ПАРАВОЛЕЙБОЛДАН АЗИЯ ЧЕМПИОНАТЫНА ҚАТЫСУ ҮШІН АСТАНАҒА 8 ЕЛДЕН 200-ДЕН АСТАМ СПОРТШЫ КЕЛДІ: МЕМЛЕКЕТ БАСШЫСЫ ТУРНИРГЕ ҚАТЫСУШЫЛАРҒА ҚҰТТЫҚТАУ ХАТ ЖОЛДАДЫ

ПАРАВОЛЕЙБОЛДАН АЗИЯ ЧЕМПИОНАТЫНА ҚАТЫСУ ҮШІН АСТАНАҒА 8 ЕЛДЕН 200-ДЕН АСТАМ СПОРТШЫ КЕЛДІ: МЕМЛЕКЕТ БАСШЫСЫ ТУРНИРГЕ ҚАТЫСУШЫЛАРҒА ҚҰТТЫҚТАУ ХАТ ЖОЛДАДЫ

Бүгін Астанада Ж.Үшкемпіров атындағы жекпе-жек сарайында ірі параспорттық турнир – отырып ойнайтын волейболдан Азия чемпионаты басталды. Елорданың 25 жылдығына арналған жарыс Мәдениет және спорт министрлігінің қолдауымен ұйымдастырылды.

Азия біріншілігінің ашылу салтанатына Мәдениет және спорт министрі Асхат Оралов қатысты. Министр көрермендер мен турнир қатысушыларын спорт мерекесімен құттықтап, Мемлекет басшысы Қасым-Жомарт Тоқаевтың құттықтау хатын оқыды. Президент Қазақстанда волейболды дамыту үшін барлық жағдай жасалып жатқанын және ерекше қажеттіліктері бар адамдарға үлкен көңіл бөлінетінін атап өтті.  Мемлекет басшысы жарысты ұйымдастыруға атсалысқандардың барлығына алғыс білдірді.

Айта кетейік, волейболдан Азия чемпионаты елімізде алғаш рет өткізіліп отыр, оған 8 елден 200-ден астам спортшы қатысуда. Бұл Қазақстан, Жапония, Таиланд, Иран, Ирак, Оңтүстік Корея, Моңғолия және Үндістан. Жарыс ерлер мен әйелдер командалары арасында өтеді. Біздің құрама екі санатта да ұсынылған.

Қазақстанның ерлер құрамасы құрлықтағы ең мықты командалардың бірі (әлемдік рейтингте 7-ші және азиялық рейтингте 2-ші орын), ал қыздар үшін бұл осы деңгейдегі тұңғыш турнир.

«Жеңімпаздар Париждегі XVII Жазғы Паралимпиадаға жолдама алады. Волейболдан Азия чемпионатының өзі 8 шілдеге дейін жалғасады. Елорданың барлық тұрғындары мен қонақтарын жігіттеріміз бен қыздарымызды қолдауға шақырамын, ал спортшыларымызға алтын медаль жеңіп алуды тілеймін. Қазақстанның ерлер командасы біріншіліктің ашылу матчында жапониялық волейболшыларды ұтып,  құрлықтық чемпионат аясында алғашқы жеңіске жетті. Бұл жақсы бастама»,- деді Мәдениет және спорт министрі.

Сондай-ақ Асхат Оралов Ж.Үшкемпіров атындағы жекпе-жек сарайында жаттығып жатқан жас палуандармен де кездесті. Балалардан жаттығу барысы туралы сұрап, олардың жаттықтырушыларымен сөйлесті. Асхат Оралов министрлік болашақ чемпиондарды әрқашан қолдайтынын мәлімдеді.