АҚПАРАТТЫҚ ХАБАРЛАМА
Отандастарымыздың зейнетақы жинақтарының көлемі 25,82 трлн теңгеге жетті
2025 жылғы 1 желтоқсандағы жағдай бойынша қазақстандықтардың зейнетақы жинақтарының көлемі 25,82 трлн теңгеге жетті. Бір жылда 3,72 трлн теңгеге немесе 16,8%-ға артты.
2025 жылдың 1 желтоқсанында міндетті зейнетақы жарналары (МЗЖ) есебінен қалыптасқан зейнетақы жинақтарының көлемі 24,39 трлн теңге. 12 айдағы өсімі – 14,9%.
Міндетті кәсіптік зейнетақы жарналары (МКЗЖ) бойынша зейнетақы жинақтары – 724,44 млрд теңге, 12 айдағы өсім – 12,7%.
Бір жыл ішіндегі ең үлкен өсім – 26,3% ерікті зейнетақы жарналары (ЕЗЖ) бойынша жинақтар көрсетті, олардың 2025 жылдың 1 желтоқсандағы жағдай бойынша көлемі 9,58 млрд теңге.
Салымшылардың (алушылардың) зейнетақы шоттарына 2024 жылғы 1 қаңтардан бастап түсе бастаған жұмыс берушінің міндетті зейнетақы жарналары (ЖМЗЖ) 2025 жылдың 1 желтоқсанына 691,53 млрд теңге болды.