Алматыда «Аруақ» фильмінің тұсаукесері өтті
Алматыда MEGA Alma-Ata СОО Chaplin Cinemas кинотеатрының ашылуы аясында «Аруақ» көркем фильмінің тұсаукесері өтті. Фильмде басты ролді қазақ киносының мэтрі Асанәлі Әшімов сомдайды. ҚР Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы түсірген картинаның режиссері – Қуат Ахметов.
- Идея авторы Асанәлі Әшімов. 2014 жыл. Елден шалғай тұратын қарт туралы фильм түсіруді ұсынды. Асанәлі ағаның ойы бойынша қария – дала философы, түрлі ғылымға қызығатын адам, - деді Қуат Ахметов.
Картина екі кейіпкердің – Ағатай қарт пен жетім баланың кездейсоқ ұшырасуы туралы баяндайды. Фильм 2018 жылы өндіріске жіберіліп, былтыр көктемде аяқталған. Түсірілімдер Алматы облысында, Іле өзені жағалауында өткен. Фильмнің сценарийін түркі елдерінің ертегілері мен аңыз-әңгімелері желісі бойынша Қуат Ахметов пен Одильша Агишев жазып шыққан.
- «Аруақ» фильмінің баспасөзге арналған көрсетілімі мен тұсаукесері кинотеатрымыздың ашылу күніне орайластырылуы, біздің «Қазақфильм» киностудиясымен қатынасымыздың алғашқы қадамы деп білемін. Біз отандық кино өндіруші компаниямен ұзақ мерзімді серіктестікте жұмыс жасауды жоспарлап, оның фильмдерін көрерменге жеткізуде бәрін жасаймыз, – деді Chaplin Cinemas кинотеатрлар желісінің коммерциялық директоры Дмитрий Кириенко.
«Аруақ» фильмі жайлы: Ағатай есімді қарттың ешкімі жоқ. Сүйген жары қайтыс болған. Араларында балалары болмаған. Ағайын-туысқандары да қалмаған. Фильмге өз ортасынан безіп, далаға барып тұруды көздеген қарт кісінің өмірі арқау болған. Әйтсе де данагөй, пәлсапашының жолында балалар үйінен қашып шыққан Бөбек деген кішкентай, елгезек бала кезігіп, оның бастапқы жоспарын бұзып кетеді.
Өндірісі: Ш.Айманов атындағы «Қазақфильм» АҚ
Ұзақтығы: 90 минут
Жанры: драма
Сценарий авторлары: Қуат Ахметов, Одильша Агишев
Қоюшы режиссері: Қуат Ахметов
Қоюшы операторы: Мұрат Нұғманов
Қоюшы суретшісі: Юлия Левицкая
Композиторы: Айша Оразбаева
Продюсері: Ержан Ахметов
Актерлер: Асанәлі Әшімов, Нұрмұхаммед Асқар, Жасұлан Көпбергенов, Нұржан Әбубәкір, Гүлнәр Дұсматова, Азат Сейтметов.
Хуат Ахметов - кинорежиссер, кинодраматург. Ресей кинематографистер Одағының мүшесі. Ресей кинорежиссерлері гильдиясының мүшесі. 1956 жылы 13 қарашада Латвия ССР туған. Ресей кинематографиясы Комитетінің сценаристер және режиссерлер жоғарғы курсын тамамдаған(Геннадий Полоки шеберханасында, 1993 жыл).
ФИЛЬМОГРАФИЯСЫ. Режиссер: «ГАП» (1992, қ.м., худ.ф.; режиссері әрі сценарий авторы, «Өзбекфильм»), «Обнаженная натура» (2002, Ресей, 2 сериялы телевизиялық көркем фильм; режиссері әрі сценарийін жазған, О.Огишевпен бірлесе), «Пассажир без багажа» (2003, Ресей, 4 сериялы телевизиялық көркем фильм), «Застава» (2006, Ресей), «Ловушка» (2007, Ресей), «Человек-Ветер» / «Wind Man» (2007, Ресей), «Сіз кімсіз КА мырза?» (ҚФ, 2009), "Аруақ" (2018). Сценарий авторлары: «Бумажные крылья ангелов» (2003, Ресей, В. Левановпен бірлесе жазған), «Праздник жертвоприношения» (2004), «Степной экспресс» / «Дүниежарық» (КФ, 2005, сценарий соавторы).