Қ.Тоқаев: Барша мәдениет қайраткерлеріне халықпен бірге болып, шығармашылығымен қолдау көрсеткендері үшін алғыс айтамын

Мемлекет басшысы мәдениет қайраткерлеріне халықпен бірге болып, шығармашылығымен қолдау көрсеткендері үшін алғыс білдірді.

«Жезтаңдай әнші, Еңбек Ері Роза Рымбаеваның онлайн концерті – халықтың рухын көтеретін нағыз өнер туындысы. Әлем елдеріне үлгі боларлық дүние. Розаға және барша мәдениет қайраткерлеріне халықпен бірге болып, шығармашылығымен қолдау көрсеткендері үшін алғыс айтамын. #Birgemiz», - деп жазды Президент Қасым-Жомарт ТоқаевTwitter-дегі парақшасында.

Елімізде төтенше жағдай жарияланып, жұрт қиындықты еңсеруге «#Birgemiz» деп кіріскен тұста, Мәдениет және спорт министрлігі бірнеше онлайн-жобаны қолға алған еді. Олардың арасында өнер сүйер қауымға арналған «Карантиндегі жұлдыз» жобасы да бар. 23-наурыздан бастау алған жоба аясында кеше көрермендер тікелей эфирде еліміздің мақтанышы Роза Қуанышқызының әндерін тыңдады. Өздерінің онлайн-концерттерін бұған дейін Жұбаныш Жексенұлы, Жеңіс Сейдоллаұлы, Ғаділбек Жаңай берген болатын. Азғантай уақытта көрерменін тауып, өміршеңдігін көрсеткен жұлдызды жоба онлайн форматта жалғаса береді.

«Мәдениет және спорт министрлігі мен «Қазақтелеком» АҚ бірлесіп қолға алған жоба аясында бүгін қазақстандықтар Сәкен Майғазиевтың әуезді әндерін тыңдайтын болады. Алдағы уақытта тыңдармандардың ыстық ықыласына ие болған бірқатар өнер майталманына алаң ұсынбақпыз. Мемлекет басшысының бүгін берген бағасы біз үшін зор жауапкершілік жүктейтін үлкен абырой. Алдағы уақытта да елімізге төтеннен келген қиындықты бірге еңсеруге өз үлесімізді қосамыз. #Birgemiz» деді,- Мәдениет және спорт министрі Ақтоты Райымқұлова.