ҚАЗАҚСТАНДА ӘЛЕУМЕТТІК ЖЕЛІЛЕРДЕ (INSTAGRAM, TIKTOK) ЗАҢСЫЗ ЛОТЕРЕЯМЕН КҮРЕС БОЙЫНША БЕЛСЕНДІ ЖҰМЫС ЖҮРГІЗІЛІП ЖАТЫР

Заңсыз лотереяны ұйымдастырғаны үшін 400 мыңнан 3,7 млн теңгеге дейін айыппұл қарастырылған. Бүгінгі таңда 16 азамат 7 млн теңге көлемінде айыппұл түрінде әкімшілік жауапкершілікке тартылды.

«Осы мүмкіндікті пайдалана отырып, БАҚ өкілдерінен, блогерлерден әлеуметтік желілердегі лотереялық ұтыс ойындарының заңсыз екенін көрермендеріне, оқырмандарына жеткізуді сұраймын», - деді Мирас Төлебаев.

2023 жылдың басынан Министрліктің талап-арыздары бойынша сот шешімдері негізінде заң бұзушылықтарға байланысты 14 букмекерлік кеңсенің, 8 тотализатордың және 1 ойын автоматтары залы қызметі тоқтатылды. Кейінгі 3 жылда ойын бизнесі саласындағы лицензиаттар саны 4 есеге (71-ден 17-ге дейін) азайды.

2024 жылдың бірінші жартыжылдығында Қонаев қаласында 4 букмекерлік кеңсе мен 2 ойын автоматтары залы бойынша жоспардан тыс және жоспарлы тексеру, сондай-ақ лотерея операторына жоспардан тыс тексеру жүргізілді. Тексеру нәтижесінде 1 букмекерлік кеңсе лицензиясынан айырылып, 2 ойын автоматтары залы мен лотерея операторына 8 миллион теңгеден астам сомаға айыппұл салынды.