшыларының өткен аптадағы жарқын жеңісі

Спорттық гимнастика: Дохада (Қатар) өткен Әлем кубогі кезеңінде отандастарымыз үш медаль жеңіп алды. Милад Карими керме және еркін жаттығуда топ жарса, Нариман Құрбанов ат снарядында қола медаль иеленді.

Әуесқой бокс: Әзірбайжан астанасы Бакуде ұйымдастырылған «Жібек жолы» халықаралық турнирінде Қазақстанның ерлер және әйелдер құрамасы 4 алтын, 2 күміс, 12 қола жүлде жеңіп алды. Сондай-ақ Ресейде өткен турнирде отандастарымыз 2 алтын, 4 күміс және 5 қола медаль еншіледі.

Үстел теннисі: Алан Құрманғалиев үстел теннисінен Францияның Мец қаласында өткен халықаралық WTT Youth Star Contender Metz турнирінде топ жарды.

Шахмат: Грекияда өткен рапидтен юниорлар арасындағы әлем біріншілігінде отандық шахматшылар 6 алтын және 1 қола медаль жеңіп алды.

Велотрек: Гонконг қаласында (ҚХР) велотректен өткен Hong Kong International Track Cup халықаралық турнирінде ұлттық құрама спортшысы Рамис Дінмұхаметов омниум бағдарламасында мәре сызығын бірінші болып кесіп, алтыннан алқа тақты.

Каратэ: Мысыр астанасы Каирдегі Премьер-лига бәсекесінде Қазақстан құрамасы 1 алтын, 1 күміс медаль жеңіп алды.

Ат спорты: Ташкент қаласында (Өзбекстан) өткен Әлем кубогі кезеңінде ұлттық құрама спортшысы Ксения Баталова екі күміс жүлде олжалады.

Көркем гимнастика: Бакуде (Әзірбайжан) мәресіне жеткен Әлем кубогінде Қазақстан құрамасы 5 лента жаттығуында 21.850 ұпай жинап, қола жүлде еншіледі.