Туризм саласындағы кәсіпкерлерге қолдау: Автобус сатып алуға жұмсалған шығынның бір бөлігі мемлекет тарапынан өтеледі

Қазақстан Республикасы Туризм және спорт министрлігімен туристік қызметті жүзеге асыратын кәсіпкерлік субъектілеріне 8 орыннан көп (жүргізуші орнын қоспағанда) автокөлік құралдарын сатып алуға кеткен шығынның бір бөлігін өтеу қағидалары бекітілді.

Нормативтік құжат:
Қазақстан Республикасы Мәдениет және спорт министрінің 2021 жылғы 30 желтоқсандағы № 412 бұйрығы (2023 жылғы 29 желтоқсандағы және 2025 жылғы 23 сәуірдегі өзгерістермен) Қазақстан Республикасы Әділет министрлігінде 2022 жылғы 5 қаңтарда № 26380 болып тіркелген.

Кім қатыса алады?

Туристік қызметті жүзеге асыратын шағын және орта бизнес субъектілері – жеке кәсіпкерлер мен заңды тұлғалар.

Не өтеледі?

Кәсіпкерлік субъектісі сатып алған автобустың құнының 25%-на дейін өтеу көзделген, егер ол келесі талаптарға сай болса:

• 8 жолаушы орнынан артық (жүргізуші орнын есептемегенде);
• туристік мақсатта қолданылуы;
• автобус Қазақстанда тіркелген және заңды түрде сатып алынған (оның ішінде несиеге алынған болса да жарамды).

Қандай құжаттар қажет?

Кәсіпкерлер жыл сайын 1 маусымға дейін тіркелген орны бойынша жергілікті атқарушы органға (әкімдікке) келесі құжаттарды тапсыруы тиіс:

• белгіленген нысан бойынша өтінім;
• тіркеу және құрылтай құжаттарының көшірмелері;
• көлік сатып алынғанын растайтын құжаттар;
• автобустың фото және видео материалдары;
• салық туралы мәліметтер;
• тізім бойынша басқа да құжаттар.

Өтінім қағаз түрінде немесе электронды форматта – жеке, пошта арқылы немесе электронды сервистер арқылы жіберілуі мүмкін.

Қарау тәртібі қандай?

1. Өтінімдер тіркеліп, 2 жұмыс күні ішінде толықтығы тексеріледі.
2. Комиссия құжаттар пакетін 10 жұмыс күні ішінде қарайды.
3. Қабылданған шешім (мақұлдау немесе бас тарту) жергілікті органның сайтында жарияланады.

Егер өтінім мақұлданса, бюджетке қаражат түскеннен кейін 15 жұмыс күні ішінде өтеу сомасы кәсіпкердің шотына аударылады.

Назар аударыңыз:

• Компенсация алғаннан кейін 5 жыл ішінде автобусты сатуға тыйым салынады.
• Әр жылы автобустың пайдаланылуы туралы есеп тапсыру қажет.
• Кәсіпкерлер өзара міндеттемелер қабылдайды:
• қызметкерлер санын арттыру;
• ҚҚС көлемін арттыру (егер қолданылса).

Қосымша ақпарат:

Өтінім нысаны мен қажетті құжаттардың нақты тізімін алу үшін өзіңіздің аудан/қала әкімдігі жанындағы туризм бөліміне немесе Қазақстан Республикасы Туризм және спорт министрлігінің сайтына жүгінуіңізге болады.

Сондай-ақ, «Атамекен» Ұлттық кәсіпкерлер палатасынан кеңес алуға болады.