Kids Go Free бағдарламасы бойынша алғашқы жолдама сатылды
Қазақстандық туроператордың балаларға арналған тегін әуе билеті бар турпакетін сатып алушылардың алғашқысы тіркелді. Kazakh Tourism мәліметінше Kids Go Free бағдарламасына дәл қазіргі кезде тоғыз туроператор қатысады.
"Атур" туроператорының директоры Айжан Омарбаеваның айтуынша, Kids Go Free бойынша алғашқы жолдаманы ағасы мен қарындасы сатып алған. Бұл Түркістан қаласына Наурыз мейрамын тойлау кезінде бес күнге арналған турпакет. Қарындасын алып жүруге сенімхат ресімделді. Турдың құрамына ұшу, тұру, міндетті пункттер, сондай-ақ күніне үш рет тамақтану, трансфер, экскурсиялық бағдарлама және гид кіреді.
"Бағдарлама жоспарланған көлемде жұмыс істейді деп үміттенемін, өйткені біз оны күтіп, оны әзірлеуге қатыстық. Бұл бағдарлама бойынша сұраныс бар, қоңыраулар өте көп. Алакөлге жазға өтінімдер бар", - деді ол.
Бағдарламаға қосылған басқа туроператорлар да бағдарлама туралы пікірлерімен бөлісті. Осылайша, SkyWay туроператорының директоры Әсем Қозыбағарова компанияның Наурыз айында демалғысы келетіндері бар екенін айтты.
"Біз Алматы мен Алматы облысының, Түркістанның көрікті жерлеріне, сондай-ақ жазда Каспий теңізінің жағасында жағажай демалысын ұсынамыз. Менің ойымша, Kids Go Free бағдарламасы жалпы ішкі туризмді дамыту үшін және отбасылардың туристік пакеттерге деген сұранысын арттыру үшін жақсы. Бұл процесте біз барлық қатысушыларға жұмыс істеуге ыңғайлы болу, кедергілерді азайту және т.б. үшін ережелерді жетілдіре аламыз", - дейді Ә.Қозыбағарова.
Ал Limon Travel туроператорының директоры Алмас Маратұлының пікірінше, Kids Go Free бағдарламасы турөнімнің жалпы чегін төмендетеді. Тиісінше, туроператорға турларды сату оңайырақ болады.
"Бағдарламаның шарттарын біз өзіміз, туроператорлар талқылау барысында өзгерттік. Мысалы, бастапқыда турист 4 түн, 5 күн тұратын тур сатып алуы керек деп жоспарланған болатын. Біз бір түнге дейін қысқартуға қол жеткіздік. Сұранысқа келетін болсақ, көптеген адамдар бұл жай ғана Қазақстан бойынша авиаға балаларға арналған тегін билеттер деп ойлады. Бірақ біз клиенттерге әуе билетін ғана емес, туристік өнімді де, міндетті түрде тұру, басқа да қызметтерді сатып алу керектігін түсіндіреміз", - деді ол.
Туроператорлар Қазақстанның батыс өңірлерінен келетін туристердің қызығушылығы байқалатынын айтты. Географиялық тұрғыдан олардың Алматы мен Түркістаннан алыс орналасқандығын, ал темір жолмен саяхаттау екі-үш күнді алатынын ескере отырып, оларға осы бағдарлама бойынша тур сатып алу тиімді болады деп болжануда.
Бұған дейін мәдениет және спорт вице-министрі Ержан Еркінбаев туроператорлар үшін kids Go Free бағдарламасына қатысу ерікті екенін айтқан болатын.