Туризм және спорт министрлігі туризм саласындағы жобалардың тиімділігін қамтамасыз ету мақсатында «Битрикс» жобалық басқарудың ақпараттық жүйесін негізгі мониторинг құралы ретінде қолдануда.
Аталған жүйе әрбір жобаның «өмірлік циклін» — жоспарлау кезеңінен бастап толық аяқталғанға дейін бақылауға мүмкіндік береді.
Қазіргі таңда Министрлік 4 негізгі жол картасы аясындағы жұмыстарды қадағалап отыр. Жалпы, жүйеге туризм саласына қатысты 80-нен астам жоба енгізілген, оның ішінде 32 жоба толық аяқталған.
Жобалар мына бағыттар бойынша жүзеге асырылуда:
Туризм инфрақұрылымын дамыту бағытындағы жүйеге 42 жоба енгізілді. Оның ішінде 14 жоба сәтті аяқталып, пайдалануға берілді.
Щучье-Бурабай курортты өңірін дамыту жөніндегі 2025-2029 жылдарға арналған кешенді жоспар аясында 29 жоба бақылауға алынған. Қазіргі уақытта оның 14-і толық іске асырылды.
Маңғыстау туристік өңірін дамыту жөніндегі 2025-2029 жылдарға арналған кешенді жоспарды іске асыру бойынша 6 жоба енгізіліп, бүгінде 4 жоба толық орындалды.
Алматы тау кластері туризмін дамыту жөніндегі 2025-2029 жылдарға арналған кешенді жоспар шеңберінде 12 жоба жүзеге асырылуда. Бұл бағыттағы жобалардың орындалу барысы Министрліктің тұрақты бақылауында.
Сонымен қатар алдағы уақытта туризм саласындағы барлық жобаны «Битрикс» ақпараттық жүйесіне толықтай енгізу жоспарланып отыр.